– Qyzym, jasyń neshede?

–23-te...

–Turmys qurǵansyń ba?

–Joq.

–Turmys qurǵyń kele me?

–Daıyn turǵan jigitińiz bar ma edi?

–Bar bolǵanda qanda-a-aı! Pende emes, perishte...

Tanys dıalog pa sizge? Ordaly otyzdan asqan ulyn úılendire almaı júrgen Tana shesheı. Taqıasyn basynan tastamaıtyn geografıa pániniń muǵalimi, minezi uıań Taılaq. Esińizge tústi me? Iá-ıá... Bala kúnimizde súıip tamashalaǵan «Taqıaly perishte» kınofılminen dıalog qoı. Bir qyzyǵy, ár basqan qadamynda qyzdarǵa ózi baryp birinshi qadam jasap, ulyn úılendirmek bolyp jantalasatyn analar búgin de bar.

Saltanat apaı jary Talǵat myrzamen

Saltanat apaıdyń jasy elýden asyp barady. Otyzǵa taıap qalǵan uly shańyraq kótermeı biraz júrdi. Tym jumysbasty boldy ma álde uıalshaq pa edi, ol jaǵy tipti ata-anasyna beımálim. Joq, nemere súıý kerek, qolyn jyly sýǵa matyryp, shaıyn demdep, kóńilin aýlap júretin kelin kerek. Bulaı bolmaıdy dedi de Saltanat apaı iske ózi-aq kirisip ketti. Jolynda kezdesken jas qyzdarǵa birinshi bolyp sálem berip, tanysyp, mán-jaıyn surasatyn. Birimen dúkende tanysty, endi birimen aýrýhanada, basqasymen avtobýsta ne taksıde.

1-bólim. Taksıdegi tanystyq

Saltanat apaıdyń otbasy Jambyl aýdany Qarǵaly aýylynda turady. Balalary Eldar men Eldananyń sol aýylda kindik qany tamyp, topyraǵyna aýnap ósken. Saltanat apaı ár demalysynda Raıymbek tas joly boıyndaǵy «Altyn orda» bazarynan úıge qajetti azyq-túlik otyratyn. «Bolashaq kelinin dál sol bazar mańynan kezdestirip qalamyn ba?» dep oılady ma eken?!

«Birde Altyn ordadan shyǵyp bara jatyp, taksıge otyrdym. İshinde júzi jyly, ózi sulý bir qyz otyr eken. Ádepki ádetime basyp, qyzdyń atyn suradym. Sosyn jasyn, keıin turmys qurǵan-qurmaǵanyn da bilýge tyrystym. Esimi – Aıym eken. 1993 jylǵy ári turmys qurmaǵan. Sondaı bıazy, ınabatty bolyp kórindi. Bizdiń Qarǵaly aýylyna alǵash ret qonaq bolyp bara jatyr eken. Júzi jaqsydan túńilme degen oımen «Qyzym, aralasyp júrgen dosyń bar ma?» dep suraq qoıdym. Aıym uıalyp qaldy. Men áńgimemdi jalǵastyrdym. «Meniń Eldar degen balam bar. Qazir jumys isteıdi. Biraq jumysbastylyǵynyń kesirinen be, áli bir qyz kezdestire almaı júr. Óziń sondaı jaqsy qyz kórinesiń. Aqyry jigitiń joq eken, meniń ulymmen tanysýǵa qalaı qaraısyń» dedim de nómirin suradym. Kelinim uzaq oılandy da, nómirin berýge kelisti. Men ony balama berdim. Ári qaraıǵysyn ózine tapsyrdym», - dedi Saltanat Moldaǵulova.

Saltanat apaı tuńǵyshy Eldarmen

2-bólim. Qoldan jasalǵan tort

Eldardyń jasy 29-dan asyp barady. Dostary men qatarlastarynyń bári derlik otbasyly, bala-shaǵasymen ýlap-shýlap júrgen baqytty jandar. Mundaı baqytqa Eldar da bólengisi keldi. Átteń, júregi qalaǵan arýdy kezdestire almaı biraz júrdi. Anasy birneshe qyzben tanystyryp kórdi, joq, túk shyqpady. Osy joly da solaı oılady. Biraq ne de bolsa, kóreıin dedi.

Anasynan Aıymnyń nómirin alǵan Eldar uzaqqa sozbaı qyzǵa habarlasady. Úı ishinen jasyryn eki jas kezdese bastaıdy. Al Eldardyń kóńilin baýraǵan Aıymnyń qolynan jasalǵan tort boldy. Jaı tort emes, erekshe edi. Sebebi ol tátti Eldardyń ata-anasyna arnalǵan.

Aıym men Eldar

«Bıyl ata-anamnyń otasqanyna 30 jyl tolǵan edi. Ol kisilerge erekshe tosyn syı jasaǵym keldi, álbette Aıymnan keńes suradym. Ol erteńinde jumys jaǵyna kelip ketýdi surady. Baryp edim, óz qolymen tort jasap qoıypty. Ári torttyń betine ákem men anamnyń foto sýretin salǵyzǵan eken. Erekshe qýanyp kettim. Syılyǵym ata-anama da qatty unady. Men izdegen arý osy bolar dedim. Sebebi meniń ne qalaıtynymdy maǵan aıtqyzbaı-aq bildi. Ári qaraı kezdesýdi jalǵastyra berdim. 30 jeltoqsan Aıymdy úı ishimmen tanystyrdym. 31 jeltoqsan úılenýge usynys jasap, saýsaǵyna saqına taqtym. Sodan beri birgemiz», - dedi Eldar.

3-bólim. Kópten kútken qýanysh

21 sáýirde Moldaǵulovtar áýletinde kópten kútken toı boldy. Uzynaǵash aýylyndaǵy saltanatty saraıda dúrkirep ótken toıǵa 300-ge jýyq adam jınaldy. Eldardan buryn Saltanat apaı men jary Talǵat myrzanyń baqyttan júzderi bal-bul jaınap júrdi.  

Uzynaǵash aýyly, "Batyr" meıramhanasy, 21.04.2018

Búginde otbasy Qarǵaly aýylynda turady. Ana júregi aldamaǵan eken. Aıym men Eldar birin-biri tolyqtyryp turǵan baqytty jandar, tipti bir-biri úshin jaralǵan ba dersiń. Jas otbasy Eldardyń ata-anasymen birge turady. «Kelinim as úıge kirgizbeıtin boldy. Qolymdy jyly sýǵa malyp qoıyp, rahattanyp, teledıdar kórip jatatyn kúnge de jettim» dep qýandy Saltanat apaı. Balanyń qamyn oılaǵan osyndaı analar aman bolsyn. Qamshy.kz aqparat agenttiginiń ujymy eki jasqa baqyt tileıdi.

Toıdan estelik sýret