Yrǵyz aýdanyndaǵy Nura, Mamyr, Belsher aýyldarynyń turǵyndary úshin qýanyshty kún keldi. Aýylǵa sý keldi.
Elbasy qazaqstandyqtarǵa arnaǵan Joldaýynda halyqtyń turmysyn jaqsartý, aýyldaǵy kúrdeli máselelerdi sheshý jóninde tapsyrma bergen bolatyn. Sonyń biri Yrǵyz aýdanynda sheshimin tapty. Nura 1963 jyly keńshar bolyp qurylǵan-dy. Odan beri 55 jyl ótipti. Osy ýaqyt ishinde turǵyndar aýyzsýǵa jarymaı, talaı qıyndyqty bastap keshirdi. Mine, táýelsizdiktiń arqasynda aýyldaǵy bul másele sheshildi. Aýyzsýdyń berilýine Yrǵyz aýdanynyń ákimi Mádı Eleýsizov pen oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Nurjan Aqqul qatysyp, turǵyndarǵa jyly lebizderin bildirdi.
Nura aýyldyq okrýgindegi 4 eldi mekende 27 sharýa qojalyǵy, 16 kásipker, 4 mektep, 1 otbasylyq ambýlatorıa, 3 klýb, 3 feldsherlik pýnkt jumys jasaıdy. Taǵy bir qýanarlyq jaıt, aldaǵy ýaqytta «Bılaın» uıaly baılanys qondyrǵysy 4 eldi mekendi qamtıtyn bolady.
— Halyqtyń qýanyshynda shek joq, rızashylyǵymyzdy aıtyp jetkizý múmkin emes. Osy kezeńge deıin jaǵalaı jatqan kólderden qysta muzyn oıyp, sý ishken aǵaıynǵa bul úlken jańalyq. Kúrmeýi qıyn másele búgingi tańda memlekettik baǵdarlama aıasynda júzege asyrylyp otyr. «Sý — tirshilik kózi» dep tegin aıtylmaǵan. Halyq densaýlyǵynyń myqty bolýy aýyzsýdyń sapasyna baılanysty ekeni anyq. Sondyqtan osy bastamanyń basy-qasynda júrgen azamattarǵa alǵysymyz sheksiz, — deıdi «Aıbek» sharýa qojalyǵynyń basshysy Erqosaı Balaev.
Al eńbek ardageri Ábdinátip Uzaqov bylaı deıdi:
— Bul kúrdeli máseleniń sheshimin tabýyna oblys ákimi Berdibek Saparbaevtyń qoldaý kórsetkenin aıqyn sezinemiz. Ekinshiden, jerlesimiz, osy eldiń perzenti, Qazaqstan Respýblıkasy Parlamenti Májilisiniń depýtaty Asylbek Smaǵulovqa, aýdan basshylyǵyna, eki jyldan beri sý qubyrynyń qurylysyn júrgizip kelgen «StroıKomplekt-2030» seriktestigine alǵysymyzdy bildiremiz.
Aıta ketý kerek, bıylǵy jyly okrýgtegi Dúken eldi mekeni mańaıynan aýyzsý qoryn izdeý-zertteý jumystary júrgizilýde. Aldaǵy ýaqytta bul aýylǵa da sý júıesi tartylady degen úmit bar. Búgingi kúni úsh eldi meken turǵyndarynyń úıine salqyn, ystyq sý kirgizilip, káriz júıesi men zaman talabyna saı qajetti qondyrǵylar júrgizilip jatyr.
