Kóp jyl boıy ógeı ákesinen qorlyq kórip, ony túrmege toǵytqannan keıin onyń týystary qysym jasap júrgen Álıa Estenovanyń bastan ótkergen oqıǵasyn nazarlaryńyzǵa usynamyz.
Sot sheshiminen keıin anasy men qyzyna ógeı ákeniń týystary kún kórsetpeıtin boldy. Ol ýaqytta da qyz qoryqqannan eshkimge tis jarmady. Tek ógeı ákesiniń bostandyqqa shyǵýyna 1 jyl qalǵanda «tiri qaldyrmaımyn» degen qorqytýlarynan keıin ǵana qyz barlyǵyn baıandap berdi dep jazady Qamshy.kz aqparat agenttigi Caravan.kz-ke silteme jasap.
Álıa «Únsiz qalma» atty zorlyq-zombylyqqa qarsy qozǵalys basshysynyń oqıǵasyn estigennen keıin óziniń basynan ótken jaǵdaıdy aıtyp berýge bekindi.
"Dınanyń bastan ótkergenin ashyq aıtqanyna tańǵaldym. Men álemge ókpeli edim. Alaıda men jylamaımyn, barlyǵyn ishimde saqtaımyn dep sheshtim.
Dına qorqynyshymdy jeńsem ózgelerge kómektese alatynymdy aıtty. Men oǵan sendim. Halyqaralyq konferensıada sóıleımin dep oılaǵan emespin. Qazir aıtqan sózderim esimde joq. Tek «Men qurban emespin» degenim esimde. Ógeı ákemdi 11 jylǵa bas bostandyǵynan aıyrsa da 10 jyl boıy rýhanı daǵdarysta boldym. Onyń týystary qysym kórsetti. Ógeı ákemniń daýsyn túsimde de, óńimde de estıtin boldym.
Onyń týystary meniń barlyǵyn oıdan shyǵarǵanyma senimdi. Meniń «ótirigimdi» áshkere etý úshin meni ańdýmen boldy. Men tipti tizerlep olardan meni jaıyma qaldyrýdy ótinip suradym. Biraq olarǵa sózderim áser etpedi. Ógeı ákemniń ápkesi ol túrmeden shyqqanda meni tirdeı kómetinin aıtty.
Psıhologqa qaralǵanda bastan ótkergenimdi qaıta esime alý qıynǵa soqty. Eger ógeı ákem jaqyndaryma zardabyn tıgizer bolsa barlyǵyna barýǵa daıynmyn. Alaıda ógeı ákemdi kórgende boıymdy qorqynysh bıleýi de ábden múmkin.
Analar, balalaryńdy kúıeýlerińnen artyq kórińder
- Anańnyń sondaı adamǵa turmysqa shyqqany úshin oǵan renjimeısiń be?
- Ázirshe bul suraqqa jaýap bere almaımyn.
- Balaly jasy kelgen turmys quraıyn dep júrgen áıelderge qandaı keńes beresiń?
- Men olardy kinálamaımyn. Ózim tek bir márte ǵana súıgenime turmysqa shyqqym keledi. Ázirshe otbasyn qurý týraly oılanbadym. Meniń jetkinshek kezimde bastan ótkergenim qıyndyq týdyrmaı qoımaıdy. Janymda áli kúnge deıin agresıa, yza men renish bar. Basqalar ony ishimdik, esirtkimen basýǵa talpynsa men sportpen aınalysý arqyly jeńýge tyrysamyn. Men adamdarmen tez til tabysyp ketemin. Meniń ómirlik uranym «Shaǵymdanbaý». «Únsiz qalma» qozǵalysyna tek qazaqstandyqtardyń maǵan degen qoldaýyn seziný úshin ǵana keldim.
Analarǵa aıtarym, balalaryńyzdy jaqsy kórińizder. Qulap qalsa da, kúıip qalsa da, qandaı jaǵdaı bolmasyn balańyzǵa kóńil bólińiz. Eger kenetten balańyz kúıeýińizben dúkenge barýdy qalamasa, birden dabyl qaǵyńyz.
Áıel kúıeýin qatty jaqsy kórse, aınalasynda ne bolyp jatqanyn bilgisi de, estigisi de kelmeıdi. Men óz anam týraly aıtyp jatqan joqpyn. Jalpy ekinshi márte turmys qurýdy josparlap júrgen balaly áıelderge eskertip jatyrmyn.
Siz anańyzǵa ógeı ákeńizdiń sizge tıisetinin aıtýǵa tyrystyńyz ba?
Iá, aıtýǵa tyrystym. Biraq ógeı ákem anama aıtyp qoısam, ony tastap ketetinin jáne anam sol úshin meni óltirip tastaıtynyn aıtyp qorqytty.
Siz oǵan sendińiz be?
Meniń ol ýaqytta jasym nebári 8-de boldy. Árıne sendim. Men odan qoryqtym. Ol birinshi ret anamdy urǵanda ekeýiniń arasyna tústim. Sol ýaqytta ol meni qatty urǵany sonshalyq murnymdy syndyryp jiberdi. Osy jáıttan keıin ógeı ákemniń maǵan ne istegenin qalaısha aıtpadym? Men anam men sińlim úshin ýaıymdadym. Bir kúni ol úıge mas kúıinde kelip, dıvanda jatqan óziniń qyzyn, meniń sińlimdi kerek emes zat sekildi laqtyryp jiberdi. Eger men ustap qalmaǵanda ol jerge qulaýshy edi. Úsh sińlim úsh túrli ákeden bolsa da olardy týǵanymdaı kóremin.
Bolashaǵyńyzdy qalaı elestetesiz?
Qorqynyshymdy jeńip, deni saý adam bolǵym keledi. Men erteń-aq turmys quryp, kóp balaly ana atanyp, shetelge kóship ketemin dep aıta almaımyn. Men jas jetkinshekterge kómektesemin dep aldyma maqsat qoıdym.
Shyndyqqa tike qaraý kerek
«Únsiz qalma» qozǵalysynyń basshysy Dına Smaılovanyń pikiri.
Bizdiń halyq jaýapsyz. Kórshisiniń áıelin aıýandyqpen uryp-soǵyp jatqanyn kórip, estise de onymen qolyn berip amandasý arqyly áreketine qoldaý bildiredi.
Meniń túsingenim, biz qansha ortalyq salsaq ta, qansha memlekettik baǵdarlama qabyldasaq ta qoǵamnyń zorlyq-zombylyqqa degen kózqarasy ózgermeı alǵa ilgerileý bolmaıdy.
Álıa Estenovanyń ógeı ákesiniń týystaryna keler bolsaq, olar qylmyskerdi emes, óz tegin aqtap alǵysy keledi. Aına Býzık úsh kishkentaı balasymen jáne rýhanı, moraldyq turǵysynan jaraly 14 jastaǵy qyzymen páterden páterge kóship júrgende qylmyskerdiń týystary oǵan Reseıden páter alyp berýdi usynǵan. Biraq Aına qyzy úshin kúresý maqsatynda usynystan bas tartty.
Bireý jol apatyna tússe barlyǵy oǵan qoldaý bildirý úshin aýrýhanaǵa asyǵady. Al bul jaqta jan men rýh qınalyp otyr.
Bizdiń qoǵamda beıkúná balany eresek er adamnyń zorlaýy uıat bolyp esepteledi. Ógeı ákesiniń týystary qysym kórsetýimen qatar synyptastarynyń ata-analary, mektep dırektory qyzǵa qarsy shyqty. Bul Álıa úshin ekinshi aýyr soqqy boldy. Sondyqtan Aına Astanadan Almatyǵa kóshýge májbúr boldy. Biraq burynǵy kúıeýiniń týystary ony Almatydan da taýyp aldy. Qylmysker túrmeden shyǵý úshin aqsha usynýyn toqtatar emes. Aına bastan qandaı qıyn sátterdi ótkerip jatqanyn bile tura oǵan 50 myń teńge usynǵan.
Qylmysker túrmeden shyqqannan keıin jańa qurban izdegen jaǵdaılar kóp kezdesken. Sondyqtan Álıa ózi úshin emes ózgeler úshin ýaıymdaıdy. Sebebi ógeı ákesiniń jıen qaryndastary ol úshin týysqan emes, óz qumaryn qandyratyn adam ǵana ekenin túsinbeıdi.
