Memlekettik qupıany jarıalaǵany úshin sottalǵan QR Prezıdenti Ákimshiligi basshysynyń orynbasary Baǵlan Maılybaev shet memlekettiń ókilderimen tyǵyz qarym-qatynasta bolǵany barshaǵa málim. Alaıda osy yntymaqtastyqtyń egjeı-tegjeıin kópshilik bile bermeıdi. Al dál osy aqparat sońǵy jyldarda oryn alǵan kóptegen oqıǵalardy aıqyndaı túser edi.
QR QK 361-babynyń 4-bóligimen jáne 185-babynyń 3-bóligimen kózdelgen qylmystardy jasaǵany úshin 2017 jyldyń maýsym aıynda bes jylǵa bas bostandyǵynan aıyrýǵa sottalǵannan keıin QR Prezıdenti Ákimshiligi basshysynyń burynǵy orynbasary Baǵlan Maılybaev baspasóz nazarynan tys qaldy. Degenmen, onyń rezonansty isi áli de kóńil bólýge turarlyq, óıtkeni, birinshiden, Kremldiń teris reaksıasyna qaramastan, tipti óte joǵary deńgeıdegi qazaqstandyq memlekettik qyzmetkerlerdiń reseılik áriptesterimen qajetsiz baılanystaryn toqtatýǵa Aqordanyń qabiletin kórsetedi, jáne, ekinshiden, Qazaqstanda bılik basyndaǵylarmen janjaldasýdyń jaqsylyqqa aparmaıtynyn rastaıdy.
Osy tezıstiń dáleli retinde ınsaıderlerden alynǵan aqparatqa júgineıik.
Biz Maılybaevtyń standartty emes senarı boıynsha ustalǵanyn anyqtadyq (Baǵlan Maılybaev pen onyń baǵynyshty qyzmetkeri, QR Prezıdenti Ákimshiliginiń sektor meńgerýshisi Nıkolaı Galıhınniń QR QK 185 «Memlekettik qupıany zańsyz jınaý, taratý, jarıa etý» babynyń 1 jáne 3-bóligimen kózdelgen qylmysty jasady degen kúdik boıynsha QR Ulttyq qaýipsizdik komıtetiniń qyzmetkerlerimen 2017 jyldyń 12 qańtarynda ustalǵanyn eske salamyz).
Oqıǵa barysy mynadaı bolǵan. QR UQK tóraǵasy Kárim Másimov QR Prezıdenti Ákimshiligi basshysy Ádilbek Jaqsybekovke jeke ózi telefon soǵyp, arnaıy qyzmettiń joǵary shendi qyzmetkeriniń qyzmet ǵımaratyna kirýin jáne onyń memleket basshysynyń ákimshiligi basshysynyń orynbasarymen júzdesýin qamtamasyz etýdi suraǵan. Osynyń nátıjesinde, kelgen qyzmetker Aqordaǵa esh kedergisiz kirip, Maılybaevtyń kabınetine ótken jáne, shamasy, oǵan qamaýǵa alý orderin usynǵan. Sosyn, onymen birge kabınetten shyǵyp, sońǵysynyń «Mersedes» markaly qyzmet avtokóligimen olar birge aýmaqtan ketip qalǵan. Al qaqpanyń syrtynda, avtoturaqta, olardy jedel mashına kútip turǵan, oǵan Maılybaevty endi ustalǵan adam retinde otyrǵyzǵan.
Baǵlan Maılybaevtyń ózine aıyp retinde taǵylǵan qylmystardy jasaýdaǵy kinásin moıyndaǵanyna, al onyń úıinde júrgizilgen tintý kezinde kinásiniń tolyq dálelderi tabylǵanyna qaraǵanda, ol óz taǵdyrynda osyndaı betburys bolady dep kútpegen jáne tipti óziniń qaǵazdary men jazbalary saıası qarsylastary men qastyq oılaýshylardyń qolyna túsetinin oılamaǵan. Degenmen, olardyń mazmuny Maılybaevtyń quldyraýynyń basty sebebi bolǵan sıaqty. Máskeýdegi kýratorlaryna jazǵan hattarynda ol retin taýyp, Aqordadaǵy barlyq negizgi tulǵalar týraly, sonyń ishinde Ádilbek Jaqsybekov pen onyń aldynda bolǵan basshylar, QR Parlamenti Májilisiniń spıkeri Nurlan Nyǵmatýllın jáne QR UQK tóraǵasy Kárim Másimov týraly jaǵymsyz pikir bildirgen ári dórekilik tanytatyn sózderdi qoldanýdan tartynbaǵan.
Insaıderlerden alynǵan aqparat boıynsha, QR Prezıdenti Ákimshiligi basshysynyń burynǵy orynbasary kinási dáleliniń kólemi asa qomaqty bolǵany sonsha, qujattardy jáne basqa da aqparat nusqalaryn tasymaldaý úshin birneshe mıkroavtobýs qajet bolǵan. Baǵlan Maılybaevtyń qylmystyq isi qupıa bolǵanmen, al sot prosesi jabyq tártipte ótkenmen, aqparattyń jaıylyp ketýi báribir oryn aldy. Maılybaev óz jazbalarynda Aqorda men onyń kóptegen mekendeýshileri úshin eleýli aqparatpen bóliskeni, ózine qarsy saıası klandardyń ókilderine shaǵymdanǵany, olarǵa jaǵymsyz sıpattamalar bergeni jáne olardy beıtaraptandyrýǵa kómek suraǵany anyqtaldy.
Sońǵysy Aqordada erekshe alańdaýshylyq bildirýge turarlyq, sebebi reseılik BAQ pen ınternet-resýrstary Qazaqstan men respýblıkadaǵy ishki saıası prosesterge nazaryn kóp aýdarmaıdy. Sáıkesinshe, olardyń tarapynan tym kóp kóńil bólý, sondaı-aq erkin túsiniktemeler berý, ádette, tapsyrys berýdiń nátıjesi bolyp tabylady. Tapsyrys berýshi, kóbinese, dál osy Maılybaev bolyp shyqty.
Jekelep aıtqanda, ol Memleket basshysy Keńsesiniń basshysy Mahmud Qasymbekovti Nursultan Nazarbaevtyń ústeline túsetin jáne odan shyǵatyn barlyq qujattarǵa shekteýsiz qol jetkize alatyn adam retinde sıpattaǵan, jáne ony basqa, ıkemdi adamǵa aýystyrýdy usynǵan. Sonymen qatar muny Mahmud Qasymbekovtiń uly Jeńis Qasymbekovtiń bedelin túsirý arqyly jasaýdy usynǵan. Bul kezeńde osy jas mınıstrge onyń jumysynyń avıasıadan bastap avtokólik joldaryna deıingi ártúrli salalary boıynsha aqparattyq shabýyldar jasalǵanyn aıta ketý kerek. Aqparattyq materıaldardyń tizbegin qadaǵalaıtyn bolsaq, ol RIA «Novostı» qazaqstandyq búrosynyń newskaz.ru saıtyna ákeletini tańdanarlyq. Múmkin, bul kezdeısoqtyq shyǵar, biraq biz buǵan kámil senbeımiz.
Alaıda, barlyq málimetterge qaraǵanda, Baǵlan Maılybaevtyń quldyraýyna onyń Kárim Másimov týraly, ásirese ol QR Prezıdentiniń Ákimshiligin basqaryp turǵan shaǵynda, sondaı-aq onyń aınalasyndaǵy QR Ulttyq ekonomıka mınıstrliginiń burynǵy mınıstri Qýandyq Bıshimbaev sekildi adamdar týraly pikirleri sheshýshi ról atqarǵan.
Sońǵysynyń taǵdyry qalaı bolǵanyn eske salýdyń qajeti joq. Qýandyq Bıshimbaevqa qatysty tergeý barysyn jarıalaýda dál osy RIA «Novostı» taǵy da, nelikten ekeni belgisiz, erekshe jigerlilik tanytqanyn atap ótken jón. Al Kárim Másimovke kelsek, Maılybaev onyń Prezıdent Ákimshiliginiń basshysy retinde taǵaıyndalýyna kóńili tolmaǵanyn jasyrmaǵan. Osy oryndy ózi ıemdenýge úmittenip, shamasy, sondyqtan ol jańa basshysyna sıpattama berý kezinde dórekilik tanytatyn sózderdi qoldanýdan tartynbaǵan.
Maılybaevqa unamaǵan basqa tulǵalardyń ishinen QR Mádenıet jáne sport mınıstri Arystanbek Muhamedıulyn atap ótken jón. Ony Maılybaev óziniń aldyna qoıǵan maqsattaryna qol jetkizý úshin eleýli kedergi dep ataǵan, sondyqtan ol reseılik baılanystarynan mınıstrdi beıtaraptandyrý úshin oǵan qarsy sharalar qabyldaýdy tezdetýdi suraǵan.
Bul taǵy da RIA «Novostı» kúshimen aıtarlyqtaı jarıa etilgen Máskeýdegi qyrǵyz gastarbaıterleri týraly málimdemeniń tóńireginde bolǵan janjalmen sáıkes kelýi tańdanarlyq. Sonymen qatar dál osy reseılik medıa «Jamanqulov Muhamedıulyna qarsy» aqparattyq soǵysyna (erikti nemese eriksiz túrde?) qatysqan, onda bir kezderi tanymal akter, shamasy, bógde adamdardyń oıynyndaǵy soqyr qural retinde áreket ete otyryp, óz mansabyndaǵy jaǵymsyz, múmkin, sońǵy rólin oınaǵan bolatyn.
Buǵan qosa, Baǵlan Maılybaevtyń úıinen tergeýshiler tárkilengen qujattardan onyń, eń keminde, QR Memlekettik hatshysy bolýdy ańsaǵany anyqtaldy. Esterińizge sala keteıik, Konstıtýsıalyq tabelde bul laýazym besinshi nómirmen berilgen, ıaǵnı, qazirgi prezıdent ýákilettikterin merziminen buryn toqtatsa, memleket basshysynyń mindetterin zańdy túrde oryndaýdaǵy kezekte besinshi orynǵa ıe bolady. Barlyq málimetterge qaraǵanda, Baǵlan Maılybaev qolaıly sátte jáne reseılik baılanystarynyń qoldaýymen «Qazaqstandaǵy ishki saıasat jónindegi basshy» laýazymynan joǵary sekire alatynyna úmittengen.
Qalaı bolǵanda da, QR Prezıdenti Ákimshiligi basshysynyń burynǵy orynbasarynyń osy jáne basqa da josparlary iske aspady, al Maılybaevtyń qaǵazdary jáne onyń hattary qazaqstandyq arnaıy qyzmetterdiń qolyna tústi jáne onyń memlekettik qyzmette laýazymǵa ıe bolý quqyǵynan ómir boıyna aıyrýmen birge bes jylǵa bas bostandyǵynan aıyrýǵa sottalýyna negiz boldy.
Alaıda, Maılybaev belsendi túrde qoldaǵan reseılik BAQ qazaqstandyq «enshilesterimen» birge Aqordadan bir shaqyrymdyq qashyqtyqta jumys isteýin jalǵastyrýda. Olar jáne Maılybaev kezeńinde qazaqstandyq sarapshylyq alańyn ıelengen «sarapshylar» dep atalatyndar tranzıt kezeńinde yqpal jasaý úshin qoldanylýy múmkin ekendigi joqqa shyǵarylmaıdy.
Derekkóz: Kz.expert
