Bas saýǵalap qashqym kelse eshqaıda,
Aıdalaǵa turady aýyp ańsarym.
Birin-biri tyńdamaıdy el, es qaıda?
Túsiniser jan taba almaı, sharshadym.

Bári bóten, bári de jat men úshin,
Top ishinde jalǵyzdyqty sezinem.
Meni de, arman, úmit, muńym, sen túsin,
San synaqqa shydap edim, tózip em.

Eı, ómirdiń ótkelderi, ótinem,
Meni de arǵy jaǵalaýǵa ótkizshi?
Armandarym oryndalyp shetinen,
Baqytyma, ańsaryma jetkizshi?

Taǵdyr úzik monshaq bolyp janardan,
Úziledi, jelge sińip, joǵalyp.
Týyp jatyr, ólip jatyr san arman,
Júrek birde jaralanyp, ońalyp.

Top qaıyńnyń ishindegi birimin,
Tamyr-kindik jerge matap, baılanǵan.
Men ázirge, ıá, áli de tirimin,
Tynyqtyrar eken meni qaıda arman.

Solq-solq jylap, jel qurǵatyp jasymdy,
Basym súıep otyramyn ózime.
Myń sharlaıdy san túrli arman basymdy,
Qadam qaldy baqyt qushar kezime.
Senemin....
...
/09.08.14/

***

"Úp" etti úmittiń jeli taǵy,
Tusymnan...
Aıyrylyp qaldy sezim baǵy,
Qusynan.
Usynam...
Ǵalamǵa mendegi barymdy,
Arymdy...
Taryldy
keń dúnıe de.
Júregim
Baǵyndy,
Taǵdyrǵa mańdaıda jazylǵan,
Saǵyndy,
Sezimnen órekpip tolqıtyn sátterdi,
(Bireýdiń janary - júrektiń qabiri qazylǵan)
Mendik,
Jaýapsyz sezimdi-kepterdi,
Ushyryp alǵan ol ótkendi, ketkendi...
Sendik,
Júrekpen... ádemi sózderge sendik...
Boılyq pen endik,
Tarshylyq etkende,
náp-názik, móp-móldir sezimge.
Ol meniń ańqaý da, tym sengish kezim be,
baǵynyp júretin tózimge,
ózime...
Urynyp,
daýylǵa tystaǵy, abaısyz,
Sodan soń,
buǵynyp,
japyraq jamylyp,
jylynyp,
Tiri jan bitkennen sýynyp,
Atady kúnderim araısyz...
(Jaz kúnde jaýraǵan janymdy,
...túsiner, kim uǵyp...?)

Al Siz,
Ózgeniń, men emes,
Ózgeniń shashtaryn taraısyz,
Men jaqqa úmitpen qaraısyz,
Júrekti ekige bóle almaı,
Ne mendik júregim sizdikin,
Qup kórip,
qabyl da ala almaı.
Ózgeniń ókpesin jazýmen,
Ótesiz,
ketesiz...
Al, onyń oıy da, qalaýy -
basqada.
(Aqıqat, árıne, tek aıan Allaǵa).
Bilmeımin, baqytqa osylaı jetpeısiz,
Jetesiz.
Burylmaı bir tamshy jasqa da...
Bir kúni
men Sizsiz baqytty bop ketsem,
Sonda Siz sanamnan,
oıymnan,
júrekten,
bolmystan birjola ketesiz...(!)
Beý, meniń Baqytty baqsyzym,
Aıtyńyz, Siz sonda ne etesiz?
Taǵdyr da bir ózi qyzyq qoı...
...
Já, meniń hálim de mańyzdy emes-aý,
Siz ózi,
Siz ózi, Sátsizbek,
Ózińiz tańdaǵan,
Kúlkim joq,
ıisim sezilmes,
demim de estilmes.
Duǵam da aıtylmas,
alaqan jaıylyp.
Tym uzaq qaraıtyn janarym kóz ilmes,
júregim júrekke ún qatyp,
tereńge sezimniń bir batyp,
eń alǵash kórisip turǵandaı,
uıalyp,
Men jaqsy kóretin ádemi,
gúldi alyp,
keletin sáttersiz,
Qoshtasyp, qıa almaı,
qaıtadan aınalyp, jolyǵyp,
qolyńyz qolyma "soǵylyp"...
Almaty kóshesi - álemniń dalasy sıaqty,
aspannan juldyzdar jaýǵandaı,
bul túnniń nazary tek bizge aýǵandaı,
eki jas biletin uıatty,
jerdi tek ózderi mekendep,
turatyn sıaqty,
aıaqty tym alshań basatyn,
ekeýdiń armany taýlardy asatyn,
muń bitken bul mańnan qashatyn,
erteńgi kúnderden jaqsylyq tosatyn,
biriniń ánine biri jyr qosatyn,
jáı ǵana kóp jannyń biri bop,
biri úshin birine bolashaq esigin ashatyn...
sátterdiń biri de joq endi!
Eh, meniń aldamshy Armanym,
Bári bar, tek men joq,
Óńirde... ómirde qalaısyz?...

/05.09.2014/

Maqpal Sembaı