Mońǵolıa prezıdenti H.Battýlga Mońǵolıadaǵy mádenıet elshilerimen kezdesti. Olardyń arasynda Halyqaralyq Túrki akademıasy ǵylym bóliminiń aǵa menedjeri Aqedil Toıshanuly da bar. Bul týraly Sońǵolıa prezıdentiniń resmı saıty habarlady.

Kezdesýde Battýlga Mońǵolıa Mádenıet elshisi degen abyroıly da jaýapkershiligi zor mindetti adal atqaryp, shyǵarmashylyq eńbegimen Mońǵolıanyń mádenı qatynasyna eleýli úles qosyp júrgen azamattarǵa alǵysyn bildirdi. Prezıdent elshilerdi mońǵol eliniń áleýmettik, ekonomıkalyq, mádenı baılanystary týraly aqparat almasyp, tarıhı, mádenı muralardy júıeli nasıhattap, úkimettik jáne qoǵamdyq uıymdarmen tyǵyz birlikte, belsendi jumys jasaýǵa shaqyrdy.

Óz sózinde Battýlga: «Bizdiń keń baıtaq jerimizde ǵun, túrik, mońǵol ımperıalary ómir súrgen, álemge áser etken. Kóshpeli órkenıet dástúrge baı. Sol sebepten týrızmge asa mán berip, aldaǵy ýaqytta iri baǵdarlama jasamaqpyz. Bul júıede túrki murasyna arnalǵan keshen de boı kóteredi, men osy máseleni aldaǵy ýaqytta parlamentke tanystyratyn bolamyn», - dedi.

Qazaqstandaǵy Mońǵolıanyń Mádenıet elshisi, ǵalym, TWESCO ǵylym bóliminiń aǵa menedjeri Aqedil Toıshanuly: «Elbasy Nursultan Nazarbaevtyń bastamasymen qurylǵan Halyqaralyq Túrki akademıasy kóshpeli órkenıetti zertteýge júıeli mán berip keledi. Akademıa Mońǵolıanyń Bulǵyn aımaǵynda ornalasqan Shıveet ýlaan keshenine úsh jyl arheologıalyq zertteý júrgizdi, nátıjesi tabysty boldy. Mońǵolıa Ulttyq mýzeıimen birlesip Kerýlen jobasyn júzege asyryp, Hentaı aımaǵyndaǵy Haıaahýdag kóne túrki keshenine arheologıalyq qazba júrgizip, zertteý nátıjeli boldy. Keshenderden tabylǵan qazynalar tarıhymyzdy zerdeleýge sony serpin bereri sózsiz. Eskertkishterdi qorǵaýǵa ári saqtaýǵa úles qosylýda. Osy ǵylymı ekspedısıalarǵa kómek kórsetken Mońǵolıaǵa, áriptes ǵylymı-mádenı ujymdarǵa, ǵalymdarǵa alǵysymyz sheksiz. Aldaǵy josparlarymyzǵa qoldaý bildirip, qabyldaǵanyńyzǵa raqmet aıtamyz», - dedi.

Kezdesýge Mońǵolıanyń Syrtqy ister vıse-mınıstri B.Batseseg, Mońǵolıa prezıdentiniń keńesshisi T.Tegshjargal bastaǵan resmı ókilder, Mońǵolıanyń Mádenıet elshileri qatysty.

Aıta keteıik, Ulanbatyr qalasynda Mońǵolıa mádenıet elshileriniń alǵashqy forýmy bastaldy. Alqaly jıynda Alqaly jıynda Mońǵolıanyń Qazaqstandaǵy Mádenıet elshisi, ǵalym A.Toıshanuly sońǵy jyldary Halyqaralyq Túrki akademıasy men Mońǵolıa arasyndaǵy ǵylymı-mádenı baılanystardyń qarqyndy damyǵany týraly baıan etti. Mońǵolıa Syrtqy ister mınıstri B.Batseseg jıynǵa qatysýshylarǵa tolaǵaı tabys tilep, ǵalym Aqedil Toıshanulyn Mońǵolıa Syrtqy ister mınıstriniń arnaıy sertıfıkatymen marapattady.