«Aýylda týdyq, aýylda óstik. Aýyldan túlep ushtyq. Sol ushqannan qaıtpadyq. Men, jaraıdy, qyz balamyn. Jat jurttyq. Osy Almatyda júrip, Qudaı qosqan teńim tabylyp, qalyp qoıdym. Shúkir, ósip-ónip otyrmyz.

Al sen, baýyrym, áli ushyp júrsiń. Mektep bitirgenińe on jyl boldy. Aýylǵa qaıtatyn oıyń joq. Ne júris? Qandaı arman? Ne maqsat? Aınaldyrǵan úsheý-aqpyz. Aǵamnyń esiginiń aldyna shyqsań, sasyq ıisten basyń aınalatyn, eki bólmeli kúrketaýyqtyń uıasyndaı "vremánkasynda" qashanǵy qystyrylyp tura bermeksiń? Aýyldaǵy dańǵaradaı jeti bólmeli úıimizde áke-sheshemiz qashanǵy sopaıyp otyrady?! Jerdiń jánnátyn, taza aýa, ulan ǵaıyr dalany, asqaq taýlar men kerbez tóbelerdi nege osy tas qaladan, las qaladan, óziń turyp júrgen Almatynyń bar qoqysy jınalatyn aýdanyndaǵy kúrkeden kem kóresiń? 

Esińde me, ákemiz aıtýshy edi ǵoı: «Men kesh úılenip, osy úsheýińe áreń jettim. Endi senderdiń árqaısysyńda keminde bes baladan bolýy kerek» dep. Aǵamyzdy kórip tursyń, densaýlyǵy joq. Aýyldan ketkende qandaı edi? Taza tamaq jep, taza sý ishken aptaldaı azamat edi ǵoı. Onyń ózi qansha jyl júrdi, páterden páterge kóship. Áke-sheshemiz aqsha tólep, kolej bitirtti. Mamandyǵy boıynsha bir kún de istemedi. Óıtip-búıtip áıteýir, jer alýǵa qoly jetti. Ony da anamyzdyń mektepten alatyn jalaqysyna nesıe alyp, ákemizdiń baqqan sıyr, jylqysyn satyp áreń aldy. Ózi de aýyr júk túsirip, vokzalda istep, aqyry densaýlyǵyn qurtty. Qudaıǵa shúkir, bir qyzy bar, áıteýir. Ómiri eshteńege rıza bolmaı júretin jeńgeńniń qas - qabaǵyna qarap, kúńkilin tyńdap júrgenshe, anańnyń aıaly alaqanynyń astynda, shesheńdi, ákeńdi alaqanyńa salyp, nege aýylda turmasqa?

Baıqaısyń ba, aǵamyz aýyldan ketkeli áke-sheshemizdiń nesıeden kózderi ashylmady. Qurylysqa aldy. Sodan soń "mashına alam" dedi, odan mashınasyn soqty. Ony neshe ret jóndetti. Eskiniń maıy tatymaıdy emes pe, aqyry satty. Ákemmen jaqynda sóılestim, taǵy nesıe alyp saǵan mashına alypty ǵoı. Maǵan aıtpaıdy. Ursamyn ǵoı.  Seniń de istep júrgen jumysyń jumys emes. Ekspedıtor. Úsh jyl kolejdi ne úshin oqydyń? Aptasyna alty kún, kúnine segiz saǵat rúlde otyrasyń. Ol azdaı aýyr aýyr taýar túsiresiń. Otaý quryp, balaly bolǵyń kelmeı ma? Túrikter seni aıaıdy ǵoı deısiń be, densaýlyǵyń jaramaı qalsa, laqtyryp jiberedi. Ornyńa taǵy bir qazaqty alady sen sıaqty, «armany pás, maqsaty bulyńǵyr». Sol alatyn 80 myńdy aýylda otyryp-aq, densaýlyǵyńdy qurtpaı, kerisinshe taza aýada shynyǵyp júrip tabýǵa bolady ǵoı. 

Anaý úsh úıden keıin turatyn Aıbardy qarashy. Senen eki-aq jas úlken. Aýylda-aq turady. Mingeni - jańa mashına. Úıin tap-tuınaqtaı etip jóndep qoıǵan. Bilesiń ǵoı qazir, aýylda ár úıde sý da bar, qaladaǵydaı jaıly jaǵdaı jasap alýǵa ábden bolady. Tipti, ınternet te "uryp" tur. Basqa aýyldardy bilmeımin. Dál bizdiń aýylda. Mal ustaıdy. 15 bas sıyr jınap alypty. Ápkesi meniń qurbym ǵoı, bilesiń. «30-ǵa jetkizem. Sosyn tólin semirtip, satyp otyram»,- deıdi eken. Sonda tipti, aıyna bir ǵana tanasyn satsa da, senen eki ese kóp paıda kóredi. Taza paıda. Al seniń alatyn aqshań kúndelikti jolyńnan, kıimiń men tamaǵyńnan artylmaıdy. Tipti anańa bir oramal da áperýge jetpeı qalady. Sondaǵy jeıtin tamaǵyń  - qytaı lapshasy, arzan kolbasa, ishetiniń - jasandy sút. Aýyldan anda-sanda keletin qurt, maı, etiń de bolmaıdy, bolashaqta. Dál osylaı júre berseń. Áke- shesheń jasaryp jatqan joq, jer ortadan asty. Sonda olar uldaryn nemereleriniń qylyǵyn qyzyqtamaı, osylaı qartaıǵanda soqa bastary sopaıyp bitpeıtin nesıelerińdi tólep otyrý úshin dúnıege ákeldi me?!.

Kúsh-qýatyń boıyńda bolyp, taý qoparyp tas jaratyn, naǵyz tirshiliktiń qyzý maıdanyna túsetin jastyq shaǵyńdy Almatynyń aldamshy jyltyr dúnıesine aıyrbastap, keıin ál-qýatyń ketip, jalǵyz qalǵanda aýylda áke-shesheń de qalmas. Sol kezde barsań seni kim syıdyrady, kim úıine kirgizedi?

Sveta Ybyraıymovanyń feısbýk paraqshasynan alyndy

Usynǵan: Maqpal Sembaı