Memleket basshysynyń AQSH-qa sapary barysynda qandaı máseleler talqylanýy múmkin jáne qandaı tyń bastamalar jarıalanýy múmkin ekenin Qazaqstannyń Internet qaýymdastyǵynyń prezıdenti Shavkat Sabırov aıtty, dep jazady Qamshy.kz aqparat agenttigi.

Qazaqparattyń málimetine súıensek, Sabırov Elbasynyń AQSH-qa sapary barysynda talqylanýy múmkin negizgi eki taqyrypty atady.

«Jalpy, osy sapardan eki taqyrypty bólip alýǵa bolady. Birinshi bóligi Memleket basshysynyń ekijaqty kezdesýlerin qamtıdy, onyń ishinde AQSH Prezıdenti Donald Tramppen kelissózder eskerilip otyr. Osy oraıda Qazaqstan men AQSH arasyndaǵy qatynastarǵa baılanysty bolady. Ekinshi bóligi bizdiń Prezıdenttiń BUU Qaýipsizdik Keńesi otyrysyna qatysýyn qamtýda. Bul mańyzdy sharaǵa álem elderinen laýazym ıeleri keledi dep kútilýde.  Ekijaqty qatynastarǵa toqtalsaq, bul rette Qazaqstan Ortalyq Azıada kóshbasshy rólde ekenin anyq. Sonymen qatar Aýǵanstan máselesin sheshýde de elimiz mańyzdy isterge bastamashy bolyp otyr. Sońǵy 10-15 jylda aýǵan máselesi barsha álemdik qoǵamdastyqty alańdatyp otyrǵany belgili. Sondyqtan bul taqyryptaǵy ońtaıly sheshimderde Qazaqstannyń belsendigi artýy yqtımal. Óıtkeni Qazaqstannyń bitimgerlik bastamalary álemge burynnan belgili, sondaı-aq bul baǵytta jaqsy nátıjeler barshylyq. AQSH-tyń aldyńǵy qatarly BAQ-tarynda jarıalanǵan maqalalarǵa súıensek, Qazaqstan men Ózbekstan Aýǵanstan problemalaryn sheshýde eleýli ról atqarýy múmkin», - dedi Sh. Sabırov.

Onyń sózine qaraǵanda, BUU Qaýipsizdik Keńesinde Memleket basshysynyń sóılegen sózinde qaýipsizdikke qatysty elimizdiń bitimgerlik bastamalary jarıalanýy múmkin. Sonymen qatar ıadrolyq qarýsyzdaný problemalary da bar. Sebebi oǵan Soltústik Koreıadaǵy jaǵdaı qosylyp otyr.

Aıta keteıik, Memleket basshysynyń AQSH-qa resmı sapary 16 qańtarda bastalady. Sapar aıasynda AQSH prezıdenti Donald Tramppen, sonymen qatar resmı ári isker toptardyń ókilderimen kezdesý josparlanǵan. N. Nazarbaev BUU Qaýipsizdiń Keńesi otyrysyna qatysady dep kútilýde.