Toqtaráli Tańjaryq esimin qazaq poezıasynda úlken de, kishi de bileri anyq. Búginge deıin respýblıkalyq basylymdarda óleńderi men maqalalary úzbeı jarıalanyp kelgen aqynnyń osydan 4 jyl buryn "Jalyn" baspasynan «Tún paraqtary» atty shaǵyn toptamasy jaryq kórgen bolatyn.

 Taıaýda ǵana bir aǵamyzdan «Estidiń be, Toqtaráliniń jınaǵy Eýropada jaryq kóretin bolypty» degen habar estip, aqyn aǵamnyń ózine habarlasyp em, «Iá, solaı bop qaldy» dep otyr ázildep.

 Bul degen qýanysh qoı! Búkil qazaq aqyndary úshin qýanysh!

 Aqyn óleńderi «Eýropa aqyndarynyń konkýrsy» aıasynda polák tilinde Polsha elinen shyǵatyn bolypty. Kitap aldaǵy jyldyń naýryz aıynda baspadan shyǵady eken. Búkil Orta Azıadan taldanǵan bir el, bir aqyn. Bir el – Qazaqstan da, bir aqynnyń toptamasy – Toqtaráli Tańjaryqqa buıyrypty. Jazǵan jyryń álem tilderinde sóılep tursa, aqyn úshin mundaı qýanyshtyń shegi joq árıne.

 Alǵashynda aqynnyń «Órtelgen meshit», «Orman», «Gúl», «Iek súıeý» qatarly jyrlary aýdarylyp, áldebir basylymnan jaryq kórse kerek. Sosyn aqynnyń ózine habarlasyp, jınaǵyn joldap berýin ótinipti.

 Bul konkýrs aıasynda Estonıa, Vengrıa, Shvesıa, Bolgarıalardan da bir-bir aqynnyń jınaǵy baspadan shyǵý aldynda.

 Eýropa elderiniń Túrki taný ortalyǵynyń jaýaptysy Genrıh Iankovskıı habarlasyp, aqyndy 2014 jyly Polshada ótetin aqyndar festıvaline qurmetti qonaq retinde shaqyryp otyr eken.

 Jortqanda jolyń bolsyn, Qazaqtyń aımańdaı azamaty, aqyn uly!

Aqynnyń "Qamshy" portalynda jarıalanǵan óleńderin myna aradan oqı alasyzdar. 

 http://qamshy.kz/?p=1255

Daıyndaǵan: Qaısar Qaýymbekuly