Shoqynyp ketpeńizder!

Aldymyzda hrıstıan dini ókilderine tıesili Kreshenıe, ıaǵnı "sýǵa túsý arqyly kúnádan tazarý" dinı rásimi kele jatyr. Munyń bizdiń qazaq halqyna jáne barsha musylman qaýymyna múldem qatysy joq.

Ókinishke qaraı, buǵan deıin osy shoqyný rásimine hrıstıandyqtarmen qatar ózimizdiń keıbir qazaq baýyrlarymyz da asa belsendilikpen qatysyp, qańtardyń aıazynda qara sýǵa shomylyp júrgenin kórdik. Esterińizde bolsyn, eger ol jerge basqa dindilerge eliktep, "osylaı jasasam, kúnádan arylady ekenmin" dep barsańyz, adasqandardan bolasyz. Odan Alla saqtasyn! Sebebi, bular «Shynynda, Alla degen – Márıam uly Isa» dep adasqan qaýymnyń ókilderi. Bul – adamnyń emes, Alla Taǵalanyń ıaǵnı, Quran sózi. Eger deneńizdi shynyqtyrý maqsaty bolsa, basqa kúni baryńyz. 

Allanyń elshisi, sońǵy Paıǵambarymyz Muhammed (salallahý ǵalaıhı ýassalam) bir hadısinde "Kimde kim bir qaýymǵa eliktese, ol solardan" dep aıtady. Al hrıstıandyqtardyń bul kúnderi jappaı sýǵa túsýiniń máni nede? Qysqasha baıandaıyq.

Oblystyq Máshhúr Júsip ortalyq meshitiniń baspasóz hatshysy Amantaı Toıshybaıulynyń sózinshe, «Kreshenıe» sózi grek tilinen aýdarǵanda «batý» degen maǵynany bildiredi. Olardyń senimderi boıynsha, osy kúnderi jer betindegi barlyq sý ataýy jańaryp tazarady-mys. Iaǵnı, shirkeý ákeıi sýǵa belgili duǵalardy aıtyp, aıqyshty (kres) batyrady. Osydan keıin ol sý kıeli atanyp, soǵan shomylǵan kisi rýh tazalyǵy men tán tazalyǵyna qol jetkizedi eken. 

Al endi oılańyzdar, taza sý adam denesiniń kirin ketirýi múmkin, biraq "kúnásiz, pák" qylyp shyǵarady degendi eshqandaı sanaǵa syıdyrý, kóńilge qondyrý múmkin emes. 

Aǵaıyndar, musylmandar, quldyń Qudaı aldyndaǵy paryzy ol nárse emes. Allaǵa jaqqyńyz kelse, kálımaǵa til keltirińiz, mańdaıyńyzdy sájdege tıgizip, zeket berińiz. Oraza ustap, Qajylyq paryzyn óteńiz. Musylmannyń mindeti – osy!

Tileýberdi Sahaba