Denıs Tenniń ólimine kináli dep tanylǵan Arman Qudaıbergenov marqumnyń otbasynan keshirim surady, dep jazady Qamshy.kz aqparat agenttigi KazTAG saıtyna silteme jasap.

«Denıs Tenniń otbasynan jáne búkil qazaqstandyqtardan keshirim suraımyn. Men ony óltirgim kelgen joq, jáı ǵana aqsha tabýdy kózdedim. Buryndary sotty bolǵandyqtan jumys taba almadym. Moıyndaımyn, urlyq jasadym. Men ony aýyr jaraqattaǵan joqpyn, meniń qolymda oǵan qatty zaqym keltiretindeı sýyq qarý bolmady. Qasaqana óltirdi degenge kelispeımin, biz tek urlyq jasaımyz dep kelisken bolatynbyz», - dep aıtty Arman Qudaıbergenov juma kúni tergeý barysynda.

Aıta keteıik, bul is Almaty qalasynyń mamandandyrylǵan aýdanaralyq qylmystyq sotynda qaralýda. Sot otyrysy sýdıa Keńshilik Ábdeldınovtiń tóraǵalyǵymen ótip jatyr. Búkil eldi shýlatqan bul qylmystyq iske Arman Qudaıbergenov, Nuraly Qıasov pen Janar Tolybaeva kináli dep tanylǵan.

Esterińizge sala keteıik, ótken jyldyń 19 shildesinde qazaqstandyq mánerlep syrǵanaý sheberi Denıs Ten Almaty qalasynda pyshaq jaraqatynan kóz jumǵan bolatyn. Denıs Ten kóliginiń aınasyn urlamaq bolǵan qaraqshylarmen tóbelesip, eki qylmysker oǵan pyshaq jaraqatyn salǵany belgili boldy.