Bul kúnderi qyzyl kirpishteri yrsıyp kórinip, keıpi qasha bastaǵan ǵımaratqa uıqyly-oıaý kúıde basy salbyrap kelip, súlesoq qalpy kabınetten alyp shyqqan dopty balalarǵa qaraı laqtyryp jiberip, ózi álsin-álsin esinep kúnge qyzdyrynyp otyratyn Ábiltaıdyń mektepke dırektor bolatyny týraly habar aýylǵa bir-aq kúnde taraǵan. Myna jańalyqty estigen Jalqamys jurtyn bir jerge jınap, qalaı tańyrqaǵandaryn tyńdar bolsaq, «Oıpyrymaaaaı, ne deıdi?!» degen zor daýys jer-álemdi jańǵyryqtyryp keter edi. Ábiltaıdyń mektepti qalaı bitirgeni, oqýǵa qalaı túskeni, ony qalaı oqyǵany, aýylǵa kelip mektepke qalaı jumysqa turǵany osyndaǵy jurttyń kóz aldynda.
«Jaqypbekke kúıeýge tıgende shashym kómirdeı qap-qara edi. Jetpegir, Ábiltaı, sen aǵarttyń!» dep synyp jetekshisi Kúlpásh jer tepkileı jyndanyp, súmireıgen oqýshysyn toqtaýsyz julqylap, aqyrynda kóz jasyna erik berip, murnyn pysh-pysh etkizip otyryp qalatyn.
Ábekeń mektep bitirgen soń «oqymaımyn» dep álek saldy. Ákesi Shámiltaı jatyp kep jalynyp júrip, kóndirgen. «Mal bolsa, azaıyp barady. Erteń men ketsem, kúniń ne bolar? Odan da bir japyraq qaǵaz alyp alshy» degen soń áreń kelisken. «Kúnde sabaq aıtyp, emtıhanǵa daıyndalyp, sesıa tapsyryp júrýge ýaqytym joq. Syrttaı oqımyn» degen onda da. Shámiltaı «tym qurysa, jylyna bir ret baryp, muǵalimderińe kórinip ket» dep erteli-kesh sur «Jıgýlıdiń» astynda jatatyn erke balasyn zorǵa sýyryp alatyn. Ábekeń t»alaı oqýǵa kettim» dep oılap, qalaǵa barǵan soń kafeden kafege orǵyp, qyzyq qýalap qaıtyp keletin. Ondaı kezde Shámiltaı shamyrqanyp ketip, «ýa túısiksiz, ýa sanasyz, ýa jetpegir» dep úıdi aınaldyra qýalaıdy. Bıologıasy áp-áıdik bolsa da, psıhologıasy áli aýyldy aınalshyqtap shyǵa qoımaǵan Ábiltaı keıde áke ashýynan seskenip, sur «Jıgýlıdiń» ishine kirip, esik-terezesin kilttep alady. Sharasy taýsylǵan Shákeń dymy quryp, kónere bastaǵan kólikti ári-beri silkip qoıa salady. «Ýa túısiksiz, «Jıgýlıińmen» qosyp, anaý saıǵa ıterip jiberer me edi?»» dep kúıinedi.
Biraq qaıtken kúnde de baýyr eti emes pe. Balasy dıplom alǵan kúni Shámiltaı aǵaıyn-týǵandy shaqyryp, dastarhan jaıǵan. Eki-úsh aı ótpeı kórshi Sekseýil aýylymen qudandaly bolǵan. «Áıel alǵan soń, jaman «Jıgýlımen» júrgenim uıat bolmaı ma?», - depti Ábiltaı bir kúni sháı ústinde sulý jary Monshaqtyń kózinshe. Kelinniń aldynda mynadaı buıymtaıǵa qarsylyq bildirýge yńǵaısyzdanǵan Shámiltaı, ózinde bar aqshanyń basyn qurap balasyna sý jańa japon kóligin áperip qutyldy. Temir tulpardy taqymǵa basqan soń aýyl men qala arasyna árli-berli adam tasyp yzǵytady da júredi. Ata-ene men kúıeýin jaqynyraq tanyp, kóńili ornyǵa bastaǵan Monshaq bir kúni «Qashanǵy shapqylaısyń? Dıplomyń bar emes pe? Jumysqa tursańshy» dep qıylǵanda baryp, Ábekeńniń oıyna jumys jaıy sap ete qalǵan.
– E-e-e degen, – sonda esinep turyp, – Jumysqa turý kerek eken ǵoı...
Alaıda jumysqa ornalasa salý Ábiltaı oılaǵandaı ońaı bolmaı shyqty. Ákesine jumsaqtap aıtyp kórip edi, «bir kúni tamaqty shaınap, aýzyma salyp ber deıtin shyǵarsyń» dep ashýǵa basypty. Sodan sharýany Monshaqtyń ózi qolǵa alǵan. Aqylyna kórki saı, pysyq, alymdy áıel dırektordyń aldyna kúıeýin ertip baryp júrip, zeınet jasyna eki jyly qalǵan Jumadil Aspantaýovty kóndirgenge uqsaıdy. Áıteýir, kóp ótpeı Ábiltaı aýzyna ysqyryǵyn qystyryp, qolyna doby men jýrnalyn ustap, dene tárbıesi pániniń muǵalimi bolyp shyǵa keldi. «Muny jýmasa bolmaıdy» dep keshke biraz dýmandatqan kórinedi.
Kesh ortalanyp, sońyna taqaǵanda Ábiltaı sózinen súrinip, kózin bir ashyp, bir qalǵyp ketip otyryp: «Muǵalim bolǵanymdy qaıteıin, bir jyl aılyq almaımyn» depti yzalanyp. Sóıtip, Monshaq pen Jumadil Aspantaýov arasyndaǵy asa qupıa kelisimdi jarıalap qoıa bergen. Abyroı bolǵanda, sol túni syrany sýsha simirgender ertesine ne istep, ne qoıǵandaryn jappaı umytyp, ashylǵan qupıa aýada qalyqtap biraz turypty da, ǵarysh keńistigine sińip kete barypty. Mine, sodan beri eki jyl taban aýdarmaı, pedagog degen mártebeli ataqty arqalap kele jatyr. Álde, pedagog mártebesi muny arqalap kele jatyr. Áıteýir, ildebaılap ómir súrip keledi. Sóıtip júrgende jarq etken jańalyqtyń sıqy osy. Dırektorlyq!
Sońǵy ýaqytta zeınet jasyna taıaǵan dırektor Aspantaýovtyń qyzmetin doǵaratyny anyq bolyp júrgen. «Ornyna kim keledi?» degen saýal Jalqamys aýylyn tolǵandyrǵan mańyzdy jaıtqa aınalǵan edi. Qaı úıge barsań da, osy saýaldy móldirete talqylap otyrǵan jurtty ońaı keziktiresiz. Biraq basqa-basqa «Ábiltaı dırektor bolady aý» degen boljam bul aýyldaǵy jan balasynyń mıyna kirip shyqpaǵan. Óndirdeı jap-jas, isi shalaǵaılaý jigittiń biraz ýaqytqa ushty-kúıli joǵalýy, aýlasynda qymbat kóliginiń de kózge shalynbaýy onyń dırektor bolý múmkindigin aýyl arasynda arttyra túsken. Kóp uzamaı ústine kostúm-shalbar kıgen Ábiltaı jymyń-jymyń etip mektepte qaıtadan paıda bola ketti. Ádette qyzyl trıkosynyń aýyn tikken aq jibi salbyrap, ústine eski sportıvkasyn ile salyp qur súlderin súıretip keletin Ábiltaıdyń myna turqy rasynda bólek edi. Shashyn da eppen qaıyryp, túri shyraılana túsken. Osydan soń-aq muǵalimder onyń mekteptiń kelesi basshysy bolatynyna túk te kúmándanbaǵan. Qaýmalap, ortaǵa alyp edi, Ábiltaı bastapqyda «oıbaı, muny kim shyǵaryp júr?» dep týlaǵan eken, keıin «ýaqytynda kóresizder ǵoı...» dep jabasirkeleı qutylypty. Onyń myna sózi aýyldyqtar úshin birjola pátýa retinde qabyldanyp, jańa dırektorǵa jaǵyný is-sharasy bastalyp kete barǵan.
Qarańǵy túspeı aǵyp-tamyp úı jaqqa qaraı kele jatqan az adamdy kórip Monshaq kúıeýin biraz silkilep aldy.
Dırektorlyǵymen quttyqtaǵan jurt qur kelmeıdi, áıteýir. Jyly-jumsaq, tátti-páttisin ala keledi. «Balasy dırektor bolady» degeli Shámiltaı men áıeli Shárıpa da biraz kóterilip qalǵan.
–Ábiltaıjan, kishkentaıynan erek edi ǵoı. Tentek bolsa da, aqyldy tentek bolatyn, – deıdi jasy qyryqtan endi asqan, mektep jumysshysy Saılaý. – Jaman naǵashyń syrtyńnan súısine qarap, úmit kútip júrdi ǵoı.
–Rahmet, aǵa, – deıdi Ábiltaı yrjalaqtap.
–Jumysyń qalaı bop jatyr? – dedi qansha kúnnen beri aýyl adamdarynyń sóıleý taktıkasyna boı úıretip alǵan Shámiltaı.
–Sol jumys jaǵyn aıtqaly kelip edim, – dep Saılaý endi negizgi buıymtaıǵa kóshti. Sóıtip, qazirgi zavhoz Taıyrdy biraz jamandady.
–Kezinde kolhoz bolyp turǵanda qyrmannyń basyna túneıtin edim ǵoı, bilesiz Sháke. Kez kelgen sharýany urshyqsha úıirip áketem, – dep bastap, sóziniń sońyn ala sharýashylyq meńgerýshisiniń oryntaǵynan úmitti ekenin ańǵartqan. Zal tamǵa jańadan jaıylǵan qyzyl kilem de Saılaýdyń sózin qostaǵandaı, terezeden túsken kún sáýlesine shaǵylysyp, jalt-jult etedi.
Basshylyqtyń býyna elitken Ábiltaı ókilettiligin ázirden paıdalanyp, «aǵa, tas qylamyz» dep jiberedi keıde. Mundaı sátte Monshaq bir búıirinen túrtip qalyp, táýbesine túsirip qoıady. Topyrlaǵan qonaqtyń birde biri qur kelmeıdi. Biri munyń mashınasynyń oryndyqtaryna ádemi jabý, biri malǵa dep shóp ákelip tógip tastady. Ásirese, zavých bolýdan úmitti Tandybaıdyń syılyǵy bárinen asyp tústi. Qazir fızıkadan beretin aǵaıy «sıyrlardyń jem-shóbi menen bolsyn» dep 100 baý pishendi qoranyń aýzy-murnynan shyǵarǵan. Birtindep mundaı syılyqqa Monshaq ta úırene bastady. Náti áıel emes pe, jany jylyp, kóńili ósip qalatyn boldy. Keı úmitkerler «Ábiltaı men sharýashylyqty oılaı bermeı, kelinge de jaǵaıyq» dedi me, úı áp-sátte shańsorǵysh, qysqa tolqyndy pesh, útik sıaqty zattarǵa tolyp, Monshaq «qaısysyn qaı jerge jaıǵastyramyn» dep basy qatqan.
Kelýshiler syı-syıapatyn qur ákele salmaı, bolashaq dırektordy ábden maqtap, sóz aıaǵyna qaraı keýdesindegi úmitin syzdyqtatyp jetkizedi. Ábiltaı eshqaısynyń meselin qaıtarmaıtyn jomart júrek janǵa aınalyp alǵan. Tipti bireýler «aldymyz qys ǵoı» dep buǵan jaǵaly ton men Túrkıada tiktirilgen uzyn qonysh etik te kıgizip ketti. Sóıtip, aınaldyrǵan eki aptada Shámiltaıdyń shańyraǵy dúnıe-múlikke syqaı toldy. Munshama dúnıeniń qyzyǵyn kórip Ábiltaı da, onyń kelinshegi de máz. Mektepke barsa, áni-mine zeınetke shyqqaly júrgen synyp jetekshisi Kúlpásh aınalyp-tolǵanyp óbekteıdi.
–Ásili, men adam tanımyn Ábálók, – deıdi muny ózinshe erkeletip, – sen sabaq oqymasań da kózqarasyń tereń bala ediń ǵoı, – dep bastap:
–Áı, osy anaý Shánók, Aıbarsha, Turlan, Ǵazızdermen habarlasyp tursyńdar ma? Olar qaıda júr ózi? – dep synybyndaǵy balalardy túgendegen bolady. Ábiltaı vatsaptaǵy konferensıanyń arqasynda kimniń qaıda júrgenin ańdyp otyrady. Sondyqtan apaıynyń suraǵyna irkilmeı, jaýap berip tastaıdy.
–Áá, jón. Aman júrińder, aınalaıyn. Óı, janym. Ábálókjan, Jaqypbek kókeń aýrýshań bolyp ketti. Bári ózinen ǵoı. İshpe desem de, ishedi. Baıaǵyda kelin bolyp túskende shashym kómirdeı qap-qara edi. Jetpegir, Jaqypbek aǵartty ǵoı, – dep aýyldaǵy jalǵyz avtobýsty aıdaıtyn shalyn biraz sybap alady.
– Sen maǵan járdem et. Pensıaǵa shyqqan soń da birer jyl sabaq berip júre turaıyn, qalqam. Oǵan deıin Sákebaı da oqýyn bitirip, jumysqa turyp qalar. Ol da muǵalim ǵoı. Túrine qaramaı, meniń jolymdy qýdy, – dep ulyna qatysty emeýrinin de ańǵartyp qoıady.
Ábiltaı eshkimniń betin qaıtarǵan emes. «Jaraıdy, apaı» deıdi kúlimsirep. «Siz aıtsańyz boldy ǵoı!».
Endi búkil aýylǵa jańa dırektordyń myrzalyǵy jaıly jaǵymdy habar keńinen jaıylǵan. Úıine «kezdeısoq kep qala salatyn», ádeıilep at basyn buratyn, bulardy «saǵyna qalatyn» adamdar aǵyny da tolastamady. Eshbiriniń sózi qurǵaq emes. Bári tegis shejireni jattap kelgen be, bir jaǵynan Ábiltaıǵa týys bolyp shyǵady. Onysyn qur aıta salmaı, qaı ata jaǵynan ekenin de dálme-dál dáleldeıdi. «Osynshama týysym buǵan deıin qaıda júrgen?» dep Ábekeń de ań-tań. Ómir boıy Kendirbaı qystaǵynda mal baqqan, aýylǵa anda-sanda keletin Zylıha kempir de entigip jetipti. «Qoı baǵyp júrgen Záýirbegimdi muǵalim etshi. Ózi bir qara kúsh ıesi. Kez-kelgen sharýańdy japyryp jiberedi»,- deıdi. Basyna bir emes, eki oramal tartyp kelipti. Sol eki oramaldyń ortasyna arnaıylap, kórinetindeı etip bes birdeı on myń teńgelik aqshany jaıyp qoıypty. Ábiltaı men Monshaq mynany kórip, kóńilderin kúlki qysady.
–Apa, balańyzdyń joǵary bilimi joq qoı, – deıdi Ábiltaı ózinshe ýáj aıtqan bolyp.
–Oıbaı-aý, bilimi joq bolsa da, maly bar ǵoı. Ne, seniń taqıańa tarlyq ete me? – deıdi birbetkeı Zylıha kempir.
Shirkin, Kendirbaıdaǵy myńǵyrǵan maldyń arasynan tańdap turyp qalaǵanyn ákelse, ony ókirtip satsa, túsken aqshaǵa ysyldaǵan sý jańa jıp alsa ǵoı dep arman etedi Ábiltaı. Bul oıyn záýde kelinshegine jetkizedi. «Áýeli sol kresloǵa otyryp al. Basqasyn sosyn kóremiz» deıdi Monshaq salqynqandylyq tanytyp. Biraq kún saıyn kelip jatqan mal-dúnıe, adamdardyń ystyq yqylasy, buǵan baǵynyshtylyǵy Ábekeńniń kóńilin kóterip, abyroıyn asyra túsken. Abyroıdyń asýy – adamǵa da áser etpeýshi me edi. Ábiltaıdyń da minez-qulyq, keskin-kelbetinen ózgeshelik baıqalyp, baıaǵy shala-sharpy qımyldaıtyn alańǵasar emes, salıqaly, salmaqty janǵa aınala bastaǵan.
Jurt syrttaı Ábiltaıdy dırektor etip «taǵaıyndap» tastaǵanyna qaramastan, mekteptiń qazirgi basshysy Aspantaýov ornynan qozǵala qoımady. Júris-turysynan da asyǵystyq baıqalmaıdy. Mańǵaz basyp mektepke kirip kele jatady. Asyqpaı adymdap shyǵyp bara jatady. Eki apta úıinde jatyp ishi pysqan soń Ábiltaı da jumysqa kelgen. Aýzyna ysqyryǵyn salyp, qoltyǵyna dobyn qysyp sabaǵyna kirisken. Ońashada muǵalimder «Ábeke, siz qashan..?» dep dırektorlyqty meńzep qoıady. «Jaqynda bolyp qalady. Asyqpańyzdar» deıdi Ábiltaı ózi úshin de, ózgeler úshin de beıtanys sabyrly minezben.
Jurt kóńili qońyltaqsyp, Ábiltaıdyń dırektorlyq mansabynan kúdiktene bastaǵanda aýdannan bir top komısıa saý etip, Aspantaýovtyń kabınetinde eki saǵattaı jınalys ótkizipti. Muny kórgen muǵalim qaýymy basshylyqtyń aýysatynyna esh kúmándanbaı, aqparatty súzgiden ótkizip áýre bolmaı-aq aýyl-aımaqqa habarlap jibergen. Tipti jınalystan Ábiltaıdy kórgender de bar eken. Alaıda komısıa eshkimdi ornynan almady, eshkimdi taǵaıyndamady, muǵalimderdiń sabaq josparyn tekseripti de, qaıtyp ketipti.
Úmitteri shynǵa aınalmaı, ýaqyttyń sozyla túskeninen qaýiptengen jurt, «jańa dırektorǵa» syıǵa bergen tartýlary úshin alańdaı bastaǵanda aýdan ortalyǵynan taǵy da bir top dókeı kelgen. Kóńilderi kúpti jurt taǵy da mektep pen dırektordyń kabıneti jaqqa eleńdep, jańalyq kútken. Biraq jurt kútken jańalyq taǵy da bolmady.
Arada eki kún ótpeı, aıtqany aıdaı keletin, aýyl arasynda «kóripkel» atanyp ketken Gúlmárıa «Ábiltaıdyń dırektor bolatyny ótirik eken. Komısıa Aspantaýovty taǵy eki jylǵa ornynda qaldyrypty» degen habar taratqan. Qyzyqtyń kókesi osy kezde boldy. Jurt jappaı Ábiltaıdyń úıine aǵylypty. Tandybaı eki apta buryn qoraǵa túsirip ketken 100 baý pishenin qaıta tıep ketip qalypty. Qur ketpeı ursyp ketipti. «Dırektor bolmaıtyn bolsań, nemene áýrege salasyń?! Áı, ózim de oılap edim, buǵan dırektorlyq qaıdan bite qoıdy!» dep Ábiltaıdyń betine jamandap, burq-sarq qaınapty. Aýyl adamdary bergen dúnıe-múlikterin qaıta surap Shámiltaı shańyraǵynyń shańyn qaqqan. Tipti dúkenshi Jamal qysqa tolqyndy peshti ishinde aınalyp jatqan tamaǵymen kóterip áketip, onysy jolda ústine tógilip, aýyldy shýlatyp áreń basylǵan. Sol kúni keshke deıin bireý Shámiltaıdyń shańyraǵynan shańsorǵysh arqalap shyqty, endi bireý kóliktegi avtojabýdy qaıta sypyryp alǵan. Sheber dep aty shyqqan Qaıyrǵalı «baptanyp otyryp, shaı ishińizder» dep syıǵa tartqan oryndyqtar men ústelin «ózimizge de kerek bolyp qaldy» dep saldyraǵan kóligine tıep taıyp turypty. «Zavhoz bop jatsam, aıtqan rahmetim dep qabyldarsyń» dep tórgi bólmege ákelip jaıyp tastaǵan oıý-órnegi men qyzyl túsi kózdiń jaýyn alatyn kilemin ádemilep búktep, orap, ıyǵyna salyp Saılaý da shyǵyp ketipti. Shyǵyp bara jatyp, «renjime jıenjan, kelesi dırektorǵa da qamdaný kerek qoı» dep arqadan qaǵypty. Ne kerek, Ábiltaı men Monshaq aınaldyrǵan birneshe saǵatta-aq úıdiń sánin kelistirip turǵan dúnıe bitkennen aıyrylyp qala bergen. Ásirese, Kendirbaı qystaǵyn en jaılap otyrǵan Shernıaz baıdyń kempiri Zylıha alaqanyn shapattap qýanypty: «Báse, qulaǵynan súıregendeı etip oqytqan Ábiltaı qaıbir dırektor bolyp jarytar? Ymǵa túsinbegen, dymǵa túsinbeıdi degen. Basymdy qaıta-qaıta ıip otyrsam, «balańnyń bilimi bar ma?» deı beredi, jetpegir» depti kúbisin piskilep turyp.
Osylaısha, aýyl adamdary bergen dúnıesi men aqshasyn qaıtaryp alyp, kóńilderin demdegen kúnniń ertesine-aq Aspantaýov qyzmetimen qosh aıtysqan. «Oý, bul qalaısha?» degenshe bolǵan joq, aýdandyq bilim bóliminiń basshysy Jylqybaı Shorahmetov «Jastarǵa qazirden kóńil bólip, olardy qyzmet baspaldaǵyna kótergenimiz abzal. Memleket bizden sony talap etip otyr» dep Ábiltaı Nurmyrzaevty Jalqamys aýyldyq orta mektebiniń dırektory dep tanystyrǵan.
Oqýdyń ıisi murnyna barmaıtyn, dırektor bolýǵa yqylasy da, aqshasy da joq Ábiltaıǵa aıdyń-kúnniń amanynda basshylyqtyń buıyrǵany, rasynda qyzyq. Bul oqıǵaǵa qaıyn atasy Jylgeldiniń tikeleı qatysy bar-tyn. Kezinde aýdan ákiminiń orynbasary, memlekettik kiris basqarmasynyń bólim meńgerýshisi qyzmetterin istep júrgende áýeli tarıh pániniń muǵalimi, keıin aýdandyq bilim bóliminiń ádiskeri bolǵan Jylqybaı Shorahmetovke zor áseri tıgen. Ózi bilimdi, ózi belsendi, óziniń jylqysy kóp Jylqybaı Jylgeldige á degennen unaǵan. Aqyry qyzmet baspaldaǵynda jetelep júrip Jylqybaıdy bilim bóliminiń basshysy deńgeıine de jetkizdi. Az kúnde oblysqa qaraı joǵarylamaq. Aǵasynyń jaqsylyǵy oıynan shyqpaı, kóńili tolqyǵan Jylqybaı qolda bılik barda jaqsylyq jasap qalaıyn dese kerek.
–Aǵa, inishekterdiń biri bolsa aıt. Kótereıik, – depti zeınet jasyna jetip otyrǵan Jylgeldige bir jolyqqanda.
Jylekeń ári-beri qarasa yńǵaıly adam kózge ilinbeıdi. Myń qaıtara oılana kele óziniń tula boıy tuńǵyshy Monshaqty alyp, búginde berekeli otbasy bolyp otyrǵan Ábiltaı eske túse ketpeı me? Sodan kúıeý baladan dırektor jasaý prosesi baqandaı bes aıǵa sozylypty. Aspantaýovty qyzmetten qalaı alý kerek, Ábiltaıdyń sanasyna basshylyq qyzmetti qalaı sińirý kerek, ony qalaı daıyndaý kerek, bul isti Jylgeldi aqsaqal, bastyq Shorahanov, áıeli Monshaq úsheýlep júrip retke keltirgen. Uıaty jibermedi me, álde dırektor bolý degen oı sanasyna syımady ma, Ábiltaı bastapqyda at-tonyn ala qashqan. Keıin aqyry kónse kerek. Endi áni-mine jyly oryntaqqa otyrǵaly jatqanda Aspantaýov aryzdanyp, «ońaılyqpen qyzmetimdi bermeımin» dep biraz álekke salǵan. Osy kezde ǵoı jurttyń ózderi bergen dúnıe-múlikti qaıtadan japa-tarmaǵaı tárkilep ketetini. Áıteýir, Shorahanov bar bedelin salyp júrip aýzyna ysqyryǵyn, qoltyǵyna dobyn qystyryp, súlesoq júrgen Ábiltaıdy óıtip-búıtip dırektor qyldy.
«Baıaǵydan kútken dırektorymyz osy Ábiltaı sekildi jalyndy, belsendi jas edi ǵoı» dep sóz sóılepti muǵalimder birinen soń biri. Oryndaryna otyrǵan soń aýyzdaryn qoldarymen kólegeılep «pishtý, mynaý bastyq bolǵan soń ne aıtasyń» dep kúbirlesipti. Sol kúni keshke deıin aq aldyńǵy kúni ıeleriniń etegine jabysyp kete barǵan dúnıe-múlik shyp-shyrǵasy buzylmaı, Shámiltaıdyń shańyraǵyna qaıta oralǵan kórinedi.
Abaı Aımaǵambet
