Almatyda azyq-túlik baǵasynyń qymbattaýyna esh sebep joq. Qalalyq Aýyl sharýashylyq basqarmasynyń basshylary osylaı dedi. Aıtýlarynsha, áleýmettik mańyzy bar taýarlardyń qory da jetkilikti. Osy kúni qoımalarda 2 myń tonnaǵa jýyq azyq-túlik bar eken. Al, bazardaǵy baǵany qadaǵalaýǵa arnaıy top bólingen. Eger, taýardyń qunyn sebepsiz kótergender bolsa, olarǵa aıyppul salynady.
Sońǵy 3 aıda azyq-túlik quny shamamen 1 paıyzǵa ósipti. Máselen, sıyr eti men sút ónimderi qymbattaǵan. Kerisinshe, qoı eti, kartop, pıaz jáne qyryqqabattyń quny túsken. Mereke qarsańynda azyq-túlik baǵasy turaqty bolady. Qalanyń aýyl sharýashylyq basqarmasy áleýmettik mańyzy bar taýarlardyń qunyn kóteretinderge qatań shara qoldanbaq.
«Biz kún saıyn baǵalarǵa monıtorıń jasap otyramyz. Ásirese, kúndelikti satyp alynatyn taýarlarǵa. Sonymen qatar, baǵalardyń kóterilip ketpeýin qadaǵalaımyz», - dedi Almaty qalasy aýyl sharýashylyǵy jáne Veterenarıa basqarmasy basshysynyń orynbasary Qarlyǵash ÁBDİJAPPAROVA.
Áleýmettik taǵam túrleriniń qunyn satýshylar sebepsiz kótere almaıdy. Olaı bolǵan jaǵdaıda zań aldynda jaýap berýge týra keledi. Kartop, pıaz, sábiz, nan jáne qurǵaq ónimderdiń baǵalaryn quzyrly organ qyzmetkerleri kúndelikti baqylap júredi. Eger, zań buzýshylyq anyqtalsa, birden aıyppul salynady.
«Biz seriktester men jetkizýshiler arasynda kelisimshartqa otyrdyq. 15-shi qarashadan bastap jańa jylǵa deıin olar baǵany kótermeıdi. Biz satyp alýshylarǵa barynsha arzan baǵada satýǵa tyrysamyz. Ásirese, jumyrtqa, makoron, nan, kartop, qyzylsha syndy taǵam túrleriniń qunyn kótermeımiz», - dedi "Bólshek saýda jelileri" fılıalynyń dırektory Irına HROMOVA.
Bul Almaty mańyndaǵy qoımalardyń biri. Munda elimizdiń ár óńirinen jetkizilgen qurǵaq ónimder saqtalǵan. Naryqtaǵy áleýmettik mańyzy bar zattardyń quny qymbattaǵan kezde, osyndaǵy azyq-túlikter birden saýda ortalyqtaryna jóneltiledi. Bul óz kezeginde baǵanyń sharyqtap ketpeýine septigin tıgizedi.
«729 mıllıon teńgege 3 myń 170 tonna azyq-túlik ónimderi alyndy. Búginge deıin onyń 1273 tonnasy satylymǵa shyǵaryldy. Qorporasıa tapshylyq pen baǵanyń kótterilýin boldyrmaý úshin qurylǵan. Bul jerdegi taýarlar qaladaǵy iri saýda oryndaryna jóneltiledi», - dedi «Almaty» ÁKK AQ bólim jetekshisi Azız TURǴANOV.
Áleýmettik taǵam túrleri qaladaǵy 9 iri saýda jelisi arqyly satylady. Biraq, olar oıyna kelgen qundy emes, memarandýmda kórsetilgen baǵalardy qoıady. Qazir bul tamaq ónimderiniń quny kópke qoljetimdi. Sonymen qatar, meıram qarsańynda keıbir saýda ortalyqtary jemis-jıdekterge jeńildikter beredi. Bul da baǵa turaqtylyǵyn saqtaýǵa kómektesedi.
Áleýmettik mańyzy bar taýarlardyń túrleri 19 eken. Olardyń baǵasyn ósirmeı, bir qalypta ustap turýǵa apta saıyn ótkiziletin jármeńkeler de septesedi. Osy ýaqytqa deıin 500-den kóp jármeńke uıymdastyrylypty. Qysqasy, qalanyń aýyl sharýashylyq basqarmasy jáne áleýmettik kásipkerlik korporasıasynyń ókilderi qor jetkilikti, baǵa óspeıdi dep ýáde berdi.
Pikir qaldyrý