Elimizde shaıbaly hokeıden Qazaqstan Jastar lıgasynyń ótip jatqany belgili. Keshe oblys ákimi Berdibek Saparbaev Aqtóbe qalasynyń Batys-2 shaǵyn aýdanynda boı kótergen Muz saraıynda «Aqtóbe» jáne «Astana» hokeı komandalary arasyndaǵy oıyndy tamashalady.

Oblystyq dene shynyqtyrý jáne sport basqarmasynyń basshysy Meırambek Mahambetov Jastar lıgasynda aqtóbelik hokeı komandasynyń kóshbasshylar qatarynda ekenin aıtty.

— Aqtóbe qalasynda Qazaqstan Jastar lıgasy arasynda oıyn ótip jatyr. «Aqtóbe» jáne «Astana» hokeı komandalary arasynda ótken birinshi oıynda jerlesterimiz jeńiske jetken bolatyn. Jalpy hokeı oıynynyń ereksheligi — týrlar kezinde eki oıyn qatar ótkiziledi. Birinshi oıynda jerlesterimiz astanalyq komandany 10:1 esebimen utty. Ár oıyn bólek esepteledi. Bul — «Aqtóbe» hokeı komandasynyń 16-oıyny. Buǵan deıingi barlyq oıynda jeńiske jetti. Qazir týrnırlik kestede úshinshi orynda turmyz. Alaıda biz kóp komandalardyń arasynda 4-5 oıyn az ótkizdik. Jeńilis joq, barlyq oıynda jeńip kele jatyrmyz, — dedi M.Mahambetov.

Onyń aıtýynsha, Jastar lıgasynda barlyǵy 10 komanda bar. Keler jyldyń naýryz-sáýir aılaryna deıin komandalar arasynda oıyndar ótkiziledi. Búginde komanda quramynda 16-18 jas aralyǵyndaǵy oıynshylar óner kórsetýde.

Bıyl Aqtóbede alǵash ret mánerlep syrǵanaýdan el chempıonaty ótedi. Bul chempıonatqa Olımpıada oıyndaryna qatysýshy Aıza Mámbekova, Alana Toqtarova, sondaı-aq jerlesimiz Dará Vdovına qatysady dep kútilýde. Sol sıaqty 28-29 jeltoqsan kúnderi Aqtóbedegi Muz saraıynda «Muz júregi» atty muz shoýy ótpek. Bul kórsetilimdi almatylyq «Aıs Olımp» kompanıasy uıymdastyrmaq. «Muz júregi» atty shoý Aqtóbede alǵash ret uıymdastyrylǵaly jatyr. Bul — óte aýqymdy, kásibı deńgeıde ótkiziletin shoý. Shoýdyń uzaqtyǵy — 80 mınýt. Sondyqtan barlyq aqtóbelikti osy shoýdy tamashalaýǵa shaqyramyz, — dedi basqarma basshysy.

Oıyn qorytyndysynda «Aqtóbe» komandasy 11:1 esebimen jeńiske jetti.