Dalada bala jata ma? Iá, jatady eken!.. Túsip qalǵan shanadan? Joq, anadan!.. Túsip qalǵan?.. Joq, ádeıi tastaǵan! Toǵyz aı boıy kóterip kelip, aıy-kúni jetkende, tolǵatyp turyp tas qursaǵyn keńitken ananyń tas emshegi jibimeı jatyp tastaı salǵany qalaı?! Eski jyldyń enshisinde qalsa da Atyraýdaǵy Nursaıa móltek aýdanynan tabylǵan tastandy sábı týraly aqparat eriksiz kókeıge san túrli saýal týdyryp, sanadan ketpeı qoıdy.
Oqıǵa bylaı órbigen edi. Túngi saǵat on ekiniń shamasynda esik aldyna shylym shegýge shyqqan №64-shi úıdiń turǵyny sol mańaıdaǵy qoqys jáshiginiń ishinen mysyqtyń mıaýlaǵanyna uqsas bir daýystyń shyqqanyn aıtady. Jaqyndap baryp qarasa, qoqys paketiniń ishinen typyrshyǵan bir náseni kóredi. İshin ashsa, shyryldaǵan shaqalaq eken! Shoshyp ketken kýáger kindigi de kesilmegen sábıdi kúrtesine orap alǵan kúıi úıine júgiredi. Toǵyz aılyq besinshi ulyn baǵyp-qaǵyp júrgen áıeli de álgi sábıdi analyq mahabbatpen qushaǵyna alyp jylytady. Dereý 102-ge habarlasyp, polısıa men jedel járdem keledi. Keıin dárigerler balanyń kindigin kesip, oblystyq aýrýhanaǵa alyp ketedi. Bolǵan oqıǵa boıynsha is qozǵalyp, sábıdiń anasy izdestiriledi. Al úı-kúıi bar kýáger taýyp alǵan balany óziniń bes ulymen qosa asyrap baqqysy keletinin aıtqan. Sóıtip bes uldan keıin bir qyz bolsa eken degen tilegi izdemeı-aq tabyla ketti.
Bul endi kórer jaryǵy bar jannyń jazmyshy. Al kózge kórinbeı myna dúnıeniń esigin asha sala ana dúnıege attanyp ketip jatqandary qansha ekenin kim bilsin?! Buryndary basqa qalalarda bolǵan bundaı jaıttar endi óz qalamyzda oryn aldy. Erteń taǵy qaıtalanbasyna kim kepil? Qudaı saqtasyn, árıne degenmen adam balasy týmysynan umytshaq bolǵasyn da eskertip otyrýdyń aıyby joq dep bilemin. Onyń ústine qyzǵa qyryq úıden tyıym bolsa kez kelgen aqparat quraldary da tek aqparat berip qana qoımaı tárbıe quralyna aınalsa nur ústine nur bolar edi. Osy oqıǵaǵa qaıta oralǵan sebebim de sol. Alda aqpan aıy. Osy aıda áligi «Valentın kúnin» toılaıtyndar da tabylady. Joǵarydaǵydaı qoǵamnyń kóleńkeli tustary osyndaı kúnderdiń jemisi deýge bolatyndaı.
Iá Alla adamǵa ómir bereıin dese, ony eshkim óltire almaıdy. Kimge ólim jibereıin dese de ony eshkim aman alyp qala almaıdy. Jergilikti baspasózder de, áleýmettik jeliler de jarysa jazdy bul oqıǵany. «Kókek anany aıamaý kerek, jazalaý kerek», - dep jurt ta daýryqty. Zań oryndary da qylmyskerdi izdestirip jatty.
Desek te ol balany kúlge aýnap tappaǵan shyǵar. Olaı bolsa osy jaǵdaıǵa jetkizgen erkekti de taýyp, jazalaý kerek emes pe?.. Osyndaıda Qunanbaıdyń Qodar men Qamqaǵa zınaqorlyǵy úshin kesken úkiminiń qadirin túsinýge bolady eken... Otbasynyń ǵana emes, Otannyń qamy, ult bolashaǵy úshin barǵan eken ǵoı jantúrshigerlik jazanyń oryndalýyna dersiń ishteı. Imansyzdyq óz aldyna ata-ana tárbıesindegi ketken kemshiligin bylaı ysyryp qoıyp, bolary bolyp, boıaýy sińgen uıatty isi úshin óz qyzdaryn ózderi qarǵap-silep, úıden qýyp, shirigen jumyrtqaǵa teńeıtinin qaıtersiń. «Oıbaı, elge ne betimizben qaraımyz», - degen jalǵan namys kimge kerek? Osydan keıin ózi de ne isterin bilmeı psıhologıalyq kúızeliste turǵan boıjetken «uıattan ólim kúshti», - dep ne sýısıd jasaıdy, ne sábıin qoqysqa, ájethanaǵa, árkimniń esik aldyna tastaı salyp, tasbaýyrlyqqa, qatygezdikke barady. Mine bul da bizdiń uıat degendi durys túsine almaýymyzdan bolady.
Qazirgi kezde balalardyń kóbi erte eseıgen.Oıy da, boıy da, túıeden túskendeı qyp sóılegen sózi de, qadalyp qaraǵan kózi de ózińmen teń dárejedegi balany bala deý qıyn. Sondyqtan olarmen dosyńdaı kórip, jıi syrlasa otyryp, jan dúnıesine jıi úńilý kerek. Sen sińirmegen tárbıeni jasóspirim ne kóshe kezip júrgen qańǵybas bir dossymaǵynan, ne sany bar da sapasy joq kez kelgen áleýmettik jelilerden alady. «Qansha jerden jańylmaıtyn jaq joq, súrinbeıtin tuıaq joq», - desek te bala úshin ananyń orny bólek. Tastandy balaǵa da bireýler qushaǵyn ashar, baýyryna basar. Báribir onyń júregi tiri jetim bop jaralanady, týmaı jatyp tastandy bop tańbalanady.
Gúlmıra Súıekenova; Atyraý qalasy
