***

Almaty – quj-quj qaınaǵan qazan ǵoı! Naǵyz «burqyldaǵan» tirshilik! Biri túbine túsip kúıip, qaıta oralyp, endi biri pisip, ózgesi qazan túbine jabysyp, pysyqtary quıylar sorpamen betine qalqyp shyǵyp jatyr. Qolynan kelgeni qonyshynan basyp, qolynan kelmegeni qonysh astynda qalyp, bolmasa, sol basqan izin qaıta basyp degendeı, áıteýir tirshilik, ólmestiń qara kúni. Adamdar, ýa, adamzat, bir sát ótinish, kidirińdershi?! Bir mezet toqtańdarshy?! Bılik te, aqsha da, qunsyz dúnıe de qurysyn, anaý jetimniń janarynda mólt-mólt jasty qarańdarshy...

***

Medısınalyq ortalyqtamyn. Kezek kútip turmyn. Bir adamnan soń esiktiń arǵy jaǵyndaǵy dárigerdiń júzin kórý baqytyna ıe bolamyn, buıyrsa. Aldymdaǵy – qazaq jigit.. kirdi. Qabyldap otyrǵan da eki qazaq áıel ekenin esik sańylaýynan kórdim. Úsh qazaq. Iá, dál taptyńyz! Orys tilinde «saırap» jatyr. Qazaqpyz. Qanyń qaınaı ma?

 ***

Avtobýs. Barlyǵy da sharshap tur. Túrtseń qular. Tań azanymen jumysqa asyqqan ashýshań adamnyń biri de joq. Bári momyn, bári sabyrly. Bárimizdiń de kózdegenimiz – tezirek úıge jetý. Bir aıaldamadan qos arý kirdi. Qazaqtyń qoıý  qara shashty, áp-ádemi qyzdary. Sulý-aq... Birin-biri endi kórgen-aý shamasy, áńgimeleri taýsylar emes. Taǵy da dál taptyńyz, ekeýin baılanystyryp turǵan orys tili. Qazaqpyz-aq... Tilimiz týrasynda biraz aıtarymdy aıtyp, bar bolsa, júzderine uıatyn shyǵaraıyn desem, sóıleýge shama joq. Kólik ishindegilerdiń de óz aıtary tabylar-aq edi, tek, sharshap... İshki daýysym bir shyńǵyryp qoıa berdi. Qazirgi jastar – bilip týǵan...

 ***

Men ósekshimin be? «Ósek» tyńdaımyn, demek...uıat-aı. Biraq «ony» aıtatyndar «áńgime» aıtyp jatyrmyn dep aıtady ǵoı. Demek, ósekshi emes, áńgimeshilmiz...

«Áńgimeniń» basty keıipkerin óz kózińmen kórip, álginde aıtylǵan «áńgime» ıesi ras sol ma, sol emes pe, aıtylǵan «maqtaýlar»  ıesine jarasa ma, joq pa, júzine qarap bilgiń kelip turady eken. Quddy, júzinde jazylyp turǵandaı.

Áste, jotańa jabysqan shońaınany deneńe batsa ǵana sezesiń, bilesiń.

Bireýdiń bireýdi iliktirip alyp, «ádemi» «áńgime» shyǵarǵany durys pa eken osy?! Sol «áńgimeni» tyńdaý barysynda, óziń de kezekti «erteginiń»  týýyna sebepshi bolǵan «keıipker» ekenińdi sezbeı qalasyń...

Aıtylǵan sóz aǵyp ketken sý sıaqty, jaı sý emes, qoljýǵyshtyń sýyndaı. Qane, qoljýǵyshtyń astyndaǵy shelekten bes sekýnd burynǵy taza sýdy kórsetshi?!.