4 jasar bala fılmdi kórgen soń, Sartaı sekildi batyr bolyp, atqa shabýdy, elin qorǵaýdy armandaıtynyn aıtypty. Endigi balalardyń keıipkeri Betmen, Sýpermen nemese Órmekshi adam emes, Sartaı batyrdyń bolatynyna senimiz mol. Sulýlyqqa qyzyqqysh qylyqtylarymyz da káristiń qysyqkóz Ký Chýn Pesyn emes, endigi rette Sartaıdy «ıdeal» tutatyn bolady. Áleýmettik jelidegi Sartaıdyń (Asylhannyń) meken-jaıyna jiberilgen san myń pikirler osyny ańǵartty. Suhbatta – «Jaýjúrek myń baladaǵy» eki bala. Jas akterler, Temirbek Júrgenov atyndaǵy Óner akademıasynyń stýdentteri Asylhan Tólepov pen Aıan Ótepbergen.

– Ózderińizben jaqynyraq tanyssaq... Asylhan: Men 1992 jyly Aqtóbe oblysynyń Oıyl aýdany, Jetikól sovhozynda dúnıege keldim. 1996 jyly otbasymyzben Almatyǵa kóship keldik. Orta mekteptiń 9-synybyn bitirgennen keıin, 2008 jyly T.Júrgenov atyndaǵy Qazaq ulttyq óner akademıasy janyndaǵy kolejdiń akter mamandyǵyna qabyldandym. Al qazir osy óner ordasynyń birinshi kýrsynda «sóz sóıleý sheberligi» fakúltetinde, profesor Darıǵa Turanqulovanyń mektebinde shyńdalýdamyn. Memlekettik granttyń ıegerimin, bolashaq prezıdenttik stıpendıanyń úmitkerimin. Aıan: Almaty qalasynda dúnıege keldim. Bastaýysh mektepti osynda bitirgen soń, belgili sebeptermen ata-anam Shymkentke kóship ketti. Men birer jyl aýylda aǵamnyń qolynda tárbıelendim. Keıin Almatyda 9-synypty bitirip, T.Júrgenov atyndaǵy óner akademıasynyń kolejine oqýǵa tústim. Esim Segizbaevtyń sheberhanasynda, ıaǵnı akter sheberligi boıysha oqydym. Asylhan ekeýmizdiń dostyǵymyz osy kezden bastalǵan. Sodan beri birgemiz. Úshinshi kýrsta «Jaýjúrek myń bala» fılminiń irikteýinen ótip, fılmge tústik. Búginde T.Júrgenov atyndaǵy Óner akademıasynyń 1-kýrsynda «akter sheberligi» boıynsha bilimimdi jetildirip jatyrmyn. Munda aqyly bólimge tússem de, «Qazaqfılm» kınostýdıasy oqý aqysyn óz moıyndaryna alýda. Aldaǵy ýaqytta memlekettik grantqa úmitim bar.

– Kópshilikke Sartaı men Taımas tanys. Al Asylhan men Aıandy qanshalyqty tanıdy? Asylhan: Almatyda eshkim tanyp, sýretke túsýge shaqyryp, qoltańba surap jatqan joq. Óıtkeni kóbisi tanı bermeıdi. Tanı qalsa da, «kınoda irisiz, al ómirde kishkentaı ekensiz ǵoı» dep tańqalysyp jatady. Biz premeradan keıin Elordaǵa barǵan bolatynbyz, sonda astanalyqtar nazar aýdaryp, Sartaı dep tanyp jatty. Aıtqym keletini, «juldyzdyqty» áli sezine qoıǵan joqpyn jáne sezinbeı-aq qoısam eken deımin. Qarapaıym bolyp qala bergim keledi. Aıan: Bizdi atymyzben atap tanymasa da, Sartaı, Taımas dep tanyp jatatyndar bar. Biraq báriniń birinshi aıtatyny – «Sender kishkentaı ekensińder ǵoı».

– Qomaqty qalamaqyǵa ıe boldyńyzdar. Kólemin suramaı-aq qoıaıyq, biraq ne maqsatqa jumsamaqsyzdar?  Asylhan: Ázirge bilmeımin. Ata-anama berdim ǵoı, bárimizge ortaq tabys. Úı alý josparda bar, biraq dál qazirgi qalamaqym úıge jete qoımaıdy. Áli de kóp eńbektený kerek.

 – Rejıser Aqan Sataev bul kınokartına arqyly qazaqtyń patrıottyq sezimin oıatýǵa tyrystyq deıdi. Osy maqsatqa jete aldyq dep oılaısyzdar ma? Asylhan: Eń bastysy, bizdiń ónerimiz halyqtyń kóńilinen shyqty. Oǵan qoǵamda aıtylyp, jazylyp jatqan pikirler kýá. Biz jas maman retinde, qazaqtyń jas urpaǵy retinde osy róldi óz dárejesinde somdap shyǵýǵa tyrystyq. Jaqsy dúnıe jaryqqa shyǵý úshin boıymyzdaǵy bar kúsh-qýatymyzdy, ynta-jigerimizdi kınoǵa arnadyq. Fılm otandyq kınoteatrlardan kórsetilip jatyr. Ázirge jaqsy pikirler kóp. «Bitken iske synshy kóp» degendeı min taǵyp jatqandar da joq emes. Árıne, bul syndy ádil dep baǵalap, bolashaqta ornyn toltyrýǵa tyrysatyn bolamyz. Aıan: Kórermenniń fılmnen alǵan áserin baıqap kórýge ádeıi kınoteatrǵa bas suqtym. Kórermenniń keıbireýi kózderine jas alyp, qol shapalaqtap jatty. Qatty tolqydym. Ózimniń de fılmdi akter retinde emes, qazaq retinde tamashalap, júregimniń titirkenip ketkeni bar. Buryn-sońdy almaǵan áser alyp, boıymdy rýh kernedi. Qazaq ekenime maqtandym.

– Qazaqfılmge bergen vıdeosuhbattaryńyzda ekeýińiz de róldi bizge kınogerler túsindirip, aýzymyzǵa shaınap salyp bergendeı boldy degen ekensizder. Sonda bul óz betterińizshe izdenbedik degenge saıa ma, qalaı? Asylhan: Nege izdenbeske? Osy rólge bizdi bekitkennen keıin, daıyndalýǵa jarty jyldaı ýaqyt berildi. Osy ýaqyt ishinde biz ulttyq kitaphanaǵa baryp, tarıhı kitaptardan, oqýlyqtardan Ańyraqaı shaıqasy men Sartaı batyr týraly oqyp, tanystyq. Mektep qabyrǵasynda oqysaq ta, bul joly tereńirek bilýge tyrystyq.

–Sizder qandaı stýdentsizder? Sabaqqa keshigesizder me? Aıan: Joq, negizi keshikpeýge tyrysamyz. Keıde jastyqtyń býymen júrip qalyp, tańerteń uıyqtap qalatynym bolmasa, áıtpese keshikpeımiz.

– Qaltalaryńyzda qansha aqsha júredi kúnine? Asylhan: 500-700 teńgeniń kóleminde. Odan artyq ustamaımyn. Bir kúngi shyǵynyma: baryp-kelýime, túski asyma jetedi. Keshki asty úıden ishemin. Aıan: Biz de qarapaıym stýdentpiz ǵoı. Kóp degende, 2-3 myń teńge bolatyn shyǵar, odan artyq bolmaıdy. Keıde tipti avtobýsqa aqsha bolmaıtyn kezder de bolady.

Áńgimelesken Janıa Abdibek