Almaty prokýratýrasynyń ókilderi Murathan Toqmádıdiń isine qatysty júrip jatqan tergeý barysyn boıynsha pikir bildirdi, - dep habarlaıdy Qamshy.kz aqparat agenttigi vedomstvonyń baspasóz qyzmetine silteme jasap.

Vedomstvo ókilderiniń málimetinshe, vedomstvoaralyq jedel-tergeý toby QR Qylmystyq kodeksiniń 194-baby ("Qorqytyp alý") jáne 287-baby ("Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý") boıynsha aıyptalǵan Murathan Toqmádıge qatysty sotqa deıingi tergeý júrgizip jatyr.

"QR Qylmystyq-prosessýaldyq kodeksiniń 70-babynyń 5-bóligine sáıkes, qorǵaýshy oǵan jarıa bolǵan málimetterdi aıta almaıdy. Al osy kodekstiń 201-babynda sotqa deıingi tergeýge qatysty derekterge jarıa etýge jol berilmeýi tıis ekeni jáne málimetterdiń tek prokýrordyń ruqsatymen jarıa etiletini aıtylady", - delingen habarlamada.

"A.Oralbaı men D.Ótebekov mundaı jaýapkershilikti alýdan bas tartty. Osyǵan baılanysty kúdiktiniń advokattary A.Oralbaı men D.Ótebekov bıyl 29 jáne 31 tamyzda qylmystyq isten alyp tastaldy", - dep habarlady Almaty prokýratýrasynyń baspasóz qyzmetindegiler.

Resmı málimetterge qaraǵanda, qazirgi ýaqytta advokattardy aýystyrý máselesi qarastyrylyp jatyr.

"5 qyrkúıekte Murathan Toqmádı prokýrormen kinásin moıyndaý týraly mámilege kelgisi keletinin aıtty. Onyń bul ótinishin prosesýaldyq prokýror qarap, sheshim shyǵaratyn bolady. Qylmystyq isti tergeý jumystaryn Almaty qalalyq prokýratýrasy baqylaıdy", - delingen prokýratýranyń habarlamasynda.

Eske sala keteıik, Murathan Toqmádı 12 maýsymda ustalǵan bolatyn. Almatyda arnaıy qyzmet "Depýtattyq korpýs" atty qylmystyq topty ustaý boıynsha operasıa ótkizgen edi. BAQ-ta shyqqan aqparat boıynsha, bul qylmystyq topty "QazSHynyQurylys" zaýytynyń ıesi Murathan Toqmádı basqarǵan. Sondaı-aq, prokýratýra málimetinshe, onyń úıin tintý kezinde qarý-jaraq pen oq-dári tabylǵan.