Qazaqstandyq rejıser Sábıt Qurmanbekovtiń "Oralman" fılmi Reseıdiń Qazan qalasynda ótken Hİİİ halyqaralyq musylman kınofestıvalinde júlde aldy. Al fılmde basty róldi somdaǵan akter Dýlyǵa Aqmolda 5 jáne 11 qyrkúıek aralyǵynda Tatarstanda ótken XIII Halyqaralyq musylmandar kınosy festıvalinde «Úzdik er adam róli» júldesimen marapattaldy, dep jazady Qamshy.kz aqparat agenttigi.

«Oralman» fılmi týǵan jerinen ketýge májbúr bolǵan, alaıda ondaǵan jyldar ótken soń Aýǵanstannan eline qaıta oralǵan qandastarymyz jaıly baıandaıdy.

- Tolyqmetrajdy kartınalarda somdaǵan rólderim ishindegi bul meniń alǵashqy jeńisim, óte qýanyshtymyn. Bul tek meniń ǵana tabysym emes, rejıser Sábıt Qurmanbekovtyń, operator Mars Ýmarovtyń, qoıýshy sýretshi, kompozıtordyń, sonymen qatar barlyq túsirý tobynyń eńbegi. Olardyń barlyǵyna alǵysymdy bildire otyryp, osy jeńispen quttyqtaımyn, - dedi akter Dýlyǵa Aqmolda.  

Qazaqstan Respýblıkasy Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdıasy túsirgen atalmysh fılm osy festıváldiń negizgi baıqaýynda 10 tolyqmetrajdy kartınamen baq synady. Jalpy festıválge qatysýǵa 61 elden 782 fılm usynys tastaǵan. 

Aıta ketsek, festıváldiń «Úzdik fılm» júldesin túrik rejıseri Mustafa Qaranyń «Kalandra yzǵary» fılmi, al «Úzdik rejıser» júldesin úndi rejıseri Mangesh Djoshı («Djoshı jonýshy» fılmi úshin) ıelendi. Reseıdiń eki kartınasy da júldeli oryndardan kórindi – «Amýn» fılmi «Úzdik senarı» júldesimen marapattalsa, «Sofıchka» fılminiń operatory Aırat Iamılov úzdik operator atandy. Al «Úzdik áıel adam róli» júldesi «Áıel kúni» fılminiń úsh aktrısasyna buıyrdy. 

Atalmysh halyqaralyq musylmandar kınosy festıvali – 2005 jyldan beri Tatarstanda ótkizilip kele jatqan Reseıdiń iri kınofestıvalderdiń biri. Festıvál uıymdastyrýshylarynyń aıtýynsha, bul kınoforýmnyń maqsaty – musylman elderdiń fılmderin úlken ekranǵa shyǵaryp, dinı ǵana emes, adamı qundylyqtardy da dáripteý, ultaralyq dıalog qalyptastyrý.

Esterińizge sala ketsek, «Oralman» kórkem fılmi osy jyldyń basynda Irannyń astanasy Tegeranda ótken  35-shi Halyqaralyq Fadjr kınofestıvalinde Bas júldeni, sonymen qatar XIII Halyqaralyq «Eýrazıa» kınofestıvalinde Bas júldesin jeńip alǵan bolatyn. 

Aıta ketsek, «Oralman» kórkem fılmi  15 qyrkúıekten bastap elimizde prokatqa shyǵady.  

Fılm jaıly: Fılm HH ǵasyrdyń 30-shy jyldary qyzyl áskerdiń jendetterinen Aýǵanstanǵa qonys aýdarýǵa májbúr bolǵan  qazaq otbasy týraly. Bas keıipker Bazarbaı qarttyń bir qyzy men uly sol jaqta dúnıege keledi. Balalary eseıip, otbasyn qurady. Uly Saparqul jergilikti pýshtýn ultynan kelinshek alady. Al qyzy aýǵan jigitine turmysqa shyǵady.  Saparqul soǵys kezinde modjahetter jaǵynda soǵysady. Jyldar ótedi. Bazarbaıdyń otbasy Qazaqstanǵa kóshýge ruqsat beretin kvota alady. Barlyǵy jolǵa jınalady. Taýly qyshlaqtan shyqqan otbasyny uzaq jol kútedi.