Qoǵamdaǵy ıdeologıa daýy seıilmeı tur. Qarashanyń basynda Astanada ótken forýmda Marǵulan Seısembaevtyń ıdeologıa turǵysynda aıtqandary áleýmettiń talqysyna tústi. Bıznesmenniń aıtýynsha, memlekette ıdeologıalyq saıasat jumys istemeıdi. Kúni keshe Marǵulan Seısembaevtyń mundaı pikirine QR Aqparat jáne komýnıkasıalar mınıstri Dáýren Abaev jaýap bergen edi. Mınıstr "Rýhanı jańǵyrý" baǵdarlamasyn alǵa tartyp, jastardyń ózgeriske umtylyp jatqanyn aıtqan. Abaevtyń jaýabyna alǵys bildirgen Marǵulan Seısembaev óz aıtqanyna qaıtpady. "Qoǵamda ıdeologıa joq" deıdi.
Bıznesmenniń mınıtsrge vıdeo túrindegi jaýaby tómende.
Qurmetti Dáýren Abaev myrza!
Birinshiden, maǵan osylaı saýatty jaýap bergenińiz úshin kóp raqmet! Shynyn aıtsam, mundaı jaýapty kútpedim. Úkimet tarapynan osylaı qoǵammen pikir alysyp, ózekti máselelerdi talqylaýǵa daıyndyq kórsetken áreketińiz maqtan tutarlyq is. Árıne, úkimet tarapynan ıdeologıa salasyna jasalyp jatqan jumystar óte kóp, qabyldanǵan baǵdarlamalar óte jaqsy, maqsattary durys. Biraq siz aıtqan sózdermen kelise otyryp, qoǵamnyń kókireginde júrgen birneshe máseleni talqylaǵym kelip otyr. Ideologıa – qoǵamnyń júregine sińip, oıyn arbap, alǵa jetelemese, keleshekke degen senimdilik týǵyzbasa, meniń oıymsha, ondaı ıdeologıa óziniń bar kúsh-qýatymen jumys jasamaıdy. Onyń basty sebebi, qoǵamdaǵy senbeýshilik: sheneýnikterge, bıznesmenderge, tipti ózara bir-birine senbeıdi. Qoǵamdaǵy senimsizdik – óte qaýipti nárse. Senimsizdik bolǵan jerde eshqandaı ıdeologıa júrmeıdi. Ózińiz de baıqaǵan bolarsyz, áleýmettik jelide bolyp jatqan daýlarǵa qarasańyzdar, bári bir-birine jaý. Bul óte jaman belgi. Osynyń kesirinen kórshi elderdiń agressıvtik ıdeologıasy op-ońaı sińip ketedi. Sondyqtan ulttyq bólinis paıda bolyp kele jatyr. Erteń elimizge qandaı da bir qater týsa, elimiz talan-tarajǵa salynyp ketýi múmkin. Sony eskere otyryp, qazirden bastap el bolyp, qoǵam bolyp barlyq máselelerdi birge aqyldasyp sheshken durys dep oılaımyn. Kelesi jyl jalpy jahanǵa qıyn jyl bolaıyn dep tur. Qundy qaǵazdardyń naryǵy men shıkizat taýarlarynyń baǵasy quzdan qulaǵan tastaı bolyp kele jatyr. Munyń bári memleketimizge úlken syn bolady. Sol sebepti, bir-birimizge degen senimdilikti kúsheıtý úshin úsh shart jasaýymyz kerek:
Birinshi – bir-birimizdi estý, tyńdaý, túsiný, ózgeniń pikir aıtýyna múmkindik berý;
Ekinshi – aıtylǵan sóz ben istegen istiń birligi;
Úshinshi – istegen is pen onyń nátıjesine jaýapkershilik.
Osy úsh shartty qoǵam (sheneýnik, bıznesmen, ıa muǵalim) bolyp oryndasaq, aramyzdaǵy senimsizdik muzy erıdy. Sonda ǵana bizdi jaý almaı, talamaı, bólmeı, órkenıetti elder qataryna kire alamyz dep senemin. Biz baqytty elmiz, biraq qoldaǵy Táýelsizdikke ıe bola almasaq, tarıhı múmkindigimizdi qoldana almasaq, urpaǵymyzdyń, qazaq halqynyń qarǵysyna qalamyz. Osynyń bárin oryndaýǵa, birigip jumys isteýge daıynbyz.
Dáýke, jaýabyńyzǵa taǵy da raqmet aıtamyn. Sálemmen Marǵulan!
