Ózge eldi qaıdam? Qytaı elindegi qazaqtar qalaǵan kezinde shetelge shyǵatyn tólqujat ala almaıdy. Ol úshin buryndary arnaıy shaqyrtý qajet bolǵan. Qazir «ishine tólqujatynyń kóshirmesin salyp, tıisti týystary hat jazsyn» degen jarlyq shyǵypty. Qazaqtyń bári týys. Endeshe qazaqqa qazaq qosýǵa atsalysyńyz aǵaıyn! Hat kútip jatqan aǵaıyndy biz aıtyp beremiz… Siz tek hat jazyńyz. Oralmandarǵa baılanysty oı-pikirińizben bólisip, saıtqa jarıalaý bizdiń moınymyzda. Bul hattar jaı hat emes, tarıhqa taspen jazylatyn hat.

Darhan Beısenbek, jazýshy, «Taǵdyr taqtasy» áńgimeler jınaǵynyń avtory: 

Shekaranyń shektegeni bolmasa...

Assalaýmaǵaleıkým, Aǵa!

Shekaranyń shektegeni bolmasa aýylymyzdyń arasy, qazaqsha aıtsaq, bir-aq adym. Biraq sol bir adymdy attaý bárimizge ońaı soqpaı tur. Bizdiń qoldan keletini osylaı hat jazyp, habar alysý. Reti kelse tıisti qujattaryńyzdy jasatyp, Atamekenge at basyn burarsyz!

Qudaıǵa shúkir! Kelem degen qazaqqa jol ashyq! Kóshi-qon máselesinde keıbir keleńsiz jaǵdaılardy estip jatsańyz, ol ýaqyttyq qana kedergiler dep esepteımin. Qatarynyń kóbeıgenin qaı qazaq jek kórsin?! Naǵyz qazaqtardy aıtyp otyrmyn.

Basyńyzǵa úı salyp, baýyryńyzǵa qazan aspasaq ta, erýligin alyp shyǵar el daıyn. At-kóligińiz aman turǵanda, tulparyńyzǵa qamshy basyńyz aǵa!