Búgin iri memleket qaıratkeri, 2006 jyly qastandyqpen qazaq tapqan Altynbek Sársenbaıulynyń 55 jasqa tolatyn týǵan kúnine oraı týystary men dostary, shákirtteri marqumnyń qabiri basynda quran oqydy, dep jazady Qamshy.kz tilshisi.

31 jasynda-aq Qazaqstannyń Aqparat mınıstri qyzmetine kelgen, ashyq oıly, jańashyl tulǵaǵa Keńsaı zıratynda quran baǵyshtaýǵa týǵan aǵasy, «Jas Alash» gazetiniń burynǵy bas redaktory Rysbek Sársenbaıuly, memleket jáne qoǵam qaıratkeri Tólegen Júkeev, memleket jáne qoǵam qaıratkeri Oraz Jandosov, qoǵam qaıratkeri, táýelsiz saıasatker Ámirjan Qosanov, «DAT» jobasynyń jetekshisi, qoǵam qaıratkeri Ermurat Bapı, «Qazaq ádebıeti» gazetiniń bas redaktory Janarbek Áshimjan sıaqty el aǵalary keldi.

Jınalǵandar birneshe márte quran oqyǵan soń, Tólegen Tilekuly sóz alyp: «Altynbek eldiń esinde, halyqtyń jadynda qalǵan tulǵa. Qazaqtyń jańa tarıhynda óziniń ornyn oıyp alǵan azamat edi. Elge, ultymyzǵa, memleketimizge úlken úles qosty. Memlekettiń qazirgi damýyna ıntellektýaldy, saıası uıymdastyrýymen aıryqsha eńbek etti. Qazirgi qazaq memleketiniń birinshi irgesin qalaýshylardyń qasynda boldy, memleket qurǵan Sovettik býynnyń ishindegi asa daryndy azamat edi. Jas ketti. Qalaı aıtqanda da Altekeń esimizde qalatyn, jadymyzda qalatyn, tarıhymyzda qalatyn altyn árippen jazylatyn tulǵa. Sol sebepten umytpaıyq, Altekeńniń áýletine, januıasyna, balalaryna, týystaryna jaqsylyq tilep solardyń qýanyshynda kezdesip turaıyq! Aman bolaıyq! Altekeńniń armanyn balalary, halqy kórsin!», - dep jalyndy sózin arnady.

Ómiriniń sońǵy jyldary Qazaqstandaǵy opozısıa jetekshileriniń biri bolǵan saıasatker Altynbek Sársenbaıuly 2006 jylǵy aqpannyń 11-i eki kómekshisi – Baýyrjan Baıbosyn jáne Vasılıı Jýravlevpen birge qastandyqpen óltirilgen. Marqumnyń týystary Altynbektiń ólimine baılanysty Qylmystyq istiń saıası astary bar dep esepteıdi.

Bas prokýratýranyń málimdemesine sáıkes kezinde Altynbek Sársenbaıulyn óltirý jónindegi tapsyrysty oryndaǵany úshin aıypty dep tanylǵan Rýstam Ibragımbekov 2012 jylǵy sáýirde Qazaqstannyń Joǵarǵy sotyna qaıta aryz jazyp, «qastandyqqa tapsyrys berýshiniń shyn esimin» jarıa etken.

2013 jyly jeltoqsannyń 20-sy kúni Qazaqstan bas prokýratýrasynyń ókili Astanada arnaıy brıfıń ótkizip, «Altynbek Sársenbaıulyn óltirýge tapsyrys berýshi Erjan Ótembaev emes, Rahat Álıev pen Álnur Musaev» degen málimdeme jasady. Erjan Ótembaev 2006-shy jyly saıasatker Altynbek Sársenbaıulyn óltirýge tapsyrys berdi degen aıyppen 20 jylǵa sottalǵan bolatyn, keıinnen onyń jazasy eki ret jeńildetilip, bosap shyqty. Qylmysqa aıypty dep tanylǵan, UKQ eks basshylary, syrttaı sottalǵan Rahat Álıev 2015 jyly 24 aqpan kúni Avstrıa túrmesinde jumbaq jaǵdaıda qaıtys boldy. Óliminiń sebebi retinde ózine qol jumsaǵany aıtyldy; Álnur Musaev bolsa Eýropada bostandyqta júr.

Altynbek Sársenbaıuly – 1993-inshi jyldan bastap Qazaqstannyń baspasóz jáne buqaralyq aqparat mınıstri, aqparat jáne qoǵamdyq kelisim mınıstri, mádenıet, aqparat jáne qoǵamdyq kelisim mınıstri, 2001-inshi jyldan Ulttyq qaýipsizdik Keńesiniń hatshysy, Qazaqstannyń Reseıdegi tótenshe jáne ókiletti elshisi syndy laýazymdy memlekettik qyzmetterdi atqardy. Al 2003 jyldyń kúzinen bastap Altynbek Sársenbaıuly Qazaqstan opozısıasynyń qataryna qosylyp, «Aq jol» demokratıalyq partıasynyń teń tóraǵasy bolyp saılandy. 2004 jyly Qazaqstanda parlament saılaýy óter aldynda Altynbek Sársenbaıuly az ǵana merzimge aqparat mınıstri qyzmetine qaıta oraldy. Alaıda, sol jyly kúzde ótken parlament saılaýy zań talaptaryn óreskel burmalaýshylyqpen ótkizilgenin málimdep, oǵan narazylyq retinde mınıstr qyzmetinen ketti. 2005 jyldan opozısıalyq «Naǵyz Aq jol» partıasynyń teńtóraǵasy jáne «Ádiletti Qazaqstan úshin» respýblıkalyq qozǵalysynyń tóralqa múshesi boldy.