Fılıppın batyry Mennı Pakáo kásipqoı bokstan 8 salmaq dárejesinde álem chempıony atanǵan jer sharyndaǵy ázirge jalǵyz boksshy. Bul sportshy 1998-2018 jyldary WBO, IBF, WBC, WBA, TYE RING tujyrymdary boıynsha dúnıe júzinde aldyna jan salmaı turdy. Bul aıtýǵa ǵana ońaı. Mundaı asqaraly beleske jer júzinde saýsaqpen sanarlyq boksshy ǵana jetýi múmkin. Al Mennıdiń segiz salmaqtaǵy chempıondyq rekordy jaqyn arada buzyla qoıýy ekitalaı.

Pakáo salǵan Pakman Vıllaj aýylynyń úıleri

Balalyq shaǵynda joqshylyq  taýqimetin tartqan Pakáo bozbala kezinde AQSH-qa jalańaıaq baryp, kásipqoı bokstyń sońyna túsedi. Sodan baǵy janyp, bes qurylyqqa keńinen tanymal boldy. Mennı Pakáo rıngten tapqan aqshasyn bireýler tárizdi jambasyna basyp, jatyp alǵan joq. Saqı jigit óziniń týǵan aýyly Tangodaǵy 1000 kedeı otbasyna turǵyn úı salyp berdi. Buǵan qosa Pakáo aýyldastary úshin ashyq jáne jabyq sport alańyn, kópshilikke arnalǵan saıabaq, kóp fýnksıonaldy ortalyq  turǵyzyp beripti.

Mennı aıqas ústinde

«Bolar bala boǵynan» deıdi atam qazaq. Pakáo bala kezinde tańǵy saǵat tórtte oıanyp, júgirýge shyǵady eken. On eki jasynan toqash satyp, nápaqasyn eńbegimen taýyp daǵdylanǵan Mennı qazir Fılıppın parlamentiniń depýtaty. Osy eldegi eń bedeldi adamnyń biri. «Memlekettik qyzmetker retinde ne bitirdiń, degen saýalǵa ún qatpaǵanym úshin synǵa ushyradym. Elim úshin ne istegenimdi jarıa qylyp edim, taǵy da synnyń astynda qaldym», deıdi Mennı Pakáo. Jalpy, bul jalǵanda adam balasynyń kóńilin tabý qıynnyń qıyny.

Bir joly órkókirekteý qarsylasy: «Men senen kúshtimin! Ekpinime shydaýyń ońaı bolmas», dedi óktem daýyspen. Sonda Mennı Pakáo sabyrly qalpyn buzbaı, úni diril qaqpastan aqyryn ǵana: «Keýdesin jónsiz kótergen adamdy qudaı sabasyna túsiredi. Al aqylmen sóılep, jónimen júrgen adamdy kókke kóteredi», dedi. Túsingen adamǵa osy bir aýyz sózdiń ózinen Pakáonyń kim ekeni kórinip turǵan joq pa?!

Qydyrbek Rysbek