Bir dosymdy izdep Astanadaǵy aǵylshyn tilin oqytatyn ortalyqqa bardym. Ýaqytynan buryn baryp 15-20 mınýttaı kútýge týra keldi. Sol aralyqta baıqaǵanym til úırenemin degen jastar óte kóp. Ortasha eseppen aıyna 20-25 myń teńgeden tóleıdi. Bir jyldan astam ýaqyt úzdiksiz qatysyp júrgender de bar. Jalpy jastardyń shet tilin úırenýi qýantarlyq jaǵdaı.
Ortalyqtyń ishinde otyryp jasy 40-45 shamasyndaǵy Tashkenttiń ózbegimen tanystym. Qazaqstanda tórt jyldan astam ýaqyt eńbek etip júr. Úı jóndeý jumystaryn (evroremont) júrgizedi eken. Álgi ózbegimiz tórt jylda bir aýyz qazaqsha úırenbegen. Orysshasy jaqsy. Qazaqstanda orys tiliniń arqasynda nan taýyp júr. Biraq aldyna qoıǵan maqsaty — 1 jylda aǵylshyn tilin úırenip AQSH-qa ketý. Sol úshin Astanada tapqan aqshasynyń bir bóligi men ýaqytyn aǵylshyn tilin úırenýge jumsaýǵa bel býypty.
Meni oılandyratyny mynaý: Túrkıada, AQSH-ta oqydym. Ol jaqta taksıst bolý úshin de, remont jasaý úshin de túrik ne aǵylshyn tilin bilýiń kerek. Sebebi qyzmet barysynda tapsyrys berýshimen baılanys ornatatyn basqa til joq. Qalasań da, qalamasań da úırenesiń. Óziń úshin úırenýge talpynasyń. Qoǵam sondaı. Talap sondaı. Álemde adam quqyǵyn qorǵap, demokratıany tý etip júrgen el — AQSH. Biraq dúnıeniń ár tarapynan qansha ult ókili kelse de, Nú-Iorkte nan tabý úshin 4 jylda aǵylshynsha ózi-aq saırap shyǵady. Túrkıada túrik tiliniń qanshalyqty mańyzdy ekeni aıtpaı-aq túsinikti. Ol túgili kórshi Ózbekstanǵa baryp dúkenshimen oryssha sóılesseń, ózbekshe jaýap beredi. Tashkentte bolǵanda basymnan ótken soń bilemin...
Al bizdegi beıshara jaǵdaıdy qarańyzshy! Biz túgili shetten kelgen jumysshylarǵa deıin Qazaqstanda qazaq tilin kerek qylmaı, birneshe jyl jumys istep, aqsha taýyp, Tashkentte qalǵan otbasyna qarjy aýdaryp, AQSH-qa ketý úshin Astanada aǵylshyn tilin oqyp, qazaq tilin bilmeı-aq Qazaqstanda ózderin jaıly sezinip júr. Shetten kelgen jumysshylarǵa da Qazaqstanda nan tabý úshin qazaq tiliniń keregi joq bolǵany ǵoı.
Negizi bizdi basqaryp otyrǵan keshegi komýnıser tárbıelep ósirgen búgingi bıliktiń bir minezi — "tym dalaqpaı". Komýnıser "Orystyń tili — uly til" dep mılaryna jaqsylap quıǵan bolýy kerek áli kúnge memlekettik tildi bosaǵada ustap keledi. Orys tili de, aǵylshyn tili de kerek. Úırense ár azamattyń ózine jaqsy. Biraq, ózge tildi úırený, shet tildi Qazaqstanda qoldaný qazaq tiliniń esebinen júrgizilmeýi kerek. Bizdiń "dalaqbaılar" sony túsinbeı júr ǵoı. Meniń oıymsha Qazaqstanda turatyn barlyq ult ókilderi bir tilde sóılemeı, memlekettik tilimiz óz shynaıy mártebesin almaı Qazaqstan xalqy eshqashan birtutas bolmaıdy. Men óz elimde, ózimniń ana tilimniń bıikte bolǵanyn qalaımyn. Muny iske asyra almaǵan bıliktiń el tizginin ustaıtyn ýaqyty da, saǵaty da sanaýly bolatyn shyǵar. Bul salada reforma men ózgeristiń qajet ekennin ýaqyt ózi-aq dáleldep keledi. Sebebi shydamnyń da shegi bar!
Bauyrzhan Serikbayev-tyń facebook-taǵy paraqshasynan
