Qazaq eli azattyǵyn alyp, óz qotyryn ózi qasyǵaly beri alty ret jazǵy Olımpıada oıyndaryna qatyssa, dál sonsha ret qysqy Olımpıadada baq synapty. El sportshylary jazǵy oıyndardan bar jıyntyǵy 68 medal alǵan bolsa, qysqy sport túrlerinen nebári jeti-aq ret júldege ilingen. Pavlodar oblysynyń sportshylary jazǵy Olımpıadaǵa jerdiń ústimen baryp astymen qaıtady. Óıtkeni, 22 jylda Kereký óńirinen qatysqan sportshylardyń eshqaısysy júlde alyp kórgen joq. Ár joly úkilep qosyp, úmitpen attandyryp jibergenimizben saldary sýǵa ketip jeńilip qaıtady. Qysqy Olımpıada da jetisip júrgenimiz belgili. 1998 jyly Japonıanyń Nagano qalasynda ótken aq oıyndarda Lúdmıla Prokasheva kónkımen júgirýden qola medaldi qorjynǵa salǵan edi. Sodan beri baqandaı 20 jyl ótse de medal degen nárse Kerekýlikterdiń kózinen bulbul ushqan.
Endi mine, Koreıanyń Phenchhan qalasynda jalaýy kóteretin aq Olımpıadaǵa da sanaýly kúnder qaldy. Pavlodar oblysynyń sport basqarmasy bıylǵy dodaǵa Kereký óńirinen qatysatyn sportshylardyń da tizimin jarıalady. Jasyratyny joq, alty aı qys astynda jatatyn aımaq bolǵanymyzben bizde qysqy sport túrleri asa damymaǵan. Qary joq óńir ońtústikten Janbota Aldabergenova sıaqty frıstaılshylar shyǵyp jatqanda «bizdikiler qaıda qarap otyr?», - deısiń taǵy. Aqyry ózderiniń qolynan kelmegen soń bizdiń sport basqarmasyndaǵylar ózge óńirden kelgen legıoner sportshylarǵa úmit artatyn bolypty. Pavlodardan 12 sportshy qatysatyn bolsa solardyń tórteýi kelimsekter. Qanshama sýyq aımaqta turǵanymyzben «short-trek» degen sport túri Pavlodarda buryn sońdy bolmaǵan edi. Koreıaǵa bizdiń oblystyń atynan tórt birdeı short-trekshi attanǵaly jatyr eken. Olar: Denıs Nıkısha, Erkebulan Shamýhanov, Olga Tıhonova jáne Kım Iong A. (Sońǵysy naǵyz káris-aý – avtor). Buǵan deıin Qostanaı oblysy atynan qatysyp júrgen bul sportshylar bıyl Pavlodarǵa júlde áperedi dep senim artylǵan. Taǵy da sol úmit. Aıtpaqshy, myqty bıatlonshy qyzymyz Arına Pantova Reseıge ketip qalypty. Jalpy, oblysta kónkı jáne short-trek sporttaryn baıaǵydan-aq jandandyrsa bolatyn edi. Qazir kónkıden Ulttyq qurama bapkeri bolyp ketken Lúdmıla Prokasheva, Pavlodarda bolǵan kezinde bul máseleni kóp kóterdi. Ákimdikte ótken talaı jıyndarda kónkımen jarysatyn jabyq muz aıdynyn salyp berýdi kóp surady. Aımaqtyń ár jolǵy ákimderi bas shulǵyp qana qutylatyn. Dene shynyqtyrý jáne sport basqarmasyn sońǵy úsh ákimniń tusynda basqaryp kele jatqan Marat Aıdashev qulyq tanytpaıdy. Aqyry, jergilikti bılikten kóńili qalǵan Prokasheva Pavlodardan ketip tyndy. 2017 jyl Pavlodar oblysynda «Sport jyly» bolyp jarıalanǵan edi. Bir jyldy sportqa arnaǵan soń kóp úmit kútkenbiz. Ýádeler de boldy. Sport salasyn damytýǵa byltyr 4 mlrd teńge bólindi. Alaıda, kózge kóriner eshteńe joq. «Ana aýlada alań ashyldy, myna aýdanda dop tebildi», onsyz da basqa baǵdarlamalar esebinen atqarylyp jatqan jumystar. Jaqynda sport basqarmasy, «osy jyly óńirde Olımpıadalyq talaptarǵa saı júzý basseıinin salamyz, jeńil atletıka men fýtbol oınaıtyn eki birdeı jabyq manej salamyz, Olımpıadaǵa rezerv daıyndaıtyn sport mektebin salamyz», dep keýde kergen. Basqarma basshysynyń orynbasary Nurlan Esembaevtyń aıtýynsha, basseıinnen basqalarynyń artynda ázirge suraq belgisi tur.
Sonymen, pavlodarlyq sportshylar bıylǵy aq Olımpıadadan medal ala ala ma? Úmitten kúdik basym. Onyń ústine belgili bloger Arshat Oraz, óziniń áleýmettik jelidegi paraqshasynda «Qazaqstan Olımpıadadan medal almaıdy», dep qorqytyp tastady. Ol muny Gracenote kompanıasynyń esebine súıenip jazǵan eken. Degenmen, kim bilsin?!
Esenbek Sanatuly, Pavlodar qalasy
