Osyndaı oı menen uzaq ýaqyt shyqpaı qoıdy. Jyldar boıy. Onneshe jyl kúızeliste júrdim. Syrtym ótirik kúletin. Oı jep qoıady eken. Tipti shashym aǵaryp ketti. Qylaıaǵy úıdi "remonttamaı" qoıdym. "Ákess... qalatyn dúnıe ǵoı" dep. Eńbekti qurmetteıtin Germanıaǵa, adaldyqty baǵalaıtyn Fınlándıaǵa ma, ıa bolmasa, talantty qadirleıtin Amerıkaǵa bezip ketkim keletin. Ózimmen ózim arpalysyp júrdim. Arpalysýymnyń sebebi: Ketsem, ishimdegi ultshyl ekinshi men «Qashyp kettiń, satqyn ekensiń, jeńildiń, álsizsiń!» deıdi-aý. Birinshi ınternasıonalıs men aıtady: komýnıstik-korrýpsıalyq júıeni sen buza almaısyń, memlekettik mashınanyń bir tetigi ǵanasyń, syr berseń, aýystyra salady, senen basqa qosalqy bólshekter órip júr, bul qazaq adam bolmaıdy, ózińdi, bala-shaǵańdy oıla, adamǵa jer shary ortaq, «Tek Qazaqstan aýmaǵynda ǵana tirshilik et» dep saǵan qudaı buıyrǵan joq... 
Kez kelgen saıası oqıǵa, málimdemeniń aıaǵy qalaı bolatynyn bilip turasyń. Kez kelgen adammen sóılesken soń jarty saǵattan keıin sol adamǵa pátýa shyǵaryp tastaısyń «Sen Asan, dúnıe-múlik jınap, qaryn quryshyńmen oılap, ǵumyryńdy osylaı ótkizesiń, al sen Úsen, mı quryshymen oılap, ómir boıy osy júıede tozyp ótesiń...» dep...
Myna bir jyndybas klastasyń júr qaı sulýdy qalaı «netkenin» aıtyp maqtanyp, ana bir syılaıtyn jigit júr «Adal ómir súrý aıasy tarylyp barady» dep túńilip, endi bir kýrstasyń júr tenderdiń arqasynda «Sheshess... osynsha aqsha jasadym» dep Taılandta demalyp, aýyldasyń júr ǵylymǵa berilip, ıpotekaǵa alatyn úıdiń alǵashqy jarnasyn da taba almaı... Ana jigit ýaǵyz aıtyp ketti, myna jigit sony tyńdap júr, ana jigit teledıdardan kóringenine máz, myna jigit sol teledıdardaǵy jigittiń "slýjagy" bolǵanyna máz... Mán-maǵynasyz ómir, ásheıin...
Eýropa, AQSH, japon elin zerttedim. «Bular qalaı damyp ketti?!» dep. Bir biriniń talantyn, eńbegin, adaldyǵyn baǵalaıdy eken. Qarapaıym ǵana nárse. Bir -birinen talap etedi eken. Aıqaılamaı-aq talap etken. Orta ǵasyrda aıqaılaǵan. Bir- birin qyrǵan. Sosyn sharshaǵan soń, zańǵa baǵynǵan. Zań boıynsha ǵana júrip keledi. Zańǵa baǵynbaǵandy dereý ornyna qoıyp otyrady. Al biz bolsaq, «Vıdeoregıstratorǵa túsirilgen beınejazbany bermeımiz, «stýkach» bolmaımyz!» dep ottap júrmiz. 
Eýropa sóıtip, sharshap-shaldyǵyp osy ómirge jetti. Eńbekpen, talantpen, adal jolmen. Endi sol elge bir orys bardy emıgrant bolyp. Jumys taýyp alǵansha «posobıe» alyp jatyr. Tamaq toq, kóılek kók. Onyń artynan ýkraın bardy, saıası baspana surap. Berdi. Ol da máz. Jatypisherlerdiń qataryn toltyrdy. Kóshede bir- birine qaraıdy. Qaraıdy da, «Nemister qaıda?» deıdi. Nemister jumys istep júr. Kóshede qydyrýǵa ýaqyt joq. Týra Óskemen sıaqty. Kelgender «qazaq kóbeıip ketipti ǵoı!»,-deıdi. Qazaqtar kóshede, bazarda júr qara kórcetip. Orystar «ÝMZ», «Qazsınk», «Tıtan magnıı» kombınatynyń ishinde júr jumys istep.
Ǵasyrlar boıǵy kúresiniń (eńbek, revolúsıa, evolúsıa, adal qyzmet) nátıjesinde búgingi baqýatty tirshilikke jetken Eýropaǵa jetip baryp, aramtamaq bolýǵa namys jibermeıdi eken. 
Nemis kempir taıaǵyna súıenip turyp, soqtaldaı saǵan «Óz elińdi (úıińdi) jóndeýge shamań, jigeriń jetpedi me?» dese, jer bolasyń ǵoı.
Sol. Aıtpaǵym osy ketkisi keletin qyz-jigitterge...

Aıdos Juqanulynyń feısbýktegi paraqshasynan