Májilis depýtaty Berik Dúısenbınov Syrtqy ister mınıstri Beıbit Atamqulovtan Qytaıdaǵy túzetý lagerleri men qamaýda jatqan qandastardyń máselesi qalaı sheshilip jatqanyn surady, dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.
Májilistegi úkimet saǵatynda depýtat Berik Dúısenbınov Qytaıdaǵy qandastar máselesin kóterdi. Májilismen Syrtqy ister mınıstri Beıbit Atamqulovtan túzetý lagerleri men qorlyq kórgen, eline jete almaı jatqan qandastardyń máselesin sheshý boıynsha qandaı keshendi sharalar qolǵa alynǵanyn surady.
"Bizge kún saıyn Qytaıdan birtalaı málimet kelip túsedi. Bul másele bizdiń erekshe nazarymyzda. Byltyr 2,5 myń qandasymyz Qazaqstanǵa oralýǵa ruqsat aldy. Al bıyl qos azamattyq úshin 33 adam qamaýǵa alynǵan. Dıplomatıalyq jumystardyń nátıjesinde sonyń 20-syn elge qaıtardyq", - dedi mınıstr depýtatqa bergen jaýabynda.
Sonymen qatar, onyń aıtýynsha, mınıstrlikke qamaýda otyrǵan qazaqtar týraly 1387 aryz túsken. Ár túsken aryzdy jeke-jeke qarastyryp jatyrmyz, - dep sendirdi Atamqulov.
"Bul másele búkil álemdegi musylmandardyń qulaǵyn shýlatyp jatyr. Qytaıdyń óz saıasaty bar, birqatar dıplomat sol lagerge baryp, óz kózderimen kórip qaıtty. Búgingi tańda, bizge túsken málimet boıynsha, sol jerde ustalǵan qazaqtardyń sany 80 prosentke azaıǵan, bárin shetinen bosatyp jatyr. Bıyl da qandastarymyz jeńildik aldy", - dedi ol.
Atamqulov Syrtqy ister mınıstrligimen ǵana emes, İshki ister jáne basqa da quzyrly organdarmen úlken jumys júrgizilip jatqanyn atap ótti.
Usynǵan: Maqpal Sembaı
Pikir qaldyrý