Qysqy merekelerdiń aldynda astrolog Irına Abdraımova qazaqstandyqtardy 2019 jyly kútip turǵan mańyzdy oqıǵalardan habardar etip, aqpan aıynyń elimiz úshin aýyr aı bolatynyn eskertken edi dep jazady Qamshy.kz aqparat agenttigi sputniknews.kz saıtynyń deregine súıenip.

"Úkimette, saıası elıtada kelispeýshilik bolýy múmkin, saıası jáne dinı alaýyzdyq bolyp, ishte jatqan qarama-qaıshylyqtar syrtqa shyǵýy yqtımal. Aqpan, shilde jáne qarashada jappaı narazylyqtar, dinı fanatızm jáne qoǵamda teketirester bolyp, saıası qaıratkerler óz tartysynyń negizi retinde dindi alýy múmkin", - degen edi bir jylǵa jasaǵan boljamynda.

Shynymen de, aqpan aıynda eldi dúrliktirip, qoǵamda rezonans týdyrǵan birneshe oqıǵa boldy, sonymen qatar úkimet aýysty.

Halyqty alańdatqan aqpan aıynan keıin kóktemniń birinshi aıy qandaı bolmaq?

"Jańa isterdi 28 naýryzdan bastap josparlańyz"

Astrologtyń aıtýynsha, naýryz aıynyń alǵashqy onkúndigi joǵary emosınaldy fonǵa ıe. Kóktemniń kelýi adamdarda mahabbatqa qajettilik pen qushtarlyq oıatyp, sezimtaldyǵyn arttyrady. Bul mezgilde adamdar kútpegen qadamǵa barýǵa, tosynsyı jasap, jaqyndaryn qýantýǵa beıim turady.

"Birinshi jáne ekinshi naýryzda ǵashyq jandar arasynda túsinispeýshilik, kıkiljiń jıilep, eki jastyń joldary aıyrylýy múmkin. Ajyrasý sany kóbeıýi yqtımal", - dep eskertti Abdraımova.

Alǵashqy onkúndiktiń negizgi astrologıalyq oqıǵasy – bul kertartpa Merkýrıı.

"Bir jaǵynan, biz júrek qalaýyna qulaq asamyz. Biraq, jańa joba, oqý, kásiporyndy tirkeý, dúken, salon ashý, kelismshart bekitý, mańyzdy qaǵazdar rásimdeý, jyljymaıtyn múlikti aıyrbastaý, basqa bir jerge qonys aýdarý, tumystyq tehnıka satyp alý sekildi sharýalardy bul ýaqytta bastamaǵan durys", - deıdi astrolog.

Maman odan da bastaǵan isti sońyna deıin jetkizýge, qordalanyp qalǵan máseleni sheship, qajetsiz zattardan arylýǵa, qaǵazdardy retke keltirýge keńes berdi. Kim bilsin, bálkim, baıaǵydan izdep júrgen mańyzdy qujattaryńyz tabylyp qalar.

Sonymen qatar, eski kelisimderdi qaıta qarastyryp, yntymaqtastyq sharttaryn ózgertip, burynnan jaqsy tanys dostarmen júzdesýge qolaıly kún.

Altynshy naýryzda Ýrannyń Torpaq juldyznama belgisine aýysýy tolyǵymen aıaqtalady. Bul aldaǵy birneshe jylda bılikte mańyzdy ózgerister bolady degendi bildiredi.

"Jańa isterdi 28 naýryzdan bastap josparlaǵan abzal. Bul kezeń dızaınerler, jazýshylar men sýretshiler, kıno salasynyń adamdary, bir sózben aıtsaq shyǵarmashyl jandardyń shabytyn oıatyp, tamasha týyndylardyń dúnıege kelýine septigin tıgizedi", - deıdi astrolog.

Osy aralyqta adamdar ózin-ózi joǵary baǵalap, ózgege ózderin tanytýǵa, basqa qyrynan kórsetýge tyrysady.

"Valúta baǵamy kúrt ózgerýi múmkin"

"Naýryzdyń birinshi onkúndiginde Toqty, Arystan, Mergen belgileri kásipkerlikpen aınalysarda energıa tapshylyǵyn sezinýi múmkin", - dep eskertti astrolog.

Buǵan qosa, naýryzda bırjada baǵalar ári-beri qubylyp, valúta baǵamy kúrt ózgerýi múmkin.  

Naýryzdyń ekinshi onkúndigi ot pen aýa belgisindegi juldyznamalarǵa energıa aǵynyn, kúsh-qýat pen senimdilik syılaıdy. Bul mańyzdy is-qımyl kezeńi, sondyqtan ýaqyt joǵaltpaǵan abzal.

Naýryz – naǵyz Jańa jyl

21 naýryzda Astana ýaqytymen saǵat 03:58-de óte mańyzdy astrologıalyq oqıǵa – Astrologıalyq jańa jyl bolady.

"Al bizde Shyǵysta Ulystyń uly kúni – Naýryz meıramy toılanady. Áz-Naýryzdy sán-saltanatymen, joǵary deńgeıde atap ótken durys, sebebi ǵaryshtyq ólshem boıynsha bul meıram 31 jeltoqsannan 1 qańtarǵa qaraǵan túni biz toılaıtyn resmı Jańa jyldan áldeqaıda mańyzdyraq",- deıdi Abdraımova.

"Alaıaqtardyń arbaýyna túsip qalý ońaı"

Naýryzdyń úshinshi onkúndiginde adamdardyń kóńil-kúıi qubylyp, qyńyrlyq tanytady, umytshaq bolyp, oıyn jınaqtaý qıynǵa túsedi.

"Bul kezeń ájeptáýir uzaqqa sozylady. Onyń yqpalyn sáýirdiń basyna deıin sezinemiz. Bul kúnderi alaıaqtardyń arbaýyna ońaı túsip qalýyńyz yqtımal. Opasyzdyq, aramdyq pen ótirik dostaryńyzben, jaqyndaryńyzben, kórshilerińizben aradaǵy qarym-qatynasyńyzǵa syzat túsirýi múmkin", - dep eskertti astrolog.

Jańa adamdarmen tanysqan kezde, saq bolyńyz, ásirese mahabbat máselesine kelgende. Júregińizge jol tapqan adam shynaıy bet-beınesin kórsetpeı júrgen bolýy múmkin.

"Sheteldiktermen aralasýǵa, shetelge, ásirese, teńizge shyǵýǵa jaısyz ýaqyt. Bul kúnderi alańǵasarlyqtan kólik apaty jıilep ketýi yqtımal", -deıdi maman.

Sý, dári, esirtki jáne ishimdikti qoldanýmen baılanysty jazataıym oqıǵalar bolýy ábden múmkin. Óz-ózińizge medısınalyq dıagnoz qoıýǵa asyqpańyz.

"Qoǵamda janjal, kelispeýshilik baıqalýy múmkin. Saıası arenada ótirik sóıleý, ekijúzdilikke kýá bolýymyz yqımal, osy ýaqytta bergen ýádeler oryndalmaıdy, kelisimder buzylady", - dedi Abdraımova.

Biraq, onyń aıtýynsha, bul kezeńniń bir jaqsy jaǵy bar. Shyǵarmashylyq, medıtasıa, ózińniń rýhanı deńgeıindi kóterýge taptyrmas ýaqyt.

Usynǵan: Nazerke Labıhan