Advokat Djohar Ótebekov qazaq arnaıy qyzmetteriniń messendjerlerdegi hattarǵa qol suǵa almaıtynyn aıtty. Bul týraly ol óziniń Telegram kanalynda jazdy.

– Bireýdiń qudyretine senýge qumartyp turady ekensizder! Men jazda aqparattyq qaýipsizdikke arnalǵan halyqaralyq semınarǵa qatystym. Telegram, Signal, Viber, Facebook Messenger men WhatsApp jelileri mátindik habarlamalardy burynnan ekijaqty shıfrlaýmen qorǵaıdy. WhatsApp-tan ózge barlyǵynda serverlerde saqtalmaıtyn QUPIA chattary jáne bar. Aıryqsha senimdilik úshin solardy qoldaný kerek.

Áıtpese, teorıalyq turǵydan qaraǵanda, arnaıy qyzmetter sizderdiń jazysqan hattaryńyzdy serverlerden alýy múmkin. Biraq óz basym amerıkalyqtardyń arnaıy qyzmetterge ondaı aqparat beretinine kúmándanamyn. Naqtylaı keteıin. Iá, terorızmmen kúres degen uranmen aqparat berýi yqtımal, alaıda ondaıdy estimeppin. Jaqynda end-to-end shıfrlaý júıesi Skype-ta da paıda bolady.

Muny óz tájirıbemnen dáleldeı alamyn. Men nebir mańyzdy qylmystyq isterdi kórdim, biraq messendjerlerdiń buzylǵan mysalyn kezdestirmeppin.

Ózińizge qarsy qoldanylýy múmkin qońyraýlarǵa joǵaryda aıtylǵan 5 messendjerdiń bireýin paıdalanyńyz. Olardyń tyńdalǵanyn da eshqashan estimeppin.

Men WhatsApp-tan alynyp, basyp shyǵarylǵan messendjerlerdegi hat almasýlardyń tom-tom  skrınshottaryn kórdim. Kúshtik qurylymdarǵa sizdiń messendjerińizdi buzyp jatýdyń qajeti joq.

Organdarǵa sizdi jeke chattaǵy suhbattasyńyz nemese toptyq chattaǵy qatysýshylar ustap beredi. Búkil qylmystyq ister – jalǵan aqparat taratý, terorızmdi nasıhattaý, bopsalaý, alaıaqtyq jáne t.b. – solardyń arqasynda jınalǵan.

Aldymen aınalańyzǵa jáne tilińizge, sodan keıin ǵana gadjetterińiz ben paróldaryńyzǵa abaı bolyńyz, – dedi advokat.