Baǵzy zamannan beri kele jatqan mıstıkalyq senimderdiń biri – synyq aınaǵa qaramaý. Bul sonaý kóne rım senim-nanymynan bastaý alady. Synǵan aınaǵa qaraǵan adamnyń jeti jyl boıy joly bolmaıdy-mys. Sol sebepti, úıde synyq aına ustamaý kerek dep sendi. Alda-jalda aına synyp qalǵan bolsa, oǵan tikeleı emes, tuspaldap kelip, synyqtaryn qaltashaǵa salyp, sol kúıinshe tastaý kerek eken. Ondaǵy maqsat – synyq aınada áldebireýdiń beınesiniń kórinbeýin qamtamasyz etý.

Mundaı yrym sharıǵatta negizsiz bolyp tabylady. Ár nárseni jaman yrymǵa balap, soǵan senip, júris-turysyn soǵan negizdeý din tálimine teris. «Jaqsy sóz – jarym yrys» demekshi, Paıǵambarymyz (s.a.ý.) pesımısik kóńil-kúı jáne pesımısik túsinik qalyptastyrar yrymdardan tyıyp otyrǵan. Ár nárse Allanyń qalaýyna baılanysty dep úıretti. Onyń ornyna ómirge degen qushtarlyqty oıatar, adamnyń úmitin arttyratyn sózder, jaqsy joramaldar aıtýymyzdy buıyrdy.

Mysaly, «Sahıh Býharı» atty hadıster jınaǵynda keltirilgen bir hadıste ardaqty Paıǵambarymyz: «Islamda jaman yrymǵa balaý joq(طِيَرَةٌ), eń jaqsysy - "Fá’l" dedi.(Sonda qasyndaǵylar): «Fá’l degen ne?», - dep surady. Paıǵambarymyz: «Ol - árbireýlerińniń estigileriń kelgen jaqsy sóz», - dedi[1].    

Qorytyndy:

Synyq aınanyń úıde turýynyń sharıǵat turǵysynan eshbir zıany joq. Oǵan baılanysty aıtylǵan mıstıkalyq yrymdardy - adam fantazıasynan týyndaǵan dúnıe retinde qaraǵan durys. Ejelde aınalar óte álsiz, asa synǵysh ári tym qymbat bolǵan. Sondyqtan, tutynýshy halyq aınany uqypty ustasyn degen oımen ádeıi álgindeı yrym oılap shyǵarylǵan bolýy múmkin. Áıtse de, úıde synyq aına ilinip tursa, ony basqasyna aýystyrý mádenıettilik jaǵynan da, qoldanysqa ıkemdi bolý jaǵynan da abzal.

Islam.kz