Sońǵy kezderi qan aldyrtýmen medısınalyq saýaty joq adamdar aınalysa bastaýyna baılanysty hıdjamanyń qaýiptiligi kúsheıdi. Ásirese, din jolynda júrgender bul mańyzdy isti qosymsha tabys kózine aınaldyrypty, dep habarlaıdy Qamshy.kz aqparat agenttigi kazislam.kz saıtyna silteme jasaı otyryp.
Al qate jasalǵan tilikten adam tipti ólip ketýi múmkin. Soraqysy sol kásiptiń bul túrimen aınalysqandar ne memlekettik oryndardyń, ne ımamdardyń baqylaýynda emes. Nurbol Nıtqalıev kúnine on shaqty adamnan qan alady. Klıentti dál osylaı úı jaǵdaıynda qabyldap, em júrgizedi. Iaǵnı, hıdjama kezinde deneni almaspen tilip, qandy soryp alady. Medısınalyq bilimi joq bolsa da óz betimen hıdjama jasaýdy úırenip, apparatyn satyp alypty. Buryn ımamdyq qyzmet atqarǵan emshi, durys jasalmaǵan dene tilikteri adam ólimine de aparýy múmkin deıdi. Osylaı dep qan alýdyń qaýiptiligin aıtqanymen, tabys kózine aınaldyrǵan kásibin ózi tastamaq emes.
Nurbol Nıtqalıev, emshi: – Hıdjama durys salynbasa, durys kesilmese, núktelerge durys qoıylmaıtyn bolsa, sózdiń shyny kerek adam ólip ketýi de múmkin. Keıbir baýyrlar bankalardy basynan aıaǵyna deıin toltyryp salyp tastaıdy. Adamnyń jaǵdaıyna baılanysty onyń basy aınalyp, talatyn bolsa bankalardy alam degenshe adam komaǵa ketip qalýy múmkin. Bir qyzyǵy qatelik ketse adam ólimimen aıaqtalýy múmkin emdi qazir kez kelgen adam jasap júr. Ol úshin tilik salýdy úırenip, kásipker bolyp tirkelse jetkilikti. Bul emdi árkimniń jasap júrgenine din qyzmetkerleri de alańdap otyr.
Nurlybek Kúzenbaev, Aqtóbe oblystyq «Nur ǵasyr» meshitiniń naıb ımamy: – Hıdjama alatyn adamdy biz taǵaıyndamaımyz, ony qadaǵalamaımyz. Kez kelgen nársede óz mamanyna barý kerek. Hıdjamany da kez kelgen adam alýǵa bolmaıdy. Al bul jaǵdaıdyń qaýipti ekenin aıtqan dárigerler dindarlar jasaıtyn hıdjamaǵa túbegeıli qarsy. Svetlana Aǵzamova, dáriger: – Úı jaǵdaıynda qan aldyrýǵa biz qarsymyz. Emdik jaǵynan góri organızmge keri áserleri kóp. Ashyq bolǵannan keıin ol jerge birinshiden ınfeksıa jınalady. Qanǵa ınfeksıa túskennen keıin ártúrli asqynýlar bolýy múmkin. Medısınadan bólek jerde qan aldyryp, em jasamaǵan durys. Adam boıyndaǵy qandy soryp, em júrgizetinderdiń deni áleýmettik jeli jáne tamyr tanystary arqyly emshi atanǵandar. Sondyqtan, mundaı adamdardyń júrgizgen emine jaýapkershilik almaıtyny aıan.
