Ekinshi dúnıejúzilik soǵys jyldarynda mynadaı jaǵdaı bolypty. Nemister tutqynǵa túsken polák qyzdaryn ishki Germanıaǵa alyp ketedi. Ol qyzdardyń ary taza, pák eken. Buny bilgen fashızmniń ıdeologtary: «Bul halyqty jeńý qıyn bolar, óıtkeni, qyzy arly bolǵan halyqtyń jigiti namysshyl keledi» degen eken. Namysshyl jigit ólimnen qoryqpaıdy, ólimnen qoryqpaǵan adam jeńilmeıdi. Ólermendiktiń ar jaǵynda namysshyldyq ja­tyr. Namysshyldyqtyń ar jaǵynda arlylyq jatyr. Al, endi osynshama en baılyqtyń ústinde otyrǵan qazaqty qurtýdyń eń tóte joly – aryn alý. Ol úshin qyzyn buzbaq kerek.

Qazaq «qyzǵa qyryq úıden tyıý» deıdi. Tápsirlep aıtsaq: qyz qyryq úıdiń bireýiniń ǵana balasy. Qalǵany kóldeneń qaımana halyq. Iaǵnı, qyz uıaty – qaýymnyń namysy. Qyz aby­roıyn qorý, qorǵaý – barshaǵa mindet. Qorý, qyzǵaný ózine aıaýly bolǵan dúnıeni ózgege qımaǵandyqtan bolatyn sezim. Bireý bireýden ataqty, aqshany, baqty qyzǵanady. Bul – pendeshilik. Al elin, jerin, qyzynyń aryn qorý, ol – azamattyq!

Taǵy bir áńgime aıtaıyn. Bir kóztanysym shaǵyn jıynda otyryp alyp, shetelde oqıtyn súıikti qyzynyń patrıottyǵyn jyr qyldy. Ol qyz Eýropadaǵy turyp jatqan páteriniń qabyrǵasyna Qazaqstannyń kartasyn ilip qoıady eken. Elimizdiń týyn jazý ústeline ornatypty. Qaq tórine Eltańbany qondyrypty… Jýyqta ǵana ardaqty ákesinen qamshy, dombyra, sha­pan suratyp alypty… Tańerteń kózin uıqydan ashar-ashpastan Ánurandy qoıyp jiberedi eken. Qysqasy, dastarqan basyndaǵylar jylaýǵa shaq qaldy. «Osyndaı qyz ósirgen sizderge rahmet, oı, bárekeldi!» desip jatyrmyz. Aramyzdaǵy bireý turyp «qyzyńyz qaı kýrsta?» dep qaldy. «Bitirgen», – dedi meniń kóztanysym. «Endi elge kelmeı me?». «A, chto ona zdes poterála?» – dep shorshyp túspesi bar ma?

Aıtýynsha, onyń «dana» qyzy mundaı me­sheý jurttyń mańdaıyna syımaıdy eken. Onyń jıǵan biliminiń qadirin tanýǵa qazaqtyń óresi jetpeıdi…taǵysyn-taǵylar. Mine, patrıotızm jaıynda keıbir qandastyń túsinigi osyndaı.

Momyn Jyrshy