«...Kenetten sý qaqpamyzdyń esigin julyp áketip, úıge kirdi. Sondaǵy qoryqqanymyz áli esimnen ketpeıdi. Terezeni shaǵyp syrtqa shyqtyq. Otbasymyzben qaýipsiz jerge kóshirilgende sýdyń arǵy betinde týǵan-týystarym men kórshilerim kómek kútip turdy. Olardy bizge qaraı jetkizgenshe... (kózine jas aldy). Endi qalaı bolǵanyn tipti sózben aıtyp jetkizý múmkin emes. Sumdyq jaǵdaı! Eseńgirep qaldyq...».
Bul – tabıǵat apatyn sýretteıtin shytyrman oqıǵaly gollıvýdtyq fılmniń senarıi emes, SHQO-daǵy Aıagóz qalasynyń turǵyny Aıgúl Ónebaevanyń sózi. Ónebaevtarmen qosa kóptegen otbasy birer saǵattyń ishinde barlyq dúnıe-múlkinen aıyryldy.
«Apatty jaǵdaıǵa tabıǵat emes, soǵan jaýapty laýazymdy tulǵalar kináli»
SHQO-daǵy Ulan, Aıagóz, Glýbokoe, Zyrán aýdandary men Rıdder qalasynda eki kún boıy tolassyz jaýǵan qar aralas jańbyrdyń saldarynan qalanyń birqatar aýdanyn sý basqan. Oǵan qosa, apattan Krasın kentindegi Kojedýb jáne Pýshkın kósheleri boıynda ornalasqan tórt úıdiń turǵyndary zardap shekti. Jergilikti turǵyndardyń aıtýynsha, bul jaǵdaıǵa osy mańdaǵy aryq arnasynyń ýaqtyly tazalanbaýy sebep bolǵan. Nátıjesinde, aryq sýy arnasynan asyp, irgedegi aýlalardy 40 santımetrlik sý basqan.
SHQO ákimi Danıal Ahmetov Óskemen qalasynyń sý basqan aýdandarynda bolyp, tabıǵı apattan zardap shekken turǵyndarmen kezdeskende apatty jaǵdaıǵa tabıǵatty emes, soǵan jaýapty laýazymdy tulǵalardy kinálaǵan edi. Ákim tótenshe jaǵdaılar departamenti men qala ákimdiginiń jumysyn qatań synǵa aldy.
- Byltyr sizderge qomaqty qarajat bólip, qajetti tehnıka alýǵa kómekteskenbiz. Sol tehnıka qaıda, nege paıdalanbaısyzdar? Jalpy mundaı ahýaldyń qalyptasýyna tabıǵat emes, óz mindetterine salǵyrt qaraǵan keı laýazymdy tulǵalar kináli, - dedi ákim.
Jyl saıyn kóktemde sý deńgeıi kóterilse de, apatty jaǵdaıdyń aldyn alý jumystary óz deńgeıinde júrgizilmeıdi nemese múlde júrgizilmeıdi. Jaýapty mekemeler qoldaryn mezgilinen kesh sermep, jaǵdaı ýshyqqanda ǵana qımyldaı bastaıdy. Al halyqtyń qaýipsizdigi úshin berilgen tehnıka kádege jaratylmaıdy. Zardabyn qarapaıym halyq kóredi. Nátıjesi belgili – qıraǵan úıler, múlkinen aıyrylyp, dalada qalǵan halyq.
Úılerin topan sý shaıyp ótken turǵyndardyń keıbiri týǵan-týystarynyń úıin panalasa, keıbiri jergilikti ınternatta turyp jatyr.
- Bizdi Aıagózdegi № 6 ınternatqa ákeldi. Qazir eki balam, joldasym jáne men sonda turyp jatyrmyz. Bizben qatar 50 adam sol ınternatta. Munda úsh mezgil tamaǵymyzdy beredi. Jatar ornymyz tegin. Jýynatyn jerimiz bar. Kıimdi janashyr halyq ákelip jatyr. №6 ınternattyń ujymyna rızamyz. Alǵysymyzdy aıtyp jatyrmyz, - deıdi sý tasqynynan zardap shekken Aıagóz qalasynyń turǵyny Aıgúl Ónebaeva.
Qazir SHQO-daǵy topan sýdan zardap shekkenderge árkim qolynan kelgenshe kómektesip jatyr. Biri kıim-keshek, endi biri buzylmaıtyn taǵam men gıgıenalyq zattar ákep jatyr. Zardap shekkenderge «Nur Otan» partıasy da qol ushyn sozǵan.
«Nur Otan» partıasy SHQO fılıaly janyndaǵy «Jas Otan» jastar qanatynyń tóraǵasy Marjan Baqytqyzynyń aıtýynsha, halyqqa járdemdesý isine jeke kásipkerler tartylyp jatyr.
- Bılik qandaı kómek kórsetedi dep qarap otyrmaı, jalpy halyq bolyp atsalysýymyz kerek. Sol úshin oblystyq «Nur Otan» partıasynyń qoldaýymen «Jas Otan» jastar qanaty gýmanıtarlyq pýnkterdi ashý týraly bastama kóterdi. Sý alǵan qala, aýyl, aýdandarǵa járdemdesý maqsatynda oblys boıynsha 5 pýnkt ashyldy. Onyń barlyǵy «Nur Otan» partıasynyń ǵımaratynda ornalasqan, - dedi Marjan Baqytqyzy.
Atalǵan qabyldaý núkteleri myna mekenjaılarda ornalasqan:
Óskemen q., «Nur Otan» partıasy Shyǵys Qazaqstan oblystyq fılıalynyń ǵımaraty, Q.Qaısenov kósh., 121;
Óskemen q., «Jas Otan» Jastar qanatynyń qalalyq bólimi, Áýezov kósh., 5;
Óskemen q., Oblystyq jastar ortalyǵy, Potanın kósh., 37;
Semeı q., «Nur Otan» partıasy qalalyq fılıalynyń ǵımaraty, Shaıjúnisov kósh., 138;
Aıagóz q., «Nur Otan» partıasy aýdandyq fılıalynyń ǵımaraty, H.Dúısenov kósh., 104.
Marjan Baqytqyzynyń sózinshe, BQO, Aqtóbe, Mańǵystaý oblystarynda da gýmanıarlyq kómek kórsetý beketteri ashylǵan. Osy óńirlerde jınalǵan jylý SHQO-ǵa jiberiledi. Ony muqtaj jandarǵa jetkizýdi «Jas Otan» jastar qanaty moınyna alǵan.
-Biz úshin árbir kómek óte mańyzdy. 24 saǵat boıy adamdar habarlasyp: «Neshege deıin jumys isteısizder? Biz kıim, taǵam alyp keleıin dep edik», - dep habarlasyp jatady. Budan bólek kásipkerlermen de baılanysqa shyqtyq. Bir kásipker 20 lıtr maı beretinin aıtty. Bir kisi unmen qamtamasyz etemin dep otyr. Sonymen qatar tótenshe jaǵdaılar departamentimen birigip, er adamdardan quralǵan eriktiler bar, «Jas Otannyń» belsendi músheleri bar – bárimiz qosylyp aryqtardy tazalamaqpyz, - dedi «Jas Otan» Jastar qanatynyń tóraǵasy.
«Eki saǵattyń ishinde byt shytymyzdy shyǵardy»
Aıagóz turǵyny Aıgúl Ónebaevanyń úıin sý basyp, komısıa turýǵa jaramsyz dep tapqan. Ol sý tasqyny qalaı bolǵanyn aıtyp berdi.
- 10 naýryzda keshke taman sý aqyryn-aqyryn kelip jatty. 11 naýryzda tańerteń sý deıgeıi birshama kóterildi. Túske qaraı, saǵat 13:30 shamasynda sý qaqpamyzdy buzyp, úıge kirdi. Eki saǵattyń ishinde byt-shytymyzdy shyǵardy. Dúnıe-múlkimizdiń bári ketti. Bala-shaǵamyzben qujattarymyzdy alyp terezeden áreń shyqtyq, - dedi Aıgúl Ónebaeva.
Aıagóz ózeniniń sýy on ese kóbeıip, arnasynan asqan soń aýdan ortalyǵyndaǵy úsh kópirdi qıratyp, 148 úı sý astynda qaldy. Aýdanda tabıǵı apatqa baılanysty tótenshe jaǵdaı jarıalanyp, zardap shekken úılerdiń turǵyndary dereý qaýipsiz jerge kóshirilgen bolatyn. Sýda qalǵan 148 úıdiń 8-i qulaǵan. 10 úı áne-mine qıraǵaly tur. Alaıda SHQO ákimi aldaǵy kúnderi bul sannyń eselenip ósýi múmkin ekenin jasyrmaıdy.
Aıgúl Ónebaeva turatyn kóshede 60 úıdi sý basty. Onyń aıtýynsha, byltyr da kóktemde sý deńgeıi kóterilgen, biraq kóp uzamaı tartylǵan.
- Byltyr sý esiktiń aldyna deıin keldi de, qaıta shegindi. Biz soǵan senip qaldyq. Bıyl jaǵdaı ýshyǵatynyn bilgen joqpyz. Sý úıdiń tabaldyryǵyna jetkende ákimdik eshqandaı áreket jasamady. Olarǵa eshkim aıtqan da joq. Sý ábden jaıylǵan soń baryp ákimder men órt sóndirýshiler keldi. Sý kóterilgende terezeni shaǵyp, birinshi balalardy dalaǵa shyǵardyq. Joldasymnyń apaıy úsh balasymen «sý basyp jatyr» degen habardy estip, kómekke keldi. Ol kisiler áskerı qyzmette isteıdi. Bizdi úıden shyǵaryp, joldyń arǵy betine kólikpen ótkizip jiberdi. Ózderi taýǵa shyǵyp jaǵdaıdy baqylady, sol jerden vıdeoǵa túsirdi. Biz qalaı óttik, sý deńgeıi solaı kóterilip, ashyq turǵan joldyń barlyǵyn sý basty. Tipti, bizge kómektesken týystarymyzdyń ózi sýdyń arǵy betine óte almaı qaldy. Keıinnen olar katamaran sekildi áskerı kólikpen ótti. Quddy bir kınodaǵydaı boldy. Shoshyp kettik. Biz sýdyń bir jaǵynda, týystarymyz ekinshi jaǵynda. Olardy biz jaqa, qaýipsiz jerge kóshirgenshe... Endi qalaı bolǵanyn tipti sózben aıtyp jetkizý múmkin emes. Sumdyq jaǵdaı! Eseńgirep qaldyq, - dep kóz jasyna erik berdi Aıgúl apaı.
Aıagóz qalasynyń keıbir turǵyndary ınternatqa ornalastyrylǵannan keıin jedel járdem kelipti. Dárigerler turǵyndardyń qan qysymyn tekserip, tynyshtandyrýǵa tyrysqan.
Kúndiz tasyǵan sý keshki saǵat 7-8 shamasynda qaıta tartylǵan. Tórt balanyń anasy Aıgúl Ónebaeva úıiniń adam tanymastaı ózgergenin aıtady.
- Barlyq dúnıe-múlkimiz, kıimderimiz jaramsyz bolyp qalǵan. Sý kúshiniń qatty bolǵany sonshalyq, esikti julyp áketken, peshti shaıyp ketken. Tusqaǵaz ǵana tur. Onyń ózi qol tıip ketse, jyrtylyp jatyr. Qabyrǵa jarylyp ketken. Turýǵa múlde kelmeıdi, - deıdi Aıagóz turǵyny.
«Aıagózdiń birde-bir turǵyny nazardan tys qalmaıdy»
SHQO ákimi Danıal Ahmetovtyń topan sýdan zardap shekkendermen kezdesý barysynda halyqqa biraz ýáde berdi.
- Baspanasy jaramsyz bolyp qalǵan otbasylarǵa osy qaladan úı satyp alyp beremiz. Qazirgi tańda Aıagózde 15 úı satylady degen aqparat berdi maǵan. Sonyń bárin satyp alamyz. Odan keıin ortalyqta 60 páterli jańa úı boı kóterip jatyr. Sol jerden páter beremiz. Eshkim baspanasyz qalmaıdy, - dedi ákim.
Danıal Ahmetovtiń bul sózine aıagózdikter bir jelpinip qaldy. Áıtse de úmit pen kúdik ıtjyǵys túsip turǵan jaıy bar. Kózben kórip, qolmen ustamaǵan soń keıbir turǵyndardyń áli de kóńili kúpti. Al Aıgúl Ónebaeva jaqsylyqtan kúder úzbeı, ákimniń azamattyq sózine senip otyr.
- Keshe SHQO ákimi Danıal Ahmetov biz ýaqytsha turyp jatqan ınternatqa keldi. Ol kisi: «Topan sýdan zardap shekkenderdi baspanamen qamtamasyz etemiz», - dep ýádesin berdi. 50 mıllıon teńge bólingenin aıtty. «Úı berilgenshe ınternatta jatasyzdar. Barlyǵyńyzǵa baspana alyp beremiz, alańdamańyzdar. Bir-eki kúnnen keıin Aıagózde qurylys jumystary bastalatyn aıtypty. Qazirdiń ózinde 60 adamǵa arnalǵan úı salynyp jatyr», - dep júregimizdi ornyna túsirip qoıdy, - deıdi Aıgúl Ónebaeva.
Aıta keteıik, Aıagózge oblystyq «Paryz» qorynan 50 mıllıon teńge joldanady. Atalǵan qarajat kún tártibinde turǵan ózekti máselelerdi, atap aıtqanda kómir, azyq-túlik, kıim-keshek sıaqty turmystyq jaǵdaıdy sheshýge jumsalady.
Sý tasqynynan zardap shekken Aıagóz qalasynyń turǵyndaryna myna esepshot arqyly qarjylaı kómek kórsetýge bolady:
«Bolashaq Aıagóz» QQ
BIN 110740000641
BIK KZKOKZKX
KBE 18
Aǵymdaǵy esepshot nómiri KZ279260301178000004 KZT «Kazkommersbank» AQ bólimshesi.
SHQO turǵyndary gýmanıtarly kómek boıynsha 87076046611 nómerine habarlasa alady.
