«Qazkontent» AQ dırektorlar keńesiniń táýelsiz dırektory Konstantın Gorojankınniń Facebook áleýmettik jelisinde qazaq ulty týraly jazǵan pikiri qyzý talqylanyp jatyr. Ol 6 tamyzda Túrkistan oblysy, Abaı aýylynda zorlanǵan 7 jastaǵy balanyń isine qatysty jazylǵan jazbanyń astynda pikir qaldyrǵan.

«Másele gende. 19 ǵasyrda Qazaqstanda saıahattaǵan saıahatshylardyń jazbasynda jergilikti turǵyndar malmen jynystyq qatynasqa túsetini jáne gomoseksýalızm týraly jıi aıtyldy» dep jazǵan.

Jeli qoldanýshylary ony bútin bir qazaq ultynyń namysyna tıgenin aıtyp, jazba avtoryn jaýapqa tartýdy talap etip otyr.

Zańger Rýslan Túsipbektiń aıtýynsha, Gorojankındi jaýapqa tartý úshin onyń ústinen aryz túsirý kerek. Zańger qazir qoǵam belsendilermen aqyldasyp, 1-3 kúnniń ishinde Gorojankınniń ústinen aryz jazý máselesin sheshetinin aıtady.

- Konstantın Gorojankındi QR Qylmystyq kodekstiń 174 baby boıynsha jaýapqa tartýǵa bolady. Eger onyń kinási dáleldense, ol 3, 5 nemese 7 jylǵa deıin bas bostandyǵynan aıyrylýy múmkin. Ony 3 jylǵa deıin bas bostandyǵynan aıyra otyryp, qylmystyq aıyppul da salýy ábden múmkin.

Bul tusta másele ony abaqtyǵa otyrǵyzý emes, sol bap boıynsha ony jaýapqa tartý. Sot ony mindetti túrde sottaıdy dep aıta almaımyn. Sot qandaı sheshim shyǵaratyny belgisiz. Bizdiń mindetimiz aryz jazyp, ony qylmystyq jaýapqa tartý, al sońǵy úkimdi sot sheshedi, deıdi zańger. 

Aıta keteıik, Konstantın Gorojankınniń jazǵan pikiri qoǵamdyq talqylaýǵa ulasyp, halyq arasynda narazylyq týdyrǵannan keıin, ol  Facebook paraqshasy arqyly halyqtan keshirim surady. Onda ókinetinin jáne zorlaý, pedofılderge qatysty máseleni túsindirgisi kelgenin aıtqan.  

«Meniń jazbama renjigenderdiń barlyǵynan keshirim suraımyn. Bireýdi renjitý oıymda bolǵan joq. Ásirese ulty boıynsha, dep jazypty Gorojankın.

Konstantın Gorojankın qyzmet etetin «Qazkontent» AQ Basqarma tóraǵasy Evgenıı Kochetov qyzmetkeriniń áreketine qatysty pikir bildirdi. Onda Konstantın Gorojankınniń jazbasy kompanıanyń ustanymyn bildirmeıtinin jazypty.

«Ardaqty aǵaıyndar, Konstantın Gorojankınniń pikiri onyń jeke kózqarasy, bul – Qazcontent kompanıasynyń ustanymyn bildirmeıdi. 
Qazirgi ýaqytta búkil mán-jaı anyqtalýda, Qazaqstan Respýblıkasynyń zańnamasyna saı áreket jasaıtyn bolamyz» deıdi Evgenıı Kochetov.

Sarapshy Rýslan Túsipbekov «Qazkontent» kompanıasy memlekettiń aqshasyna «kún kórip», memlekettik ıdeologıamen aınalysyp otyrǵandyqtan, óz qyzmetkerleriniń áreketine jaýap berýi tıis» degen oıda.

- Evgenıı Kochetov qandaı shara qoldanady, másele sonda. Ol Gorojankındi jumystan shyǵarý kerek.  Kochetovtiń jekesine jazdym, bir táýlik ótti, eshqandaı jaýap joq.

Esterińizge sala keteıik, buǵan deıin de jelide qazaq ultynyń namysyna tıetin jazba qaldyrǵan birneshe jaǵdaılar boldy. Qazaqtarǵa til tıgizýine jol berilýin árkim ártúrli topshylaıdy. Biri muny qazaqtardyń jýastyǵynan dese, endi biri zańnyń álsizdiginen degen pikirde. Rýslan Túsipbekovtyń bul týraly óz pikiri bar.

- Onyń eki sebebi bar. Reseıdiń áseri jáne ulttyq ıdeologıanyń durys jumys istemeýi. Reseıdiń júrgizip otyrǵan syrtqy saıasaty halyqtyń kóz aldynda. Máselen, Ýkraına, Qyrym máselesi. Pýtınniń árbir aıtqan sózi Qazaqstanda beıbit, tynysh júrgen etnıkalyq orystarǵa áser etetin bolý kerek.

Ekinshiden, bizdiń ıdeologıalyq jaǵdaıdyń múshkil ekendiginde. Ár ákimshiliktiń ıdeologıa bólimi bar. Alaıda olardyń jumysy máz emes sıaqty. Qaýipsizdik qyzmeti saıasatqa kelgende jaqsy jumys isteıdi. Al másele ıdeologıaǵa tirelgende nege osaldyq tanytatynyn túsinbeımin. Ideologıa degen biz úshin eń ózekti ári kúrdeli másele ǵoı. Qazaq halqyna, táýelsizdigine qarsy shyǵý, separatıstik mándegi pikir bildirý durys emes. Bizdiń quzyretti organdar mundaı jaǵdaılardy qadaǵalap, birden qarsylyq tanytý kerek.

Sarapshy kim de kim ultqa bireýdiń til tıgizgenine kýá bolsa qyzý qandylyqqa salynbaı, zań aıasynda ǵana áreket etý kerek ekenin eskertedi.

- Birden aryz jazyp, quzyretti organdarǵa shaǵymdaný kerek. Ulttyq qaýipsizdik qyzmeti, prokýratýra, sot, ishki ister mınıstrligi bar. Másele keıde ákimshilik, keıde qylmystyq istiń sheńberinde sheshiledi. Olarǵa zańsyz jaýap bersek, olar da zań sheńberinen shyǵyp jaýap berýge quqyly. Men pikir jazǵannyń ózinde Gorojankın sekildilerge «siz» dep jazamyn. Jeke basyna tıispeımin. Mádenıetti túrde, ádepten ozbaımyn. Olar ózderi túsinedi, olar da bizdiń azamattarymyz.

Rýslan Túsipbekov halyq sotqa senim bildirgeni jón degen oıda.

- Halyqtyń kóbi «Qazaqstanda zań oryndalmaıdy. Barlyǵyn jemqorlyq jaılap alǵan» degen pikirde. Desek te, eshkimdi mensinbeı, «myqty» bolyp júrgender óz isi úshin sottyń aldynda jaýap berýge kelgende ózgerip ketedi. Sol ýaqytta sottyń qudiretin sezinesiń.

Búkil ulttyń shambaıyna tıetin sózderdi ashyq túrde, ashyq derekkózderdi «aıqaılatyp» jazýy máseleniń qanshalyqty ýshyqqanynan habar beredi. Buǵan deıin de jeke adamnyń emes, búkil halyqtyń, ulttyń namysyna tıgender «zań», «sot», «jaza», «shara» sekildi sózderdi estigennen keıin, birden esin jıyp, túrli sebepterdi aıtyp, syltaýratady. Jeke paraqshasyna belgisiz bireý buzyp kirip, pikir qaldyrǵanyn aıtyp, keshirim surap qutylyp ketedi. Barlyǵy umytylady. Kóp ýaqyt ótpeı ekinshisi qazaqtardy qorlaıdy. Halyq taǵy shý etedi de, basylady. Mundaı jaǵdaı qaıtalanbaýy úshin máseleniń aq, qarasyn, naqty kimniń jergilikti ultqa til tıgizgenin anyqtap, zańdy belshesinen basqandardy QR Qylmystyq kodeksinde kórsetilgen bap boıynsha jaýapqa tartý qajet. Bul ózgelerge de sabaq bolady. Sebebi ulttyń namysyna tıý – zańdy buzý. Al zańdy buzǵandar árkez jaýapqa tartylýy tıis.