Memleket basshysy Nursultan Nazarbaev jumys saparymen BQO-da júr, dep jazady Qamshy.kz aqparat agenttigi Aqordanyń baspasóz qyzmetine súıenip.

Sapary barysynda Elbasy «Kvant» jaýapkershiligi shekteýli seriktestiginiń jıhaz jasaıtyn fabrıkasyna bardy. Onda tutas jıhaz jasaýdyń tehnologıalyq úderisimen tanysty.

Qazaqstan Prezıdentine kásiporynnyń qazirgi qarjy-sharýashylyq jaǵdaıy týraly málimet usynylyp, óndiris aýqymyn ulǵaıtý jáne daıyn ónim tizbesin keńeıtý jospary jóninde baıandaldy.

Sonymen qatar, fabrıkany aralaý kezinde Nursultan Nazarbaevqa óńirdiń áleýmettik-ekonomıkalyq damý barysy, sonyń ishinde ónerkásip sektorynyń, shaǵyn jáne orta bıznestiń qazirgi ahýaly men perspektıvalary jóninde baıandaldy.

Budan bólek, kásiporyn aýmaǵynda Memleket basshysyna ındýstrıalyq-ınnovasıalyq damý baǵdarlamasy aıasynda júzege asyrylyp jatqan jobalar tanystyryldy. Atap aıtqanda, fın tehnologıasy boıynsha turmystyq qatty qaldyqtardy qaıta óńdeý júıesin jańǵyrtý, iri qara men usaq maldyń terisin óńdeý, nan jáne makaron ónimderin óndirý, hımıa óndirisi, dızel otynynyń komponentterin gıdrotazalaý jónindegi jobalar bar.

«Kvant» kompanıasy porolon, matras, tutas jáne jumsaq jıhaz jasaýmen aınalysady. Óndiriste qoldanylatyn barlyq materıal ekologıalyq turǵydan taza ári memlekettik standarttarǵa saı keledi.

Jıhaz eýropalyq taýar óndirýshilerdiń zamanaýı qural-jabdyǵymen ozyq tehnologıalar qoldanyla otyryp jasalady.