Ýkraınada prezıdenttik saılaý jaqyndaǵan saıyn Petr Poroshenko da óz ishinen góri syrtqy qoldaýshylarynyń  yqylasyn qajet ete bastaǵandaı. Osy aptada ol BUU Bas Assambleıasynda sóılegen sózinde «Reseı kez kelgen ýaqytta Ýkraınaǵa soqqy berýge daıar ekendigin» málim etti.

–Orystar Ýkraınaǵa keń aýqymda kez kelgen ýaqytta soqqy berýge daıar tur. Jalpy aıtqanda, qazirgi kezde Reseı-Ýkraına shekarasynda orystardyń 87 myń áskeri tur. Sonymen qatar, Reseıdiń zańsyz túrde qarýlanǵan 35 myń sodyrlary Ýkraına terıtorıasynda áskerı qımyl kórsete alady. Sondyqtan orystarmen bolýy múmkin soǵysqa biz daıar bolýymyz kerek jáne halyqaralyq qoǵamdastyq ta kómek kórsetýi tıis,–dep málimdedi Petr Poroshenko bıik minberden.

Jalpy Ýkraın prezıdentiniń aıtyp otyrǵany bul birinshi ret emes. Osyǵan deıin ol nemis telearnasyna bergen suhbatynda «Reseı Berdánsk men Marıýpolǵa basyp kirýi múmkin. Óıtkeni bul eldimekendi basyp alǵan jaǵdaıda Qyrymǵa qaraı qurlyq áskerleri úshin dáliz ashylady. Reseıdiń bolashaqta kózdegen maqsaty da osy» degeni belgili.

Al Reseıdiń ýkraın shekarasy mańynda ásker shoǵyrlandyryp jatqany ras pa? Bul rette Ýkraına prezıdenti OBSE baqylaýshylary jınaǵan derekterdi de mysalǵa keltiredi. Onda orys áskerleriniń ýkraın shekarasy mańyna áskerlerin shoǵyrlandyryp jatqany aıtylǵan. Shyndyǵynda solaı ma, joq pa, ol jaǵy belgisiz. Biraq orystarmen aradaǵy qatynas ońbaı turǵany ol endi aqıqat.  

BUU Bas Assambleıasynyń minberinde sóz sóılegen Petr Poroshenko «osyǵan baılanysty BUU qaýipsizidk keńesinde Reseıdi daýys berý quqynan aıyrý kerek» dep esepteıdi.

Árıne, Poroshenkonyń janaıqaıyn túsiný de kerek shyǵyr. 2014 jyldan beri eki el arasyndaǵy qarym-qatynas ýshyqty. Reseı Qyrymdy anneksıalady, Donbass aýmaǵy Ýkraınanyń bıligine baǵynbaı tur. Ara qatynasty jaqsartý, mámilegi kelý týraly «Mınsk kelisimi» jumys istemeı qaldy. Endi qaıtpek kerek?

31 naýryzda Ýkraınada –prezıdenttik saılaý. Petr Poroshenkoǵa taǵy da taqta qalýy kerek. Onyń basty básekelesi – «Batkovshına» partıasynyń basshysy Iýlıa Tımoshenko. Kim jeńedi? Ony ýaqyt kórsetedi.