Iá, kez kelgen adamnyń ózindik aqıqaty bar. Alaıda kópshiligimiz ózimizdiń janymyzdy jaralaıtyn aqıqatty qabyldamaı, oǵan qatysty sebep taýyp alatynymyz da bar. Aqıqatty dál sol qalpynda qabyldaý kópshiligimizdiń qolymyzdan kele bermeıdi. Ómirdegi keı qıyndyqty jeńildetetin, júıkeni tynyshtandyratyn aqıqattyń tizimin Qamshy.kz aqparat agenttigi oqyrman nazaryna usynady.

 Negizinen tanysyńyzdyń nemese janyńyzǵa jaqyn dep sanaǵan jannyń habarlamańyzǵa jaýap bere almaıtyndaı qoly bos bolmaýy múmkin emes. Ol adam sizdiń habarlamańyzǵa sanaly túrde jaýap bergisi kelmegendikten, sizge jaýap jazbaıdy. Osy aqıqatty «qoly bos bolmady», «umytyp ketken shyǵar», — degen syltaý arqyly burmalaýdyń paıdasy joq. Iá ol siz úshin erekshe adam bolýy múmkin, alaıda siz «ol adam úshin kimmin?», — dep óz-ózińizge suraq qoıyp kórdińiz be?   Eger ol sizdi erekshe adam dep eseptese, jaqyn adam dep sanasa kez kelgen jaǵdaıda «qolym bos emes, keıinirek habarlasam», — dep bolsa da jaýap jazatyn edi. Kim týraly aıtyp otyrǵanymdy sezip, oılap tursyz ǵoı, ıá? Iá, dál sol adam týraly aıtyp otyrmyn. 

Kez kelgen adam ózimshil emespin dese de, eń aldymen ózin oılaıdy. Árbir adam ózimshil ekenin syrtqa kórsetpeıdi, árıne. Alaıda kez kelgen jan beısanaly túrde óziniń qamyn oılaıdy.  Bul – óte durys sheshim, oryndy kózqaras. Sebebi eger siz ózińizdi oılaı almasańyz, sizdi eshkim oılamaıdy. Eń aldymen óz jumysyńyzdy aıaqtańyz, keıin ózgelerge kómektesińiz. Sonymen birge ózgelerge «joq», — dep aıtýdy úırenińiz. Sebebi bul tabysqa jetkenderdiń eń basty ustanymy. Siz ózgelerge «joq», — dep aıta almaıtyn bolsańyz, sizdiń tabysqa jetýińiz eki talaı. Men ózgelerge «kómektespe», — dep otyrǵan joqpyn. Kómektesińiz, sebebi ómir – býmerań. Alaıda ózińizge kómektesseńiz ǵana ózgelerge qol ushyn soza alasyz. Mysaly siz óz-ózińizge ishteı jáne syrttaı kómek kórsetip, tabysty kásipkerge nemese qyzmetkerge aınalsańyz, ózgelerge kómektesýińiz jeńilirek ári kóbirek bolady. Sonymen birge sizdi paıdalanatyn adamdar da bolady. Osyny da esten shyǵarmańyz. Kómek kórsetińiz, biraq únemi emes.

Siz eshqashan barlyq adamǵa unaı almaısyz. Bul – aqıqat. Qaı kezde de sizdiń ómirińizge aralasyp, kerek emes jerge óziniń orynsyz pikirinin syn retinde tyqpalap otyratyndar tabylady. Sondyqtan kópshiliktiń pikirine mán bermeńiz. Ózińiz durys dep esepteıtin joldy tańdańyz, ishki túısigińizge senińiz. Naqty aıtqanda, júrek qalaýyńyzdy oryndańyz, sebebi júregińiz sizdi eshqashan aldamaıdy.

Qoǵam, úkimet, ata-ana, jalpy aıtqanda álem sizdiń jamaýyńyzdy jamaýǵa mindetti emes. Siz ózgelerge kómek kórsetýińiz múmkin. Biraq ózińiz úshin. Siz kómektesken adam keleside sizge qol ushyn sozýǵa mindetti emes. Úkimet sizge jumys taýyp berýge, úı salyp berýge mindetti emes. Barlyǵyn óz kúshińizben jasaýyńyz kerek. Sebebi qurbandyqsyz, táýekelsiz eshteńege qol jetkize almaısyz.

Sizdiń ómirińizdi sizden basqa eshkim ózgerte almaıdy. Siz óz ómirińizdi jaqsy jaǵyna qaraı ózgertesiz nemese ózińizdi qurdymǵa tastaı salasyz. Ómirdi ózgertý eshqashan kesh emes ekenin jadyńyzda saqtańyz. Siz óz ómirińizdiń qojasysyz. Eger siz qandaıda bir jetistikti qatty qalap, talpynsańyz, mindetti túrde qol jetkizesiz. Múmkin emes dúnıe joq, bul ómirde bári múmkin.

Tizimdegi erejelerdi kúndilikti tańerteńgisin oıana sala oqyp júrińiz. Sonda siz jetistikke jetesiz. Senińiz... Úmittenińiz... Armandańyz... Armandar oryndalady!