Aqtóbe oblysynyń ákimi Berdibek Saparbaev jumys babymen Baıǵanın aýdanynda bolyp, oblys ortalyǵynan shalǵaı jatqan aýyldarǵa bardy, olardyń damýymen, jańa nysandardyń qurylysymen jáne aýyl halqynyń turmysymen tanysty, sondaı-aq jurtshylyqty merekemen quttyqtady.
Aýdan ákimi Asqar Sherıazdanov oblys basshysyna jergilikti jaǵdaıdy, atqarylyp jatqan jumystardy qysqasha tanystyrdy. Berdibek Saparbaev ertemen Aqtóbeden 370 shaqyrym jerde ornalasqan Jarqamys aýylyna keldi. Aýyl bıyl ortalyqtandyrylǵan aýyzsýmen jabdyqtaý júıesimen qamtylǵan bolatyn. Bul maqsatqa memleket 230 mıllıon teńgeden astam qarajat bóldi. Qurylys 2017 jyly tamyzda bastalyp, osy jyldyń qazan aıynda aıaqtaldy. Oblys ákimi sorǵylaý beketin, uńǵymany, elektrmen jabdyqtaýdyń avtonomdy júıesin qarap shyqty.
Baıǵanın aýylynda 24 eldi mekenniń 10-y ortalyqtandyrylǵan sýmen jabdyqtaý júıesimen qamtylǵan. Aıta ketý kerek, bes aýylǵa bıyl sýmen jabdyqtaý júıesi júrgizildi, bul Mıaly, Oımaýyt, Kemershı, Ebeıti jáne Jarqamys aýyldary.
Aýdanda sapaly aýyzsýmen qamtýmen qatar, gaz jelisine qosý jumystary da belsendi júrgizilip jatyr. Bıylǵy jyly Kemershı, Bulaqtykól, Jańatań, Jarly aýyldarynda gaz júıeleriniń qurylysy bastaldy.
Oblys ákimi osy saparda jańadan ashylǵan «Botaqan» balabaqshasyna bardy. Mektepke deıingi mekeme memlekettik tapsyrys aıasynda jumys jasaıdy jáne osy jyldyń qyrkúıek aıynda alǵashqy tárbıelenýshilerin qabyldady. Mektepke deıingi mekemeniń barlyq standarttaryna saı jabdyqtalǵan jańa keń ǵımarat aýyldaǵy kóne shaǵyn ortalyqty jabýǵa múmkindik berdi. Aıta keteıik, búginde Baıǵanın aýdany oblystyń basqa da aýdandary sekildi balabaqshamen 100% qamtylǵan.
Oblys ákimi sondaı-aq «Samruk KazynaTrust» áleýmettik jobalardy damytý qorynyń «Meniń elim» baǵdarlamasy aıasynda salǵan balalar oıyn alańyn qarap shyqty. Munda balalar úshin vorkaýtpen aınalysatyn, jazda fýtbol, qysta hokeı oınaıtyn alań bar, balalar alańy ornatyldy. Joba quny — 58 mıllıon teńge. «Samruk KazynaTrust» osyndaı alańdy bıyl Qaraýylkeldi aýylyna da salǵan.
Jarqamystaǵy sapar 150 oryndyq jańa Mádenıet úıiniń saltanatty ashylýyna qatysýmen aıaqtaldy. Ǵımarat aýdan búdjetine turǵyzylǵan. Jobany júzege asyrýǵa barlyǵy 86 mıllıon teńge jumsaldy. Mádenıet úıinde oblys ákimi aýyl turǵyndarymen áńgimelesip, Tuńǵysh Prezıdent merekesimen quttyqtady.
— Sizder Elbasynyń aýyldardy damytýǵa qanshalyqty kóńil bólip otyrǵanyn bilesizder. Prezıdent jýyrdaǵy Joldaýynda «Aýyl – el besigi» arnaıy jobasynyń bastalǵanyn jarıalady. Sonyń aıasynda aýyldyq aýmaqtardyń áleýmettik ortasyn jańǵyrtý tapsyrmalary berildi. Memleket tarapynan bir ǵana Jarqamys aýylyn damytýǵa bıylǵy jyly 500 mıllıon teńge bólindi. Sonyń arqasynda aýyl sýmen qamtyldy, gaz ben jaryq bar. Endi bári sizderge baılanysty. Januıalaryńyz ben týǵan aýyldaryńyzdyń ıgiligi úshin eńbektenińizder, balalaryńyzdy eńbekke, ádeptilikke úıretińizder. Eńbek pen joǵary ıntellektýaldy, rýhanı baı qoǵam — bolashaq urpaqtyń ıgiligi men el kelesheginiń kepili. Búgin men sizderdi Tuńǵysh Prezıdent kúnimen, sonymen qatar Mádenıet úıiniń ashylýymen quttyqtaımyn. Sizderge myqty densaýlyq, otbastaryńyzǵa bereke, elimizde beıbitshilik pen kelisim bolsyn dep tileımin, — dedi Berdibek Saparbaev.
Burynǵy Mádenıet úıi 1957 jyly salynǵan, al bes jyl buryn ǵımarat apatty jaǵdaıda dep tanyldy. Sonyń saldarynan balalardyń barlyq úıirme sabaqtary mektepte ótti. Aýyl turǵyndary byltyr bılikten jańa Mádenıet úıin suraǵan bolatyn. Jańa Mádenıet úıinde endigi bımen, sýret salýmen, qoldanbaly ónermen jáne t.b. aınalysatyn bólmeler bar. Júzge jýyq bala úıirmege baratyn bolady.
Oblys basshysynyń Baıǵanın aýdanyndaǵy jumys sapary Qojasaı munaı-gaz ken ornynda jalǵasty. Munda oblys ákimi quny 42 mıllıard teńge bolatyn «Gas Processing Company» JSHS-nyń gaz óńdeý keshenin paıdalanýǵa berý úshin daıyndyq barysyn tekserdi. Kásiporyn jyl saıyn 350 mıllıon tekshe metr ilespe gaz óńdep, ony qurǵaq taýarly gazǵa, gazdy kúkirtke, propanbýtan qospasyna aınaldyrady. Qurylys kezinde 1500 adam jumyspen qamtyldy, paıdalanýǵa berilgen soń 250 adam turaqty jumysqa ornalasady.
