Men qalaı aldandym?
Men jumys izdeımin dep ońbaı aldandym... Biraq basqa aldanǵan adamdarǵa qaraǵanda, Qudaıǵa shúkir, jaǵdaıym táýir. Stýdent bolǵasyn jazǵy demalysta úıde bosqa jatyp isher bolmaıyn dep ǵalamtordan jumys izdeı bastadym. Bir kezde «qazaq tilin biletin, adamdarmen tez til tabysa alatyn jas qyzmetker kerek» degen habarlamany oqyp qýanyp kettim. Alda meni ne kútip turǵanyn bilmegendikten tez arada telefon nómirdi terip, habarlasyp em, meni suqbattasýǵa shaqyrdy. Maǵan aıtylǵan (Almaty qalasy Sátpaev kóshesi 30a/3, "Azıa plús" kompanıasy) mekenjaıǵa bardym. Ofıstiń ishi qujynaǵan adamdar, biri kirip jatyr, endi biri aıǵaı shyǵarýda. Túk túsinbedim. Maǵan berilgen anketany toltyryp, meni qabyldaý kerek «bastyqty» kúttim. Erden óziniń osy jerde «bastyq» bolyp jumys isteıtinin, ózine qujattardy rettep, telefon qońyraýlaryna jaýap beretin kómekshi kerektigin aıtty. Men úshin tym ońaı jumystyń aılyǵy 120 000 boldy. Iá, men de siz sekildi bul ne degen batpan quıryq dep oıladym, alaıda maǵan qyzyq bolǵanyn jasyrmaımyn. Álgi jigit meni bul qyzmetke ıkemdi ekenimdi baıqapty-mys. «Azıa plús» kompanıasynyń Tiens Kazakhstan JSHS kompanıasymen seriktes ekenin aıtty. Men Tiens (Tánshı) týraly buryn estimeppin. Sondyqtan shoshyna qoımadym. Erden keshke irikteý kezinde óziniń basshylaryna meni maqtaıtynyn, barynsha osy jumysta qaldyratynyn aıtty. Munyń «psıhologıalyq shabýyl» ekenin keıin bildim. Keshke qaraı maǵan álgi bastyqsymaǵym habarlasyp, meni quttyqtady. Men jumysqa qabyldanyppyn.
Men qalaı aldadym?
Erteńine tólqujatymnyń kóshirmesi men 3/4 sýretimdi aparyp, alǵashqy synaq merzimine bardym. Jumys isteımin dep baryp, leksıa tyńdap qaıtyp keldim. Alǵashqy leksıada Qytaıdaǵy Tiens kompanıasy týraly tolyǵyraq aqparat aıtty. Keshke qaraı kompanıa týraly Google atamnan surap, izdep edim kózim sharasynan shyǵyp kete jazdady. Barlyq pikirlerdi oqyp shyqtym, bári bul kompanıadaǵy qyzmetkerlerdiń alaıaq ekenin jazǵan. Alaıda pikir jazǵandardyń barlyǵy derlik 1-shi synaq merziminen keıin ketip qalǵan. Sol sebepti synaq merziminiń sońyna deıin barýdy jón kórdim. Áıteýir sońǵy synaq merziminde maǵan bul kompanıa arqyly tez ári kóp aqsha tabýǵa bolatynyn aıtty. Qazir «birneshe myńdaǵan qaryzy bar adamnyń kóp aqshany estip aldanatyny belgili dúnıe», - dep ózimdi aldaýsyratynym bar.
Men bul kompanıadan 70 000 teńgege taýar aldym. Stýdent bolsań, aqshany qaıdan aldyń degen shyǵarsyz ishteı. Aqshany bir dosymnan suraı qoıyp edim birden bere qoıdy. Bul sáıkestik emes, Qudaıdyń syıy shyǵar dep, talpynysym arta tústi. Al qazir kúlkim keledi.
Taýarlardyń qatarynda dári-dármek pen shashqa arnalǵan sýsabyn, tis pastasy bar. Taýarlardy alǵan soń men de ózimdi aldaǵandaı ózgelerdi aldaı bastadym. Ózgelerdi aldaýdan barynsha saqtanýǵa tyrysatyn men úshin bul óte qıynǵa soqty. Keıin Erdenniń basshysy Álıhan maǵan 1-2 saǵat leksıa oqydy. Túrli mysaldar keltirdi. Men sendim. Sebebi meni shaqyrǵan jigit 500 myń teńgege taýar alyp, aqshany 2-3 aıdyń ishinde qaıtaryp alǵanyn aıtqan. Munyń ótirik bolýy múmkin degen oı da kelmepti. Sol sebepti men de senimdi túrde jumys isteı bastadym. Kúmándana bastaǵan komandadaǵy kez-kelgen adammen Álıhan sóılesetin.
Bul jerde kimder jumys isteıdi?
Bul kompanıada basqa jumys isteýge eshqandaı múmkindigi joq adamdar uzaq ýaqyt boıy jumys isteıdi. Olar «biz basqalarǵa qalaı tez aqsha tabýdyń jolyn kórsetemiz», - dep ózderin aldaýsyratatyn. Jelilik marketıńte aýyr jumys istegisi kelmeıtinder, dıplomy joqtar men zeınet jasyna jetip jumys tappaǵandar jumys isteıdi. Men jumys istegen ofıstegilerdiń kóbisi stýdentter men zeınetkerler bolatyn. Olardyń basqa tańdaýy joq.
Tez aqsha tapqysy keletinderdi qalaı aldaıdy?
Ofıste únemi leksıa oqylady, álemdik deńgeıde ózindik ornyn qalyptastyrǵan, tanymal kásipkerleridiń kitabyn jomartsymaqtar 700 teńgege satady. Sonymen birge jıi-jıi jıyndar ótkizilip, kóp aqsha tapqandar ózderiniń ómirlik ustanymdarymen qatar qandaı qıyndyqtar kórgenin aıta bastaıdy. Barlyǵynyń aıtatyn bir mátini bar. Olarǵa barlyǵy ıaǵnı dostary men otbasy qarsy shyqqan. Al qazir birneshe jyldan keıin bul olar otbasyn da, dostaryna da óz sheshiminiń ras ekenin dáleldegen. Osy mátin ǵana birdeı. Kompanıanyń belsendileriniń biri Tiens kompanıasynyń dárisi arqyly qaterli isikti jeńse, endi biri anasyn sol dári-dármekpen emdep júr. Alaıda «densaýlyqty kútip ustaý úshin Tiens kompanıasynyń dárisin qabyldaý kerek», - deıtinderdiń syrtta shylymdy býdaqtata shekkenin kórgende kóńilge kúmán uıalaıtyny ras.
Olar jumysty bastamas buryn jumys izdep kelgenderden alǵa qoıǵan maqsattarynyń tizimin jasap kelýdi tapsyrady. Keıin psıhologıalyq turǵyda kelgen adamdardyń maqsattaryn ózderine qarsy paıdalanady. Iaǵnı, men tez arada kólik alýdy maqsat ettim. Olar maǵan «sen memlekettiń jumysyn istep júrip aldaǵy 10 jylda kólik ala almaısyń, al bizde jumys isteseń, 2-3 jylda kólik júrgizýshisi atanasyń», - deıdi. Iaǵnı kelgen adamdardyń maqsatyn paıdalanyp, psıhologıalyq qysym jasaıdy.
Keıin men Erdenniń salǵan aqshasynyń jartysyn da qaıtara almaǵanyn estidim. Kún ótken saıyn bir shyndyqtyń basy kórinip, ótirikteri ashyla bastady.
Keıin barlyǵyna qolymdy bir siltedim. Maǵan bir ret ótirik aıtqan adamnyń keıin de aldaıtynyn basynan-aq túsingenimde ǵoı. Já, ókingenmen men salǵan 70 myń ózime qaıtyp kelmeıtini túsinikti. Kompanıadan shyqqan soń barlyǵyn oı eleginen ótkizdim. Ózimdi gıpnozdan aıyqqan adamdaı sezindim. Óz-ózimdi biraz ýaqytqa deıin joǵaltyp alǵandaı boldym. Biraq tez óz-ózime kele aldym. Sebebi ózim armandaǵan mamandyqta qyzmet atqaryp júrmin. Bul meni uzaq ýaqyttyq depressıadan qutqardy.
Jelilik marketıń arqyly aqsha tabýǵa bola ma?
Iá, bolady. Meni bulaı aıtady dep oılamaǵan shyǵarsyz. Alaıda men jelilik marketıń arqyly aqsha tabýǵa bolmaıdy dep aıta almaımyn. Biraq qomaqty qarajat tabý úshin kompanıany durys tańdaı bilý kerek. Sonymen birge siz tańdaǵan kompanıanyń jumys júıesi durys bolǵan jón. «Bul jelilik marketıń emes», - dep ózgelerdi aldap aqsha taýyp júrseńiz, bul uzaqqa sozylmaıdy.
P/S: Adam óziniń súıikti jumysyn istep júrip rahatqa bólenedi, al qur aqsha úshin jumys istese, eshqandaı paıda joq degendi túsindim. Jaı ǵana óz isimizdiń mamany bolýǵa umtylsaq, jaqsy qarajat taba alamyz jáne bul aqsha siz úshin adal bolady. Eń bastysy osy emes pe? Aqshanyń artynan qýǵandar ómir boıy aqshaǵa toımaı ótken. Tek aqyldylar ǵana aqsha úshin emes, aqshany ózine jumys istete alady. Men ózimniń qalaı aldanǵanymdy da, qalaı aldaǵanymdy da, qandaı sheshim qabyldaǵanymdy da jazdym. Al sizder óz tańdaýlaryńyzdy ózderińiz jasarsyzdar. Múmkin tańdaý jasap qoıǵan da shyǵarsyz... Tek ókinbeńiz!
