Máz bolyp turyp, orynsyz keıde jylaı salýym – tym ońaı,
Túsedi sonda esime endi kelmeske ketken san jaǵdaı.
Kóńilim bosap, qulazyp jónsiz, túsemin kúıge bir beıjaı,
O, toba, nege, nelikten osy boldy ekem, sirá, men mundaı...

Eńirep, etek kóz jasqa tolyp, kúle salýym – tym ońaı,
Jylaýdy bilmeı, júrgen bir kúlip, bolamyn jandaı tek udaı. 
«Bári de jaqsy», - deı salam janǵa halimdi kelgen, jón suraı,
O, toba, nege, nelikten osy, boldy ekem, sirá, men mundaı... 

Tep-tegis jerde tip-tik turyp-aq, qulaı salýym - tym ońaı,
Qumǵa da keıde shalynyp qalyp, jatamyn jerde tura almaı.
Túımedeı nárse túıedeı bolyp, kórinip keter dóń taýdaı,
O, toba, nege, nelikten osy, boldy ekem, sirá, men mundaı...

Jigerlenip ap, kúshime minip, batyr bolýym – tym ońaı,
Tolqyndaı tasyp, taýdy da asyp, soǵamyn keıde quıyndaı.
Keıpine enip ketemin sonda «kótergen taýdy Tolaǵaı»,
O, toba, nege, nelikten osy, boldy ekem, sirá, men mundaı... 

Kúnámdi oılap, ólgim kelýi keı kezde osy – tym ońaı,
Qatelik bolyp kórined(i) meniń júrgenim jerde dál bulaı.
Adasqan qulǵa jar bola kór dep tileımin sonda, o, Qudaı.
O, toba, nege, nelikten osy, boldy ekem, sirá, men mundaı... 

Qanaǵat tutyp barymdy, ómir súrgim kelýim – tym ońaı,
Qalsam da meıli quz-jardan, taýdan, áldebir shyńnan sál qulaı.
Ómirge ǵashyq bolam da qalam, júrsem de keıde tek jylaı,
O, toba, nege, nelikten osy, boldy ekem, sirá, men mundaı... 

Ketermin ushyp mekenge ózge bir sekýnd munda men qalmaı,
Surama sonda janyma kelip, «qalaısha, nege, dep... bulaı?».
Mańdaıǵa baqyt jazylǵan bolsa, buıyrsa túıir baq maǵan...
Baqytsyz bolyp júrem de bir kún baqytty bolam... tym ońaı. 

Maqpal Sembaı