Ketrın (esimi ózgertilgen) dos dep sanaǵan adamnan qorlyq kórdi. Eki jylǵa jýyq ýaqyt tanıtyn adamy ony zorlap, Ketrın odan júkti boldy. Jábirlenýshi BBC jýrnalısine nelikten balany dúnıege ákelgenin jáne qazir balasynyń kózine nelikten qaraı almaıtynyn túsindirdi.
Men eki balasy bar jalǵyz basty anamyn. Meni zorlaǵan adamdy tanımyn. Ortaq dostarymyz arqyly tanystyq. Aralasyp júrgenimizge 2 jyl bolǵan. Aramyzda dostyqtan ózge eshteńe bolmady.
Men bastapqy kezde-aq oǵan ekeýimizdiń aramyzda mahabbat bolý múmkin emes ekenin aıtqanmyn.
Onyń úıine bardym. Dosym birden ózgerip ketti. Onyń óte jaqyn kelgenin baıqadym. Qashqaqtap edim, maǵan kúsh kórsetti. Barlyǵy óte tez boldy.
Dosymnyń bul áreketine tańǵalǵanym sonshalyq, eseńgirep qaldym. Oǵan toıtarys berýdiń ornyna bir orynda qatyp qaldym.
Ol eshteńe aıtpastan úıden shyǵyp ketti. Kóligine otyryp ketip qaldy.
Men úıge keldim. Barlyq denem aýyryp turdy. Jaǵdaıymnyń qanshalyqty aýyr ekenin ol ýaqytta bilmedim. Úıge tezirek jetkim keldi.
Men balalarymdy kórshimmen qaldyrǵanmyn. Úıge kelgende qýanyshyma oraı balalar uıyqtap jatty. Men eshkimge eshteńe aıtpadym. Sebebi, adamdar meni kinálaıtyndaı kórindi.
Zorlaǵan adamdy tanıtyn bolǵandyqtan polısıa ony zorlaýǵa jatqyzbaıdy dep oıladym. Sondyqtan shaǵymdanbadym.
Kelesi kúni men odan nelikten bulaı jasaǵanyn bilgim keldi. Ol mardymdy jaýap bermedi. Esinde eshteńe joq ekenine sendirgisi keldi. Biraq zorlaǵanyn joqqa shyǵarmady.
Jasandy túsik jasamaımyn dep sheshtim. Jasandy túsikke eshqandaı qarsylyǵym joq. Alaıda sábıdi óltirsem jaǵdaı odan beter ýshyǵatynyn túsindim. Balamdy óltirdim degen oımen ómir súre almaýshy edim.
Maǵan qoldaý kórsetken eshkim bolmady. Meniń jalǵyz basty ana ekenimdi biletin áıelder meni kinálady. Alaıda olarǵa eshteńe túsindirip, aqtalmadym. Sebebi zorlanǵanymdy ózgeler bilgenin qalamadym. Balam dúnıege kelgende oǵan zorlaýdyń nátıjesinde paıda bolǵan bala sekildi qaraǵanyn qalamadym.
Balamdy alǵash qolǵa alǵanda onyń kózi ákesine tartqanyn baıqadym. Sol ýaqytta denem túrshigip ketti. Qandaı sumdyq jaǵdaıdy bastan ótkergenimdi túsindim, sezdim.
Balam óskende kózi ákesiniń kózinen aýmaı qaldy. Bastan ótkergen sumdyq jaǵdaıda esimde qalǵany zorlyqshynyń kózderi edi. Bul jaǵdaı balammen qarym-qatynasyma esh áser etpedi. Men balamdy janymnan da artyq jaqsy kóremin.
Ákesi týraly kóp suramaıdy. Tek mektepte «Meniń otbasym» degen taqyrypta shyǵarma jazǵanda jáne ákesiniń fotosyn suratqanda qıyndyqtar boldy. Sol ýaqytta balama túsindirýge týra keldi.
Ketrın balany dúnıege ákelgenine eshqashan ókinbeıtinin aıtady...
Balany dúnıege ákelip ony jaqsy kórmesem jáne oǵan qamqor bola almasam meniń tarapymnan úlken qatelik bolýshy edi. .
Qatty jalǵyzsyraıtyn, qınalatyn kezderim bolady. Basymnan ótken jaǵdaı meniń ómirime keri áserin bermeı qoımady. Desek te, onyń nátıjesinde meniń balam dúnıege keldi.
