Mezgilinen buryn ári óz erkimen zeınetke shyqqan basshy... Qulaǵyńyzǵa túrpideı estilip tur ma? Qytaıda kompanıa prezıdenti 54 jasyna zeınetke shyǵyp, qalǵan ómirin jan tynyshtyǵyna arnamaq. Ol mıllıardtan astam turǵyny bar Qytaıdyń eń baı adamy.
10 qyrkúıek Alibaba kompanıasynyń prezıdenti Djek Ma 54 jasqa toldy. Sonymen qatar ol kúni Qytaıda «Muǵalimder kúnin» toılaıdy eken. Alibaba kompanıasyna deıin Djek Ma aǵylshyn tilinen sabaq bergen. Zeınetke shyqqannan keıin de endigi ómirinde ustazdyq etýge bel býypty. Ári qaıyrymdylyqpen aınalysýdy nıet etip otyr. Dál qyrkúıektiń 10-y, ustazdar merekesinde zeınetke shyǵyp, ustazdyq joldy tańdaýy da beker emes bolar. Djek Ma bul kúndi ádeıi tańdady ma álde sáıkestik pe, belgisiz, alaıda uly adamnyń ómirinde sátti sáıkestikterdiń jıi oryn alýyn óz basym «ǵajap» der em.
Deı turǵanmen mıllıarder bir ǵasyrdyń jarty ǵumyrynda bar baılyǵyn, jıǵan-tergenin ózge bireýge «op-ońaı» qaldyryp ketkenine siz de tańyrqap qalǵan bolarsyz. Ózi bul áreketin túsindirýge tyrysypty. Aıtýynsha, qaıyrymdylyq is pen ustazdyq etýden ózge de sebepteri bar.
The New York Times basylymynyń deregine súıensek, Ma Qytaıdaǵy iskerlik ortaǵa kóńili tolmaıdy. Memlekettik kásiporyndar jeke kompanıalardyń jumysyna bóget keltiredi. Al óziniń zeınetke shyǵýyn Djek Ma «jańa dáýirdiń bastamasy» dep sanaıdy.
Forbes Djek Manyń baılyǵyn $36,6 mlrd-qa eseptep berdi. 1999 jyly ashylǵan kompanıasy búginde álemniń eń iri rıteılerleriniń birine aınalyp otyr.
Bloomberg TV arnasyna bergen suhbatynda mıllıarder qaıyrymdylyqpen aınalysqysy keletinin aıtypty. Kompanıadan ketken soń bilim berý jobalaryn qarjylandyratyn qor ashqysy keledi. Bıll Geıtstiń izimen júrýdi qalaıdy.
Aıta keteıik, Microsoft Word baǵdarlamasynyń negizin qalaýshy Bıll Geıts 2015 jyly Afrıkaǵa barǵan saparynan keıin qaıyrymdylyq qorymen aınalysqysy keletinin aıtqan. Onyń oıynsha, damymaı qalǵan memleketterge joǵary tehnologıa emes, tamaq pen dári-dármek kerek.
Djek Ma adal eńbekpen baılyqqa qol jetkizgen jan. Ondaı jandardyń artynan qalar urpaǵyna aıtary da mol. Sol mol dúnıesiniń bir 5 paıyzyn bolsa da, oqyrman nazaryna usynýdy jón sanadyq. Jańadan bıznes bastaǵysy kelip júrgender úshin tómendegi sózder kómek bolyp qalar degen nıettemiz.
1.Barlyq dúnıeden múmkindik izdeńiz.
Múmkindikti jaqynnan izdemeńiz, álemdi sharlańyz.
2.Kez-kelgen nusqany baıqap kórińiz
Múmkindiktiń jaqsy-jamany bolmaıdy. Bárin paıdalanyńyz. İs bastaýǵa turarlyq keńistikti baıqasańyz, onyń tabysty bolýy úshin kúsh jumsańyz. Úlken maqsatqa qadam usaq-túıek oılardan bastalady.
3.Oılanyp jumys jasańyz
Ár basqan qadamyńyzdy sanańyzǵa túıip júrińiz. Bul maqsattyń sizge qandaı mańyzy, paıdasy bar, nege dál sol maqsatty baǵyndyrǵyńyz keledi – únemi oılanyp, jaýap izdep júrińiz.
4.Jyldam qozǵalyńyz
Tabysqa jetý úshin baıaý qozǵalýdy doǵaryńyz. Ýaqytty da jeńe bilińiz, baǵyndyryńyz.
5.Batyl bolyńyz
Djek Ma kompanıasyn asharda jobanyń shyǵynǵa ushyrýy múmkin ekeni jıi eskertilgen. Biraq mıllıarder táýekelge baryp, kompanıasyn ashty. Esesine búgin álemdegi eń tabysty kompanıalardyń biri.
6.Jastyq shaǵyńyz - sizdiń eń úlken múmkindigińiz
«Jasyńyz 35-te, biraq áli baı bolmasańyz, jastyq shaǵyńyzdy beker ótkizgensiz», - dedi bir sózinde Ma.
7.Kásibı deńgeıi sizden joǵary adamdarmen jumys isteńiz.
Eger mamandarǵa jıi aqyl aıtsańyz, janyńyzǵa qajetsiz adamdardy jınaǵan ekensiz. Óz salasynyń naǵyz mamany aqyldy qajet etpeıdi, sizden ozyp túsedi.
8.Tabandylyq – jeńis kilti
Maqsatqa jeter jolda kóp qıyndyqtarǵa jolyǵaryńyz aqıqat. Sondaı sátte saǵyńyz synbasyn.
9.Qarym-qatynasyńyz múmkindikterińizden mańyzdy
Qıyn kezeńde de, tabysty sátte de basshy sabyrly, senimdi bolý kerek.
10.Bıznes pen saıasatty aralastyrmańyz
Kapıtal – janaıyn dep turǵan kúl, al saıasat – janyp turǵan sirińke. Ekeýin baılanystyrsańyz, saldary ózińizge unamaýy múmkin.
11.Básekelesterińizdi qurmetteńiz
Ózińizge básekeles kompanıaǵa qurmet tanytyńyz. Bárine beriletin múmkindik birdeı. Sizdiń básekelesińiz de siz sekildi adam balasy, ol da qatelesýge quqyly.
12.Jeńimpazdar jylamaıdy
Kóńil-kúıińizdi túsiretin sátsizdikter mindetti túrde bolady. Al olarǵa aryzdana berseńiz, qıyndyqtar eshqashan taýsylmaıdy.
13.Bir jaǵdaıdy aınalshyqtap júrip almańyz
Qandaı otbasynda, qandaı ortada týǵanyńyz, qaı jerde bilim alǵanyńyz, jumys tájirıbeńiz mańyzdy emes, kez kelgen jaǵdaıǵa qaramastan jetistikke jete alasyz. Qaıda jáne kimmen bastaǵanyńyz emes, sizdiń shydamdylyǵyńyz, jigerińiz, rýhyńyz mańyzdy.
14.Óz menińizdi tıimdi paıdalanyńyz
Sizdiń qyzmetińiz ambısıańyzdyń jol nusqaýshysy bolýy kerek. Óz maqsatyńyzǵa tıisti kóńil bólip, joldan adaspaı jetýge tyrysyńyz
15.Maqsaty bir komanda jınańyz
Manyń pikirinshe, eger komandany súırep júretin tek siz bolsańyz, tabysty túsińizde kóre berseńiz bolady. Maqsaty bir, birdeı oılaı alatyn kóshbasshylardy jınańyz. Qyzmetkerińiz siz úshin emes, ortaq maqsattaryńyz úshin jumys istesin.
16.Ornyńyzǵa adam daıyndap qoıyńyz
Komandańyz sizge ǵana baılanyp qalmasyn, ózińizdiń bilgenińizdi qol astyńyzdaǵy qyzmetkerlerge de úıretińiz. Ýaqyt óte kele mindetińizdiń jartysyn solarǵa tabystap júre beresiz, tipti basqa da jobalarmen ózdiginshe aınalysa alatynyna senimdi bolasyz.
17.Er minezdi, qaıratty, qyraǵy basshy bolyńyz
Berik, batyldyq, aldaǵyny boljaı biletin kóregendilik – tabysty basshyny ózgelerden ereksheleıtin qasıetter. Ózgeleri qıyndyqtan basqany kórmeıtin dúnıeden basshy múmkindik izdeıdi.
18.Sheshimderdi aqyldasyp qabyldańyz
Tabysty basshy óz qyzmetkerlerinen aqyldy bolmaýy múmkin. Kez kelgen sheshimdi qabyldarda janynda aqyl qosatyn kásibı mamandardyń bolǵany jón.
19.Myqtylyq qıyndyqtardan keıin keledi
Adam birden jigerli, qaısar bolmaıdy. Jolynda kezdesetin qıyndyqtar adamdy myqty etedi. Basyn táýekelge tigetin adam ǵana túbi jeńiske jete alady.
20.Yntamen, yjdahattylyqpen uqypty jumys isteńiz
Tabystyń formýlasy qarapaıym – maqsatyńyzǵa jeteler jolda uqypty bolǵanyńyz abzal.
21.Básekelestikte adal erejelerge baǵynyńyz
Básekelesińizge dushpan dep qaraıtyn bolsańyz, siz de bireýge dushpan bolasyz. Ashyq jáne adal básekelesińiz.
22.Básekelesterińizdi teń kórińiz
Siz sekildi básekelesińiz de nólden bastady. Ózińizdi kim-kimniń aldynda bolmasyn bıik ustańyz.
23.Tutynýshy birinshi orynda turýy tıis
Sizdiń energıańyz da, ýaqytyńyz da shekteýli. Sol sebepti basymdyqqa ıe dúnıelerdi birinshi orynǵa qoıyńyz. Ol sizdiń tutynýshyńyz, ekinshi kezekte áriptesterińiz, sosyn aksıonerlerge kóńil bólińiz. Kásipkerlerdiń kóbi aksıonerleriniń múddesin mańyzdy etip alady. Tájirıbe júzinde bul ádistiń tıimsiz ekeni dáleldengen.
24.Ashkóz ári sarań bolmańyz
Bárińiz is bastarda birinshi kezekte aqsha tabýdy kózdeısiz, kóp tabys tabýǵa umtylasyz. Maqsat jolynda aqsha tabýdy emes, ambısıańyzben jumys isteńiz. Sarańdyq túzý joldan adastyrady.
25.Kóńilińizge jaǵatyn adammen jumys isteńiz
Qol astyńyzǵa qyzmetker alarda kásibıligine ǵana nazar aýdarmańyz. Kásibı maman bola tura minezi kóńilińizden shyqpasa, komandańyzǵa jaıly bolmasa, ol adammen ótkizgen ár sekýndyńyz beker.
26.Óz basyńyzben oılanyńyz
Ózgelerdiń pikiri mańyzdy emes, ózińizdi ǵana tyńdańyz.
27.Júregińizdi tyńdańyz
Intýısıańyzǵa senińiz, ol aldamaıdy.
- «Tegin» - eń qymbat sóz
Básekelesterińizge ónimderińizdi tegin taratý arqyly, kompanıańyzdy shyǵynǵa ushyratasyz, aqshańyzdy, ıdeıalaryńyzdy, ıntellektýaldyq jeke menshigińizdi ózgeniń qolyna teginnen tegin qalaı berip qoıǵanyńyzdy baıqamaı qalasyz.
29.Jumysqa kóńil bóle otyryp, ómirdiń rahatyn sezinińiz.
Ómir degen tek jumystan turmaıdy. Jan men tánge de kútim kerek, jaqyndaryńyzben, dostaryńyzben kóbirek ýaqyt ótkizýge tyrysyńyz.
30.Óz ambısıańyzdan bas tarpańyz
Bastaǵan isińizdi aıaqtamasańyz, jeńilip qana qoımaı, óz-ózińizden bas tartqanyńyz dep bilińiz. Armanyńyzǵa jetý jolynda tez berilseńiz, ózińizdiń múmkindikterińizdi de kóre almaısyz. Bolmaı bara jatqan kúnniń ózinde strategıańyzdy ózgertińiz, jolyńyzdy basqa arnaǵa buryńyz, biraq eshqashan da keri qaıtpańyz.
