Qazaqtan qyz alǵyń kelse - márhabat. Biraq, memleket paıdasyna salyq tóle! Belgili zańger Abzal Quspan osyndaı bastama kóterip, Eýrazıa arnasynda pikir bildirdi. Onyń oıynsha, bul ataq-abyroı jınaýdy kózdeıtin pıar qadam emes, túsingen janǵa atalǵan ıdeıanyń astarynda ult múddesi jatyr. Kórshi túrikmen halqynan úlgi alyp, mundaı qadamǵa barǵan durys pa? Qyz-kelinshekterdiń pikiri qandaı?

Qazaqtyń qarakóz qyzynyń sheteldikter úshin quny bar. Zańgerdiń osy sózi Qaznette qyzý talqyǵa túsýde. Abzal Quspan bylaı deıdi:

«Ulttyń keleshegin oılaý qaperlerine kirmeıdi. Osy máseleni aınaladaǵylarǵa aıtsań: «Ózge ulttyń kóńiline keler. Oqys jaǵdaı týyp keter. Qazir zaman basqa, qyz kimdi kóńili qalasa, sonymen birge bolǵany jón ǵoı», - degen jaltaq ýáj aıtady. Bul  qazaqtyń bolashaǵyna beı-jaı, samarqaý qaraý degen sóz. Munyń bárin biz aıtpasaq, kim aıtady? Qazaq úshin oılanatyn da, tolǵanatyn da másele kóp».

Zańgerdiń paıymyna salsaq, bizdiń qyzdar balabaqshadan bastap qolyna dıplomyn alǵanǵa deıin  oqıdy-toqıdy. Sosyn, boı jetkende ózge ulttyń qolynan ustap kete barýy durys emes. Osy taqyrypqa oraı, astanalyq arýlardyń pikiri qandaı?

«Eger ondaı sheshim qabyldanatyn bolsa, onda men quptaımyn. Joǵarydaǵy basshylyq ózi biledi ǵoı: ne durys, ne burys ekenin. Óz basym men qazaq jigitine turmysqa shyqqym keledi», - dedi bir arý.

«Meniń oıymsha, bul durys emes. Ár adam ultyna qaramaı súıgen adamyna qosylýy tıis. Sondyqtan men kelispes edim», - dedi taǵy bir boıjetken.

Mahabbatty ǵylymı kategorıaǵa jatqyza almaısyń. Oǵan sot júrmeıdi. Áleýmettanýshylar usynǵan sońǵy statısıkaǵa mán bersek, aralas nekelerdiń úles salmaǵy tym kóp emes eken.   

«Sońǵy kezderdegi kórsetkishterge qarasaq, aralas nekelerdiń sany sonsha kóp emes. Jáne onyń kólemi ulttyń bolashaǵyna sonshalyqty qaýip-qater tóndirmeıdi de, asımılásıaǵa ushyraıtyndaı taǵy basqa. Ózge memleketter sıaqty aralas nekege salyq salyp, erekshe qosymsha bir tólemaqy alý ol meniń óz túsinigimde onsha kóńilge qonbaıdy», - deıdi áleýmettanýshy Ramazan Sattaruly.

Bul máselege qatysty depýtattar da sóılepti. Nurtaı Sabılánovtyń pikirinshe, bul úrdisti ózgertýdiń bir joly mynada.

«Ózimiz otbasymyzda tárbıe júrgizip, ózimizdiń azamattardy qazaqtarǵa turmysqa shyǵaryp, qazaqtan qyz alýdy jalǵastyrýymyz kerek. Al qazirgi jaǵdaıda basqa ultqa shyǵyp jatatyn bolsa, nege shyǵyp jatyr, sony zerttep, taldap aldyn alý kerek dep oılaımyn», - deıdi Parlament Májilisiniń depýtaty Nurtaı Sabılánov.

Babalarymyz «tárbıe  tal besikten bastalady» deıdi. Áńgimeniń túp-tórkini osyǵan kelip tireletindeı. Mahabbat, aralas neke degen másele bar jerde ulttyń múddesi, qan tazalyǵy degen taqyryptar da tóbe kórsetedi. Qazaqtan qyz alǵan ózge ult ókilderi  memleket paıdasyna salyq tólesin degen zań búgin-erteń qabyldanýy ekitalaı. Biraq, talqylaýǵa túsip, túbi ıdeıa retinde pisip, aqyry usynysqa aınalýy ábden múmkin.