Aýrýhanadaǵy naýqastardyń janynda áıelder júredi. Olar – analar, ápkeler, áıelder nemese medısına qyzmetkerleri. Er adamdar ádette bir keledi de, shý kóterip ketedi. Aýrýhananyń, dárilerdiń aqshasyn tabatynyn aıtyp, joq bolady.

Áıelder men erkekterdiń aıyrmashylyǵyn osydan-aq baıqaýǵa bolatyn shyǵar... Jaqsy kóretin adamynyń janynda sońyna deıin bolý, onymen birge qınalý, qýaný – tek áıelderdiń qolynan keletin is. Soǵysqa ketken, túrmege qamalǵan balasyn kútýde shydamdylyq tanytatyn da – tek áıel.

Kúresedi olar... Qıyndyqtarǵa, túrli boljamdarǵa qaramastan...

Áıelderdiń jany taqyrybynda sóz qozǵarda men 10 jyl boıy birge jumys istegen Natalá Aleksandrqyzyn eske alamyn. Jas dárigerlerdiń bári ony osylaı ataıtyn. Bul qatal medbıkeniń senimine kirip, qurmetine bólený – qıynnyń qıyny edi. Alǵashynda men de renjıtinmin. Ýaqyt óte kele onyń daǵdysyn baıqap, qurmetim kúnnen kúnge arta berdi.

Ol kezekshi bolǵan kúnderi bizdiń bólimdi erekshe tynyshtyq bıleıtin. Men de jumysymdy erkin isteımin, aýrýlar tarıhyn úzdiksiz jaza alamyn, sebebi Natalá Aleksandrqyzy barlyq máseleni ýaqytyly jaýyp otyratyn. Eger tún ortasynda shaqyratyn bolsa, onda bir qıyndyqtyń týyndaǵany.

Ony kúıeýi tastap ketken. Bul jaǵdaı búkil aýrýhananyń áńgimesine arqaý boldy. Árıne, áıeli qashan da kezekshilikte júredi. Balalarymen uzaq ýaqyt boıy jalǵyz turdy. Jumys, jumys, tek qana jumys. Mundaı áıelder aýrýhanamyzda kóp boldy. Tipti sýasty súńgýir qaıyǵyndaǵy ómir ispettes. Bir komanda, bir qaıyq.

Ajyrasqan soń 7-8 jyldan keıin aýrýhanaǵa leıkozben bir naýqas tústi. Hal ústinde... Al Natalá Aleksandrqyzy oǵan qamqorlyq tanytty, ózi tamaqtandyrdy, ózi kıindirdi, jýyndyrdy. Balalary kelip turatyn. Anyqtalǵandaı, álgi naýqas Natalányń kúıeýi eken. Aýyryp qalǵan soń jas ári sulý jary tastap ketken eken. Muny estigen Natalá onyń  úıine baryp, aýrýhanaǵa ákeldi.

Birneshe kúnnen keıin naýqas ómirden ótti. Natalá barlyq joralǵyny ózi jasady, jerleý rásimin ózi qadaǵalady.

Ózgeler ony synaı bastady: «Aı aqymaq-aı!», «Nesi bar?», «Men bolsam, eshqashan da qaramas edim» taǵysyn taǵy. Al bizdiń medbıkege báribir edi. Ol tek súıdi, jaqsy kórdi.

Biz, er adamdar, osylaı súıe alamyz ba? Joq, árıne.

Er adamnyń mahabbaty tez qaıtady, ıá, qınalar, biraq tez sýyp kete alady. Al áıeldiń mahabbaty, sezimi eshqashan óshpeıdi, bári júreginde saqtalady, máńgige!

Erık Ábenuly, dáriger-hırýrg

Usynǵan: Gúlim Jaqan