Qamshy.kz aqparat agenttigi oqyrmandar nazaryna qońyr úndi Muqaǵalı aqynnyń óz daýysymen oqyǵan birqatar óleńderin usynady.

Bulqynyp jatyr

Bulqynyp jatyr.
Kelmeıdi-aý qurǵyr shamasy,
Bulqynyp jatyr.
Taýsyldy-aý aıla-sharasy.
Sáýlemniń meniń aıaq pen qolyn matamaı,
Bostandyq bershi, bostandyq bershi, mamasy.
Tumshalap qoıdyń nesine sonsha qaýsyryp,
Shandýdan bólek qalǵan ba sharań taýsylyp.
Aıaq pen qolyn matamaı bos qoı, mamasy,
Kishkentaı adam kórsetip jatyr qarsylyq.
Qarashy mynaý qabarjyp jatqan pishinge,
İza men ashý qaınaıdy kelip ishinde.
Jetpeı me sol da, qoıdyń ǵoı meni arqandap
Mamasy, bosat, qyzyma qursaý túsirme!
Kókemdi bosat, aıaq pen qolyn matama,
Kóterip júrem, kóterip ótem jotama.
Basymdy tigem.
Barmaqtaı meniń sábıim
búldire qoımas...
Bostandyq bershi botama?
Mamasy, bosat, erkimen óssin tal shybyq!
Aýa men kúnge, Aı menen nurǵa malshynyp.
Bulqynyp jatyr, umtylyp jatyr, qarashy
Kishkentaı júrek kórsetip jatyr qarsylyq.

 ***

Qarlyǵashym, keldiń be, qarshyǵadan saýmysyń?

Qarlyǵashym, keldiń be, qarshyǵadan saýmysyń?
Aman-esen jettiń be, aıyr quıryq naý-qusym?
Oraldyń ba, taǵy da óziń ósken uıaǵa,
Oraldyń ba, súıiktim, ekeýiń de barmysyń?
Qarlyǵashym, bu qalaı, qaıda ketken serigiń?
Zıany joq zıalym, ókpeletti seni kim?
...Túsinikti, súıiktim, túsinikti aıtpa endi,
Tumar qusym ketken-aý tyrnaǵynda periniń.
(O jyly biz aýylda ońasha úıde túrǵanbyz)
Jaz da ótip barady, qarlyǵashym júr jalǵyz,
Kózdi ashyp-jumǵansha kóseýin ap qolyna
Jetip keldi bir kúni jel úrlegen syrdan kúz.
Ǵanıbet qoı, shirkin-aı, shýyldasań ulardaı,
Qıyn eken jalǵyzdyq qıada ósken shynardaı,
Jalǵyz qaıtty sol jyly, jalǵyz qaıtty jyl qusy,
Jumyrtqa da taba almaı, balapan da shyǵarmaı.
Qaraýytyp kóz aldym, qarap turmyn dosyma,
- Qarlyǵashym, qaıta oral mekenińe, shoshyma.
Ájem meniń kúıbeńdep, kúbirdep júr aýlada,
- O, bátshaǵar ómir-aı, ómir deıtin osy da!..

***

Qazdar qaıtyp barady mekenine

Qazdar qaıtyp barady mekenine,
(Qanaty bar maqulyq ketedi de).
Qaz-qaz basyp, qaltyrap qarıa tur
Dármeni joq taıaǵyn kóterýge.
Qarashanyń qalyqtap jelimenen,
Qazdar ketti qoshtasyp kólimenen,
Qaıtqan qustyń qarıa qanatyna
Qaraıdy kózin súrtip jeńimenen.
Qazdar qaıtyp barady tizbektelip,
İzdep ketti kóktemdi, izdep kelip.
Qarashada qaltyrap qarıa tur
Taǵy da bir sup-surǵylt kúzdi ótkerip.
Qazdar ketti, qulaqta úni qaldy,
Jazdy áketti.
Áketti tunyq ándi,
Qaıtqan qustan qara úzip qalsa-daǵy,
Qaltyldaǵan qarıa, turyp aldy.
Qarashanyń ulysa jeli gýlep,
Túsine ber qańtardyń jeligi dep.
...Qısaıyp bara jatqan qarıany
Súıeı berdi balasy, kelini kep...

 ***
Paı, paı, Ómir! 

Ótesiń-aý bir kúni. 
Tyıasyń-aý qýanyshty, kúlkini. 
Ómir degen - bir jarq etken naızaǵaı, 
Ómir degen - kók aspannyń kúrkiri. 
Paı, paı, Ómir, 
Ótesiń-aý bir kúni! 
Bolmaǵandaı, júrmegendeı sende biz, 
Ketemiz-aý, áı, ketemiz,.. pendemiz. 
Urpaqtarǵa beremiz de kezekti, 
Biz ketemiz. 
Ketý úshin kelgemiz. 
Ómir degen - buıym emes qoldaǵy, 
Ómir deıtin - uly beket joldaǵy. 
Qanyń keýip qatalaǵan kezińde 
Sýsynyńdy qandyrsań bir bolǵany. 
Myna kún de, myna aspan da, dala anaý, 
Bári bizden, bári bizden qalady-aý! 
Ómir deıtin - taǵatsyz bir qozǵalys, 
Ómir deıtin - ólemin dep qaramaý.

***

Esińe meni alǵaısyń

Nur jaýyp turǵan kóktemde,
Gúl tere barsań bókterge,
Qońyraýlatqan aspandy
Naızaǵaı shanshyp ótkende,
Esińe meni alǵaısyń?

Tunjyrap turǵan ormanǵa,
Tunjyrap jalǵyz barǵanda.
Men bar dep myna jalǵanda,
Joq degen sózge aldanba.
Esińe meni alǵaısyń!

Japyraq janyp jatqanda,
Kúz kelgen kúreń shaqtarda,
Aǵashtar muńǵa batqanda
Esińe meni alǵaısyń!

Aq qyraý turǵan aqpanda,
Aǵashtar syrǵa taqqanda,
Bozaryp turyp aq tańda,
Esińe meni alǵaısyń,
Esińe meni alǵaısyń!

***

Oıhoı, qazaq dalasy!

Oıhoı, qazaq dalasy!

He kórmediń?!
Qansha qýrap, qanshama kógermediń?!
Qorqyttyń qobyzymen bozdattyń ǵoı,
Asannyń sherge oranǵan óleńderin.
Oıhoı, qazaq dalasy!
He kórmediń?!
Qorqyt, Asan tirilip, qaıta kelse,
Seniń myna keıpińe sener me edi?..
Myna baqty kórgender tóbeńdegi
Qýanǵannan kóz jasyn tóger me edi?
Qýanyshtan keýdesi qars aırylyp,
Kim biledi, qaıtadan óler me edi?!
Oıhoı, qazaq dalasy,ne kórmediń?!
Ótkenine úńilip otyra alman,
(Bizdiń qazaq ólmegen, oty janǵan...)
Úzik-úzik estımin sarań habar,
Tirideıin kómilgen Otyrardan.
Aıta jatar basqalar ótkenimdi,
Qan men jasty qaıtip men tókkenimdi,
Jańa dáýir aldynda,jón kóremin,
Azamattyq boryshty ótkerýdi.

Jınaqtap, usynǵan: Maqpal Sembaı