Oǵan úsh eldiń arnaıy qyzmeti izdeý saldy. DAISH sodyrlary izine tústi. Al ýahabıtter ony tapqan jaǵdaıda birden kózin joıýǵa quqyǵy bar. Qazaqstandyq Sergeı Leskevıchtiń sırıalyq áskerı  lagerden qashyp ketkenine 4 jyl boldy dep jazady Qamshy.kz aqparat agenttigi Caravan.kz-ke silteme jasap.

Súıikti otbasynan jyraqqa ketken qazaqstandyq ózgeler onyń qateligin qaıtalamaýy úshin basynan ótken jaǵdaılardy aıtyp berýdi uıǵardy.

– Barlyǵy 2012 jyly Serik esimdi kórshimmen tanystyqtan bastaldy. Keıin anyqtalǵandaı ol kásibı túrde adamdardy aldaýmen aınalysady eken. Serik adamdardy óz sózine ońaı sendire alady. Onymen kezdese qalsam din týraly aıtatyn. Bir jyl boıy onymen sóılesip turdym. Sonyń nátıjesinde musylman bolamyn dep sheshtim. Kórshim Sırıa týraly da jıi aıtatyn. Ondaǵy beıbit turǵyndardyń qalaı azap shegip jatqanyn sýretteıtin. Serik aıtqandary dáleldi bolý úshin foto men beıne rolıkterdi kórsetti. Onda mert bolǵan áıelder, aqsaqaldar men balalardyń deneleri kórsetiletin.

Ata-anam meniń men Islam dinin qabyldaǵanymdy bilip shart qoıdy. Eger qaıta hrıstıan bolmasam úıden ketýimdi talap etti. Men ata-anama renjip úıden ketip qaldym. Serik sol sátti paıdalanyp maǵan Sırıaǵa barýǵa usynys jasady.

– Keıbir aqparattarǵa sáıkes, adamdarǵa Sırıaǵa barý úshin aqsha usynady eken. Bul aqparat qanshalyqty durys?

– Joq, ótirik. Serikte aqsha bolmady. Tipti ushaqqa bıletti men ózim satyp aldym. Ol kóligimdi satýǵa májbúrledi. «Osy aqshaǵa Qudaıdyń aldynda qaıyrymdy, saýapty ister atqarasyń. Musylmandarǵa kómektesesiń» dedi. Men kelistim. Biz eń aldymen Túrkıaǵa bardyq. Ystanbulda birneshe kún qonaq úıde jattyq. Odan keıin avtobýspen Túrkıa men Sırıa shekarasyna deıin bardyq. Shekarada eshqandaı kúzet bolmady. Biz jaıaý shekaradan esh kedergisiz ótip kettik. Bizdi lagerge alyp keldi. Onda adamdar óte kóp boldy. Meni azdap oryssha sóıleı alatyn ózbektermen ornalastyrdy. Olardan bul lagerdiń adamdardy qanisher jasaıtyn jattyǵý bazasy ekenin bildim. Jaryq, sý bolmady. Tamaqty alyp kelip turdy.

– Sizden basqa onda Qazaqstan azamattary boldy ma?

– Onda kim bolmady deseńizshi! Ázirbaıjandar, túrikter, kavkazdyqtar. Burynǵy Soıýz kezindegi elderdiń barlyǵy derlik bar. Qazaqtardy da kezdestirdim. Keıinirek meni Qyrǵyzstannyń arnaıy qyzmeti tutqyndaǵanda men olardyń sýretteri arqyly tanydym. Sırıaǵa jetkennen keıin Serik birden ózgerip shyǵa keldi. Naǵyz qatigez adamnyń ózine aınaldy. Biz onymen únemi urysatynbyz. Úıge telefon shalýǵa ruqsat bermedi. Biz tek fotoǵa tústik. Ol fotolar Qazaqstannyń UQK-ge túsken. Sodyrlar meniń pasportymdy alyp qoımaǵany qandaı jaqsy boldy.

Kókeıimde jaýaby joq saýaldar saırap turdy. Islam dinin jeleý etip nelikten osyndaı pasyq áreketterge barady? Bul istep jatqandarynyń barlyǵy sharıǵatqa kereǵar ǵoı. Sondyqtan sodyrlardan qashyp ketýdi jón kórdim. Meniń jolym boldy. Bandanyń basshysyn óltirip ketti. Lagerde ózbek kavkazdyqtardyń arasynda bılikke talas bastaldy. Men sol sátti paıdalanyp bir qyrǵyzben túnde qashyp kettim. Úıge kelgen jerimizben qaıttyq. Shekaradan jaıaý Túrkıaǵa óttik. Ol jerden Bishkekke bardyq. Qyrǵyzstan áýejaıynda meni qyrǵyzdyń arnaıy qyzmeti ustap aldy.

– Sizge qandaı aıyp taǵyldy?

– Taǵylǵan aıyptardyń sanynda shek joq.Onyń ishinde meni bireýge jaldanyp, solardyń aram buıryqtaryn oryndady degen de aıyptaýlar bar. Aqylǵa qonbaıdy. Ózimmen birge jarylǵysh zatty alyp Túrkıanyń keden baqylaýynan qalaı ótemin? Tergeýshiler taıaqpen urdy, eki kún basyma paket kıgizip elektr toǵymen azaptady. Qabyrǵam syndy. Eger men ólip qalsam olar jazalanbaýshy edi. Terorızmmen kúres dep qutylýshy edi. Men úshin azaptardyń eń qorqynyshtysy qandaı bolǵanyn bilesiz be? Jalǵyz adamǵa arnalǵan kamera. 24 saǵat boıy jalǵyz otyrý qorqynyshty. Qyrǵyzstannyń MUQK-niń jertólesinde 5 aı otyrdym. Kamera óte kishkentaı boldy. Jatýdy aıtpaǵanda bir orynnan aınalada almaısyń. Esimnen adaspaýy úshin qumyrtsqa men órmekshilermen sóılestim. Men qatty aýyryp qaldym. Meni aýrýhanaǵa alyp ketti. Odan keıin isti jaýyp meni túrmege aýystyrdy.

Qyrǵyz soty maǵan 6 jyl 10 aı bas bostandyǵynan aıyrý jazasyn kesti. Onyń 2,5 jylyn otyrdym da, rahymshylyqqa ilinip Qazaqstanǵa oraldym. Bir jyldan keıin áıelimiz ekeýimiz shetelge kóshýdi uıǵardyq. Túrli elderde júrip sharshaǵandyqtan Odessaǵa turaqtaýdy jón kórdik. Men jumys taptyp, týystarymyzdyń kómegimen páter aldyq. Sonda balam týyldy. Barlyǵy jaqsy boldy. Biraq bir kúni jumystyń janynda maǵan belgisiz erkekter shabýyl jasady.

– Ol adamdar kim? Sodyrlar emes pe?

– Olar meni ura bastady. Qolymdy qaıyrdy. Kólikke súırep apardy da basyma qap kıgizdi, qolyma kisen saldy. Men kómekke shaqyrdym, biraq eshkim kómektespedi. Meniń birinshi oıym - olar buzaqylar nemese DAISH sodyrlary bolýy múmkin. Belgisiz alańǵa ákelip, basymnan qapty alyp tastap sýretke túsire bastady. «Sırıadaǵy soǵysqa bardyń ba?» dep surady. Men olarǵa onyń barlyǵy ótken ómirimde bolǵanyn jáne ol úshin Qyrǵyzstan túrmesinde otyryp óz jazamdy alǵanymdy aıttym. Mennen túsinikteme aldy, qonaq úıge alyp keldi. Sol jerde olardyń Ýkraınanyń arnaıy qyzmeti ekeni anyqtaldy. Men vıza tártibin buzǵanym úshin elden shyǵýym kerek ekenin aıtty. Kıimderimdi jınaý úshin ýaqyt kerek ekenin aıtqynymda olar birden áýejaıǵa baryp, bıletterdi qaraýdy usyndy. Aldady. Shekara aımaǵynda basyma qap kıigizip, qolyma kisen salyp, QR UQK-niń arnaıy ushaǵyna otyrǵyzdy. Mennen bólek basqa adamdardy kirgizdi. Olardyń kim ekenin bilmeımin. Osylaısha qaıta Qazaqstanǵa keldim.

– Bastan ótkergen jaǵdaıdan keıin dinı ustanymyńyz ózgerdi me?

– Joq, men ózimdi áli kúnge deıin musylmanmyn dep esepteımin. Qudaı bir. Sırıaǵa barǵanym meniń qateligim boldy. Odan din ózgermeıdi. Men eshqashan radıkaldy dindi ustanbaǵanmyn. DAISH-tyqtar - qanpezerler. Al uıymnyń ózi naǵyz shaıtannyń ordasy. Ondaǵy adamdardyń kóbiniń esi durys emes. Men tek solardyń kek alýynan qorqamyn. Olarda izdestirý júıesi óte jaqsy damyǵan. Tipti barlaý qyzmetiniń barlyǵynyń kúshin biriktirseń de olardyń kúshi asyp ketedi. Olar erte me, keshpe meni taýyp alýy múmkin. Biraq men ótken ómirimdi artta qaldyrdym. Jaqynda Halyqaralyq adam quqyqtary jónindegi búroǵa Evgenıı Jovtıske bardym. Ol maǵan kómektesýge ýáde berdi. Qazaqstandyq arnaıy qyzmettiń meni qyrǵyzdar sekildi azaptamaıtyny qýantady. Olardyń barlyq áreketi zańnyń aıasynda júzege asady. Olar barlyǵyn anyqtaǵannan keıin otbasymmen qaıta qaýyshamyn dep úmittenemin.

Sergeı Leskevıchtiń advokaty Jana Kúnserkına: Men QR Bas prokýratýrasyna Sergeı Leskevıchke qatysty jaǵdaıdy anyqtaýdy surap ótinish bildirdim. Onyń ishinde "sotqa deıingi tergeý jumystary júrgizilip jatyr ma?", "Sergeı bul iste kúdikti me álde jábirlenýshi me? " degen saýaldar bar. Al Qyrǵyzstan sotynyń sheshimi múlde túsiniksiz.