Almatydaǵy Ulttyq kitaphanaǵa bir jylda 1 mılıonnan astam oqyrman keledi, olarǵa arnalǵan 1,5 myń oryndyq 14 oqý zaly bar. Alaıda kitaphananyń qyzmet kórsetý sapasyna qatysty shaǵymdardy jıi estip jatamyz. Muhtar Seńgirbaı esimdi oqyrman óziniń kóńili tolmaıtyn jaıttardy Facebook paraqshasynda jazypty.

«Shetelde kitaphanaǵa demalyp, ońashada oılanyp qaıtý úshin barasyń. Sóreden kez kelgen kitapty alyp, zalda turǵan skanerlermen skanerlep, úıge alǵyń kelse, taǵy bir qurylǵyǵa oqyrman bıletiń men kitaptyń shtrıhkodyn oqytyp, alyp kete beresiń. Úıge alýǵa bolmaıtyn qundy kitaptar da bolady. Alǵan kitapty tıisti merzimge deıin ótkizý mindetti, bolmasa aıyppul tóleısiń. Ótkizgende de syrtta turǵan bir sańylaýdan salyp jiberesiń, tipti jáshikke sala salasyń. Kitaphanalarda ońasha otyryp oqıtyn bólmeler, toppen birge otyryp daıyndalatyn zaldar bolady. Artyq dybys bolmaý úshin barlyq jerge kovrolan tóseledi. Tipti jalańaıaq júrseń de óz erkiń»,-deıdi ol.

Muhtar Seńgirbaıdyń jazýynsha, Almatydaǵy Ulttyq kitaphana HH ǵasyrdyń sońynda qalyp qoıǵan, munda burynǵy sovet dáýirindegideı oqyrmanǵa degen senimsizdiktiń ıisi ańqyp turady, jańa zaman tehnologıasy adam ıgiligine jumys istemeıtin bir jer bolsa – ol Ulttyq kitaphana.

«Ǵylymı izdenis barysynda ádebıetti meılinshe naqty izdeý, sol taqyrypqa baılanysty eń qajet degen ádebıetterdi sholyp shyǵý óte mańyzdy ekeni belgili. Biraq, Ulttyq kitaphanada ádebıetti izdeýdiń mashaqaty kóp. Birinshiden, sheteldik túgil jergilikti adam qaı jerden neni, qalaı izdeý qajettigin, izdegen kitabyn qaıdan, qashan alatynyn bilmeıdi, dálizde, zaldarda eshqandaı nusqaýlyq joq. Ekinshiden, ádebıet izdeýge arnalǵan kompúterlerdiń birazynda ınternet jumys istemeıdi. Úshinshiden, izdeý júıesi múlde túsiniksiz! Óz basym eki sózden turatyn sóz jazsam, eshteńe taba almadym, tek bir ǵana sózdi jazsań, jalpylama ádebıet shyǵady. Qaptaǵan túsiniksiz qysqarǵan sózder, kitaphanashylarǵa arnalǵan termınder. İzdeý barysynda kitapty alý-almaý máselesin sheshý úshin onyń mazmunyn sholyp shyǵý kerek. Al tolyǵyraq málimetke bassań, taǵy qysqarǵan sózder, kitaptyń bet sany, kólemi (santımetrmen ólshengen) shyǵady, basqa eshteńe joq. «Amalsyz osy bolady-aý» degenderge elektrondy túrde tapsyrys beresiń (Artynan kóp tapsyrys bergenińe ókinesiń).

«Ǵylymı zal» dep belgileseńiz, kitaptaryńyz ǵylymı zalǵa kele qalady dep dámelenbeńiz. Gazet-jýrnaldar merzimdi basylymdar zalyna» baratynyn kitaphanashy eskertken soń, aldymen solardy tez bitireıin dep oıladym. 4 tapsyrystyń bireýi ǵana kelipti. Kitaphanashy kireberiste bergen tildeı qaǵazǵa qansha podshıvka alǵanymdy belgilep, óziniń jýrnalyna da belgi soǵyp, oqyrman bıletimdi alyp qaldy. Bıletti qaıtaryp almaıynsha, basqa zaldardaǵy kitaptardy ala almaısyń», - dep qynjylady ol.

Onyń sózinshe, kitaphana qyzmetindegi bas qatyrarlyq basty problema – tapsyrysty bir saǵat kútý. Tapsyrystyń keletinine  de kepildik joq.

«Bizdiń kitaphanalar adamdy ǵylymnan jeritý úshin jumys isteıtin sıaqty. Jappaı senimsizdik, ár kelýshige suǵanaq ury retinde qaraý psıhologıasy qalyptasqan. Qyzmetkerler, basshylyq basqa kitaphanalardyń júıesimen tanys bolar bálkim. Tehnologıalyq múmkindikterdi damytý qarjyǵa kelip tireletini jáne belgili. Biraq, bir ǵana meniń basymdaǵy bir kún ishinde bolǵan oqıǵa “Ulttyq" degen aty bar kitaphana úshin uıat. Álde, bul da Qazaqstandaǵy ǵylymǵa degen jalpy kózqarastyń bir belgisi me?», - deıdi Muhtar Seńgirbaı.

Osy oraıda Qamshy.kz aqparat agenttigi Ulttyq kitaphana basshylyǵyna habarlasyp, atalmysh shaǵymǵa baılanysty oıyn surady.

Ulttyq kitaphana dırektorynyń orynbasary Baqytjamal Qaıyrbekqyzynyń aıtýynsha, kitaphanada oqyrmandar úshin barlyq jaǵdaı jasalǵan. Eń bastysy, oqyrmandarmen jumys isteıtin arnaıy qyzmetkerler bar.

- Ashyq qor arqyly kez kelgen málimetti tabýǵa bolady. Oqyrman birinshi ret kelgende tirkeýden ótip, oqyrman bıletin alady. Qaı zalda qandaı málimet bar ekeni aıtylady, sonymen birge anyqtamalyq-bıblıografıalyq qyzmet kórsetiledi. 2-qabatta katalog júıesi arqyly aqparattanyp, dástúrli katalog men elektorondy katalogtyń kez kelgenin qoldanasyz. Bir emes, birneshe kezekshi bar. Olar oqyrmanǵa kitap nemese merzimdi basylym kerek bolǵan jaǵdaıda kómektesedi», - deıdi Baqytjamal Qaıyrbekqyzy.

«Keıbir kompúterler ınternetke qosylmaǵan», - degen oqyrmannyń sózin kitaphanashy teriske shyǵardy. Baqytjamal Qaıyrbekqyzy arnaıy anyqtamalyq-bıblıografıalyq qyzmet bólimindegi barlyq kompúterde ınternet baryn aıtady. Tapsyrys berý jaǵynan da esh qıyndyq joq eken.

- Kitap saqtaý bóliminde jatsa, qyzmetkerler ony ary ketse 5-10 mınýtta ákep beredi. Qorda bolsa, birden oqyrmanǵa tabystalady», - deıdi Ulttyq kitaphana dırektorynyń orynbasary.

Nazerke MUSA