QR IDM Azamattyq avıasıa komıteti men Ózbekstannyń avıasıa ákimshiliginiń jáne eki el áýe kompanıalarynyń kelissózderiniń nátıjesinde áýe reısteriniń sanyn arttyrý týraly kelisimge qol jetkizildi, dep jazady Qamshy.kz aqparat agenttigi.  

«Eır Astana» áýe kompanıasy 2017 jyldyń jeltoqsan aıynan bastap Ózbekstanǵa qatynaıtyn reısterdiń sanyn kóbeıtýdi josparlap otyr.

Kompanıa bıylǵy 2 jetoqsannan bastap Almaty – Tashkent baǵyty boıynsha áýe reısti aptasyna 6-dan 7 reıske deıin jetkizedi. Endi, jeksenbi kúni de osy baǵytqa bir reıs oryndalady. Iaǵnı, Almaty-Tashkent baǵytyna kúndelikti ushatyn bolady. Al 3 jetoqsannan bastap Astana – Tashkent baǵyty boıynsha áýe reısti aptasyna 3-ten 4 reıske deıin jetkizedi. Bul baǵyt boıynsha senbi kúni de ushýǵa múmkindik bolady. 

«Ózbek áýe jelileri» áýe kompanıasy Qazaqstanǵa myna baǵyttar boıynsha áýe reısterin kóbeıtedi: 2017 jyldyń 4 jeltoqsanynan bastap Tashkent – Almaty baǵyty boıynsha aptasyna 6-dan 7 reıske deıin jetkizedi. Iaǵnı, dúısenbi kúni de Tashkentten Almatyǵa ushyp kelý múmkindigi jasalady. Sonymen qatar, 2018 jyldyń naýryz aıynan bastap áýe reısi Tashkent – Astana baǵyty boıynsha aptasyna 3-ten 4 reıske deıin jetkiziledi. Tashkentten Astanaǵa jeksenbi kúni de ushyp kelýge bolady. 

Nátıjesinde, elder arasyndaǵy ushýlardyń jalpy sany aptasyna 22 reıs bolady. Osylaısha, jolaýshylar Almatydan Tashkentke kúnine eki ret jáne Astanadan kún saıyn usha alatyn bolady. Bolashaqta Samarqand, Buhara jáne Úrgenish qalalaryna reıster ashý josparlanyp otyr.