Reseı Ýkraınanyń 322 azamaty men 68 kompanıasyna sanksıa saldy.

Endigi jerde atalǵan azamattar men kompanıalardyń orys jerinde qyzmeti júrmeıdi, olar alys-beris saýdamen aınalysa almaıdy. Sondaı-aq, kapıtalyn jáne qarjysyn syrtqa shyǵara almaıdy. Qysqasy,  ekonomıkaǵa qıyn tıeıin dep otyr.

Anyǵyna kelgende, 322 azamat ýkraın ultynyń baılary  nemese shetelde turatyn, biraq osy elde óndirisi men kásibin jalǵastyryp jatqandar.

Olaı bolsa,  endigi jaǵdaı qalaı bolmaq? Sarapshylardyń pikiri buǵan qatysty ekige bólinip otyr.

Birinshiden, keıbir  saıasatkerler «budan eń aldymen Ýkraına óndirisi zardap shegetinin» aıtady. Ýkraın ekonomısi Oleg Soskınniń pikirinshe,  «Reseı naryǵymen tikeleı baılanysy bar kásiporyndarǵa bul aýyr tıedi. Óıtkeni kóptegen óndiris oryndary Reseıden shıkizat alady.   Demek, endi alys-beris toqtaıdy. Munyń barlyǵy da ábden oılastyrylyp baryp ádeıi jasalǵan nárse. Sondyqtan bizdiń óndiristi jabý kerek nemese basqa jaqtan shıkizat alýdy qarastyrǵan jón».

Árıne, sanksıa jeńil tımeıdi. Budan eń aldymen kásiporyndar men ondaǵy jumys isteıtin adamdar zardap shegedi. Keıbir sarapshylar «osy ýaqytqa deıin Ýkraına tarapynyń ár túrli amal-tásilderine Máskeý kóz juma qarap keldi. Olar tıisti ádep sheńberinen asyp ketti. «Kóp asqanǵa bir tosqan». Sondyqtan Kremldiń bul jaýaby eskertý, al kelesisi tipti qatań bolady» dep otyr.

Eń bir nazar aýdararlyq másele, Reseı tarapy Donbass aýmaǵynda jumys isteıtin iri  kásipkerlerge sanksıa salmaǵan. Endi bul jaǵy aıtpasa da, túsinikti. Óıtkeni, bul aımaqtaǵy óndiris jumys isteýi kerek jáne qazirgi ýaqytta Reseımen baılanysy jandanyp tur.

Biraq budan basqa taǵy bir nárse bar, keler jyly Ýkraınada prezıdenttik saılaý ótedi. Resmı Máskeý osyǵan oraı sanksıany ádeıi salyp otyr. Oılap qarańyz, jańaǵy sanksıa salynǵan 322 baı azamat pen 68 kompanıanyń ıeleri buǵan qalaı qaraıdy? Árıne, Reseıdi, eń aldymen Pýtındi, atalǵan qaýlyǵa qol qoıǵan úkimet basshysy Medvedevti jaqtyrmaıtyny anyq. Al eń bastysy, olardyń el prezıdenti Petr Poroshenkoǵa  jek kórý sezimi kúsheıedi. Bul prezıdenttik saılaý aldynda eldegi saıası kúshterdiń Poroshenkoǵa narazylyǵyn arttyrady. Óıtkeni Ýkraınanyń ár partıasy men saıası uıymdarynyń artynda iri baılar men dáýletti kásiporyn ıeleri tur. Demek, olardyń sanasynda «búgingi aýyr jaǵdaıǵa Reseıden irgesin aýlaq salǵan Poroshenko kináli» degen uǵym paıda bolady. Sóıtip prezıdentke elde qarsylyq qozǵalysy artady. Muny aldyn ala boljap,  Reseı tarapy ádeıi jasap otyr.

Keıbir sarapshylar «prezıdenttik saılaýdyń qarsańynda salynǵan reseılik sanksıa Petr Poroshenkonyń bedelin túsirý úshin jasaldy» degen oıda. Bul endi ras. Budan shyǵatyn qorytyndy ne? Orystyń birqatar saıasattanýshylarynyń boljamynsha,  «kelesi prezıdent «Batkovshına» partıasynyń lıderi Elıa Tımoshenko bolýy múmkin». Mundaı jaǵdaıda, Poroshenkoǵa qaraǵanda bolashaqta orystardyń Tımoshenkomen kelisýi ońaıyraq.

Bir qyzyǵy, úkimet qaýlysynda «ýkraın tarapy raıynan qaıtyp, Reseı óndirisine qatysty keıbir shekteýlerdi alyp tastasa, bizdiń jaqtyń da oılanýǵa múmkindigi bar» delingen.

Boljap bilýge bolmaıtyn saıasat alańyndaǵy jaǵdaıdy túsiný árıne qıyn. Biraq  bul jerde saıası oıynshylar kóp, al zardap shegetin halyq...