Elimizde bıylǵy jyldyń qańtar aıynan bastap eń tómengi jalaqy kólemi 28 myń 284 teńgeni qurapty. Osy mardymsyz jalaqymen kúneltip otyrǵan januıa kelesi aılyqqa deıin qalaı jetedi degen saýalǵa jýrnalısik áýestikpen jaýap izdep, eńbekaqymdy qolǵa alǵannan keıin 28 myń 284 teńgeni bólek aldym da bir aılyq kúnkóris josparyn jasadym.
Aýylda anam men ákeme erkelep ósken qazaqtyń qyzymyn. Jasyratyny joq ne ishem, ne jeımin degen ýaıym mende bolǵan emes. Búginde ata-anamnan jyraqta júrsem de qarjy tapshylyǵyn áli kúnge sezingen kezim joq. Semeıge kelgeli ózge dostarym sekildi jalǵa páter izdep sabylǵan joqpyn. Áli kúnge ájemniń úıinde aǵa jeńgemmen birge turatyndyqtan páter aqy men komýnaldyq qyzmetter úshin de shyǵyndalmaımyn. Jumys ornym úıge jaqyn bolǵandyqtan, jol aqyǵa ketetin 160 teńgem de qaltamda qalady. Túski asty da úıden tasımyn. Tek kúndelikti nan pulǵa ketetin usaq-túıek shyǵyndarymdy eseptep, eki aptaǵa kúndelik jasap kórdim. Sonymen:
1 qańtar. Jańa jyl qarsańynda úıdegilerdiń bári Astanaǵa jol tartty. Ázirshe úıde ózim bı, ózim qojamyn. Merekeden qalǵan tátti-dámdige toıyp aldym da, qurbyma jol tarttym. Jolaı 1550 teńgege tort aldym. Jol aqysyna 160 teńgege shyǵyndaldym.
2 qańtar. 90 teńgege bir bólke qara nan, 500 teńgege jarty keli maı aldym.
3 qańtar. 180 teńgege bir lımon ólshetip alyp, tumaýdan emdeldim. 250 gramdyq «Pıala» markaly shaıy úshin 690 teńge tóledim.
4 qańtar. Jumysym kompútermen baılanysty bolǵandyqtan, kózim kópten beri mazalap júr. Ózim tirkelgen aýrýhanada medısınalyq kartam joǵalyp ketken. Onyń ústine bul aýrýhanada kóz dárigeri de tapshy bolyp shyqty. Keńes alý úshin naýqastar bir aı buryn jazylyp qoıady eken. Amal joq, aqyly medısınalyq kómekke júgindim. Oftolmologıalyq ortalyqqa barsam, dárigerdiń qabyldaýy 4000 teńge bolyp shyqty. Qosymsha analız úshin 350 teńge tóledim. Kóz qysymym qalpynda, dáriger alergıa degen dıagnoz qoıdy. 1550 teńge Kombınıl-dýo, 910 teńge gıdrobalans, 1890 teńgege ırıfrın dárilerin aldym. 160 teńge jolǵa ketti.
5 qańtar. Telefonymda birlik taýsyldy. 790 teńgege «suhbat +» tarıfine qosyldym. Bul tarıf te jańa jyldan bastap 190 teńgege qymbattapty.
6 qańtar. 870 teńgege tomat pastasyn, 355 teńgege 2 keli makaron, 910 teńgege 2 lıtr kúnbaǵys maıyn alyp, tońazytqyshymdy qaltamdaǵy qarjyma sáıkes toltyryp qoıdym. Sórede samsap turǵan shujyqtarǵa kózim túsip ketse de, ózimdi toqtattym.
7 qańtar. 1540 teńge pıaz, oramjapyraq jáne kartopqa ketti.
8 qańtar. Bul kúni sútke 350 teńge, nanǵa 60 teńge jumsadym.
9 qańtar. Anam men ákem jibergen et taýsyldy. Amal joq aı sońyna belokty dıeta ustanýǵa týra keledi. 260 teńgege on jumyrtqa aldym.
10 qańtar. 195 teńgege botqa krýpasyna , 60 teńge nanǵa ketti.
11 qańtar. 135 teńgege 5 jumyrtqa, 255 teńgege «sýshkı», - dep atalatyn qytyrlaq nan aldym.
12 qańtar. 345 teńgeni aıranǵa, 60 teńgeni nanǵa, 500 teńgeni túski asqa tóledim.
13 qańtar. 650 teńgege shash jýatyn sý sabyn (shampýn), 210 teńgege sabyn, 380 teńgege krem aldym. (Myna túrimmen sán salondarynyń esiginen de qaraı almaıtyn túrim bar.)
14 qańtar. Búgin jeksenbi. Bir nan men sút aldym da, úıde jatyp demaldym. Qydyrýǵa shamam joq.
15 qańtar. Qyrsyq shalǵanda eski etigimniń tabany qaqqa bólindi. Eń az jalaqyǵa kúneltetinder úshin baǵasy tıimdi «Jansaıaǵa» bazaryn betke aldym. Satýshy ápkemmen táýir saýdalasyp, bir aıaq kıim úshin 8 myń teńgege shyǵyndaldym. Juqa bas kıimimnen de sýyq ótip barady. Alaıda lımıt shekteýli. Sońǵy tıynymdy sanap avtobýsqa otyrdym.
Dámdi taǵam jegip kep silekeıim shubyryp-aq keledi. Etigim aman bolǵanda, áli bir apta toıyp tamaq isher me edim? Maıǵa qýyrylǵan makaronnan ábden mezi bolsam da ózimdi «shydaý kerek», - dep qamshylap, dıvanǵa qısaıa kettim.
Bir kezde oıda joqta ákem men anam kelip, aýyldan ákelgen qazy-qartasyn, sary maıy men kilegeıin, sary baýyrsaǵyn aldyma tosty. Qazy-qartany kórgende anam men ákemdi saǵynǵanym da esimnen shyǵyp ketkendeı...Áıteýir qýanyshymda shek joq.
Oıanyp ketsem, túsim eken. Sonymen 28 myń 284 teńge tek eki aptaǵa jetti. Ash adamnyń túsine tamaqtan basqa ne kirsin?
Jadyra Tólegenqyzy
